ಸರ್ಬಿಯಾ ದೇಶದಿಂದ ಭಾರತಕ್ಕೆ ಬಂದು ಬಣ್ಣದ ಲೋಕದಲ್ಲಿ ಬದುಕು ಕಟ್ಟಿಕೊಳ್ತಿದ್ದ ನತಾಶಾ ಹಾರ್ದಿಕ್ ಪಾಂಡ್ಯ ಜೊತೆ ಪ್ರೀತಿಯಲ್ಲಿ ಮುಳುಗಿ ಮದುವೆಗೂ ಮೊದಲೇ ಮಗುವನ್ನು ಮಾಡಿಕೊಂಡಿದ್ದಳು. ಬೊಂಬಾಟ್ ಸಂಸಾರ ಸಾಗಿಸುತ್ತಾ ಬಂದಿದ್ರು. ಹಾರ್ದಿಕ್ ಮತ್ತು ನತಾಶಾ ಜೋಡಿಯನ್ನು ಕಂಡು ಇದ್ರೆ ಹೀಗೆ ಇರ್ಬೇಕು ಅಂತ ಆಸೆಪಟ್ಟ ಜೋಡಿಗಳು ಅದೆಷ್ಟೋ. ಆದ್ರಿಂದು ಅದೇ ಜೋಡಿಯ ಬಾಳಲ್ಲಿ ಕಂದಕ ಸೃಷ್ಟಿಯಾಗಿದೆ ಎಂಬ ಸುದ್ದಿಗಳು ಅಪ್ಪಳಿಸಿವೆ. ಆ ಗಾಸಿಪ್‌ಗಳು ನಿಜವೇ ಎಂದುಕೊಳ್ಳೋದಾದ್ರೆ ಈ ಸಂಸಾರದಲ್ಲಿ ಕಲಹ ಮೂಡಲು ಕಾರಣವೇನು ಎಂಬ ಪ್ರಶ್ನೆ ಹುಟ್ಟುತ್ತೆ.
ಭಾರತ ಕ್ರಿಕೆಟ್ ತಂಡದ ಸ್ಟಾರ್ ಆಲ್‌ರೌಂಡರ್ ಹಾರ್ದಿಕ್ ಪಾಂಡ್ಯ ಸಾಂಸಾರಿಕ ಜೀವನದಲ್ಲಿ ಕಾರ್ಮೋಡ ಕವಿದಿರೋ ಬಗ್ಗೆ ಗಾಸಿಪ್‌ಗಳು ಶುರುವಾಗಿವೆ. ನಾಲ್ಕು ವರ್ಷಗಳ ಹಿಂದೆ ಸರ್ಬಿಯಾ ಮೂಲದ ಮಾಡೆಲ್ ನತಾಶಾ ಸ್ಟಾಂಕೋವಿಕ್ ಜೊತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದ ಹಾರ್ದಿಕ್ ಪಾಂಡ್ಯಗೆ ಕ್ರಿಕೆಟ್ ಕೆರಿಯರ್‌ನ ಸಂಕಷ್ಟದ ಕಾಲದಲ್ಲೇ ದಾಂಪತ್ಯದಲ್ಲೂ ಬಿರುಕು ಮೂಡಿದೆ ಎನ್ನಲಾಗ್ತಿದೆ. ಅಲ್ಲದೆ, ಇದಾಗಲೇ ಹಾರ್ದಿಕ್ ಪಾಂಡ್ಯ ಮತ್ತು ಪತ್ನಿ ನತಾಶಾ ಪರಸ್ಪರ ಮಾತುಕತೆ ನಡೆಸಿ ವಿಚ್ಛೇದನಕ್ಕೂ ಮುಂದಾಗಿದ್ದಾರೆಂದು ಹೇಳಲಾಗುತ್ತಿದೆ. ವಿಚ್ಛೇದನದ ಬಳಿಕ ಹಾರ್ದಿಕ್ ಪಾಂಡ್ಯ ತಮ್ಮ ಪತ್ನಿ ನತಾಶಾಗೆ ತಮ್ಮ ಆಸ್ತಿಯ ಶೇಕಡ 70 ರಷ್ಟನ್ನು ನೀಡಬೇಕಾಗಬಹುದು ಎನ್ನಲಾಗುತ್ತಿದೆ. ಅಂದರೆ, ಹಾರ್ದಿಕ್ ಪಾಂಡ್ಯ ಪತ್ನಿ ನತಾಶಾಗೆ ವಿಚ್ಛೇದನ ಪರಿಹಾರವಾಗಿ 60 ಕೋಟಿ ರೂಪಾಯಿಗಳನ್ನು ನೀಡಬೇಕಾಗುತ್ತೆ.
ಒಂದೊಮ್ಮೆ ಸದ್ಯದ ಗಾಸಿಪ್‌ ನಿಜ ಎಂದುಕೊಳ್ಳೋದಾದ್ರೆ ಹಾರ್ದಿಕ್ ಪಾಂಡ್ಯ ಮತ್ತು ನತಾಶಾ ನಡುವೆ ಬಿರುಕು ಮೂಡಿದ್ಯಾಕೆ? ಸುಂದರ ಸಂಸಾರ ಛಿದ್ರವಾಗುವಂತೆ ಮಾಡಿದ್ದೇನು ಎಂಬ ಪ್ರಶ್ನೆ ಹುಟ್ಟಿದೆ. ಈ ಸಂಬಂಧಪಟ್ಟಂತೆ ಹಲವು ಚರ್ಚೆಗಳು ಶುರುವಾಗಿವೆ. ಕ್ರಿಕೆಟರ್ ಹಾರ್ದಿಕ್ ಮತ್ತು ನತಾಶಾ ದಂಪತಿಯ ಬಾಳಲ್ಲಿ ಕಲಹ ಹುಟ್ಟಲು ಹತ್ತಾರು ಕಾರಣಗಳನ್ನು ಪಟ್ಟಿ ಮಾಡಲಾಗ್ತಿದೆ.
ಮದುವೆ ಬಳಿಕವೂ ಮಾಜಿ ಬಾಯ್‌ಫ್ರೆಂಡ್ ಜೊತೆ ನತಾಶಾ ನಂಟು?
ಹಾರ್ದಿಕ್-ನತಾಶಾ ದಾಪಂತ್ಯದಲ್ಲಿ ಹುಳಿ ಹಿಂಡಿದನಾ ಮಾಜಿ ಪ್ರಿಯಕರ?
ಹಾರ್ದಿಕ್ ಪಾಂಡ್ಯ ಪತ್ನಿ ನತಾಶಾ ಸ್ಟಾಂಕೋವಿಕ್ ಸರ್ಬಿಯಾ ದೇಶದವರು. ಮಾಡೆಲಿಂಗ್ ಮೂಲಕ ಹೆಸರು ಮಾಡಿದ್ದ ನತಾಶಾ ನಟಿಯಾಗಿ ಬಾಲಿವುಡ್‌ಗೆ ಎಂಟ್ರಿಯಾಗಿದ್ದರು. ಅಲ್ಲದೆ, 2014 ರಲ್ಲಿ ಹಿಂದಿಯ ಬಿಗ್‌ಬಾಸ್ 8 ರಲ್ಲಿ ಕಾಣಿಸಿಕೊಂಡ ಬಳಿಕವಂತೂ ನತಾಶಾ ಪಾಪ್ಯುಲಾರಿಟಿ ಮತ್ತಷ್ಟು ಹೆಚ್ಚಾಗಿತ್ತು. ಅದಾದ ಬಳಿಕ ಹಲವಾರು ಬಾಲಿವುಡ್‌ ಚಿತ್ರಗಳಲ್ಲಿ ಬಣ್ಣ ಹಚ್ಚಿದ್ದ ನತಾಶಾ ಕನ್ನಡದ ದುನಿಯಾ ವಿಜಯ್ ನಟನೆಯ ದನ ಕಾಯೋನು ಚಿತ್ರದಲ್ಲಿ ಸಣ್ಣ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದರು.
ಅದಾದ ಬಳಿಕ ನಚ್ ಬಲಿಯೇ ಹೆಸರಿನ ರಿಯಾಲಿಟಿ ಶೋನಲ್ಲೂ ನತಾಶಾ ಮಿಂಚಿದ್ದಳು. ಆ ರಿಯಾಲಿಟಿ ಶೋನಲ್ಲಿ ನತಾಶಾ ಜೊತೆ ಸ್ಪರ್ಧಿಯಾಗಿದ್ದವ ಈ ಅಲಿ ಗೋನಿ. ನಟ, ಮಾಡೆಲ್ ಆಗಿರೋ ಅಲಿ ಗೋನಿ ಈ ನತಾಶಾಳ ಜೊತೆ ಆತ್ಮೀಯನಾಗುತ್ತಾನೆ. ಇಬ್ಬರ ನಡುವೆ ಲವ್ವಿಡವ್ವಿ ಶುರುವಾಗಿ ನಂತರದಲ್ಲಿ ನತಾಶಾ ಅಲಿ ಗೋನಿಯ ಜೊತೆ ಬ್ರೇಕಪ್ ಮಾಡಿಕೊಂಡಳು ಎಂಬ ಸುದ್ದಿಗಳಿವೆ. ಹಾರ್ದಿಕ್ ಮತ್ತು ನತಾಶಾ ದಾಂಪತ್ಯ ಜೀವನದಲ್ಲಿ ಬಿರುಗಾಳಿ ಬೀಸೋದಕ್ಕೆ ಈತನೂ ಕಾರಣ ಇರಬಹುದು ಎನ್ನಲಾಗುತ್ತಿದೆ. ಯಾಕಂದ್ರೆ, ಮದುವೆ ಬಳಿಕವೂ ನತಾಶಾ ತನ್ನ ಮಾಜಿ ಬಾಯ್‌ಫ್ರೆಂಡ್ ಅಲಿ ಗೋನಿಯೊಟ್ಟಿಗೆ ಸಂಪರ್ಕದಲ್ಲಿ ಇದ್ದಾಳೆಂದು ಹೇಳಲಾಗುತ್ತಿದೆ. ನತಾಶಾ ತನ್ನ ಮಾಜಿ ಪ್ರಿಯಕರನ ಜೊತೆ ಸಂಪರ್ಕದಲ್ಲಿದ್ದದ್ದೇ ಸಂಸಾರದಲ್ಲಿ ಕಲಹ ಮೂಡಲು ಕಾರಣವಾಯ್ತು ಎಂಬ ಮಾತುಗಳಿವೆ. ಆದ್ರೆ, ಈ ಗಾಸಿಪ್‌ಗಳು ಎಷ್ಟು ನಿಜ ಎಷ್ಟು ಸುಳ್ಳು ಎಂಬುದು ಮಾತ್ರ ನಿಗೂಢ.
ಪತ್ನಿಗೆ ಹಾರ್ದಿಕ್ ₹60 ಕೋಟಿ ರೂಪಾಯಿ ಜೀವನಾಂಶ ಕೊಡ್ಬೇಕಾಗುತ್ತಾ?
ಗಾಸಿಪ್‌ಗಳ ಪ್ರಕಾರ ಹಾರ್ದಿಕ್ ಪಾಂಡ್ಯ ಅವರು ಪತ್ನಿಯಿಂದ ವಿಚ್ಛೇದನ ಪಡೆದರೆ ಜೀವನಾಂಶ ರೂಪದಲ್ಲಿ ತಮ್ಮ 70% ಆಸ್ತಿಯನ್ನು ನತಾಶಾಗೆ ನೀಡಬೇಕಾಗುತ್ತದೆ ಎನ್ನಲಾಗುತ್ತಿದೆ. ಹಾರ್ದಿಕ್ ಪಾಂಡ್ಯ ಒಟ್ಟಾರೆ 165 ಕೋಟಿ ರೂ. ಮೌಲ್ಯದ ಆಸ್ತಿ ಹೊಂದಿದ್ದಾರಂತೆ. ಮುಂಬೈನಲ್ಲಿ 30 ಕೋಟಿ ರೂಪಾಯಿಗೆ ಅಪಾರ್ಟ್‌ಮೆಂಟ್ ಖರೀದಿಸಿದ್ದು, ಇದರೊಂದಿಗೆ ಅವರು ವಡೋದರಾದಲ್ಲಿ ದುಬಾರಿ ಬೆಲೆಯ ವಿಲ್ಲಾ ಹೊಂದಿದ್ದಾರೆ. ಹಾಗಾಗಿ, ಹಾರ್ದಿಕ್ ಪಾಂಡ್ಯ ತಮ್ಮ ಪತ್ನಿಗೆ ವಿಚ್ಛೇದನ ನೀಡಿದರೆ ಕನಿಷ್ಟ ಅಂದರೂ 60 ಕೋಟಿ ರೂಪಾಯಿ ಜೀವನಾಂಶ ಕೊಡಬೇಕಾಗುತ್ತೆ ಎಂಬ ಚರ್ಚೆಗಳು ಶುರುವಾಗಿವೆ. ಆದ್ರೆ ಅಧಿಕೃತ ಮಾಹಿತಿ ಹೊರಬೀಳೋವರೆಗೂ ಎಲ್ಲವೂ ಗಾಸಿಪ್‌ಗಳಷ್ಟೇ.
ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್ ತಂಡದ ನಾಯಕತ್ವದ ವಿಚಾರದಲ್ಲಿ ಕಟು ಟೀಕೆಗಳನ್ನು ಅನುಭವಿಸಿರೋ ಹಾರ್ದಿಕ್ ಪಾಂಡ್ಯಗೆ ಈಗ ಸಾಂಸಾರಿಕ ಜೀವನದಲ್ಲೂ ಸಂಕಷ್ಟ ಶುರುವಾಗಿದೆ. ಗಂಡ ಹೆಂಡತಿ ನಡುವೆ ಎಲ್ಲವೂ ಸರಿಯಿಲ್ಲ ಎಂಬುದು ಮೇಲ್ನೋಟಕ್ಕೆ ಸ್ಪಷ್ಟವಾಗ್ತಿದೆ. ಆದ್ರೆ ಹಾರ್ದಿಕ್ ಪಾಂಡ್ಯ ಮತ್ತು ನತಾಶಾ ಜೋಡಿ ಈ ಕ್ಷಣಕ್ಕೂ ಯಾವುದೇ ಸ್ಪಷ್ಟನೆ ನೀಡಿಲ್ಲ.
ಜಾಹೀರಾತು ನೀಡಲು ಸಂಪರ್ಕಿಸಿ
Phone Number : +91-9164072277
Email id : salesatfreedomtv@gmai
