ಇರಾನ್ ಹಡಗು ಮುಳುಗಿಸೋದೇ ನಮಗೆ ಮಜಾ! ಸೈನಿಕರ ಮಾತು ಕೇಳಿ ಟ್ರಂಪ್ ಶಾಕ್!
ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷ ಈಗ ಸಮುದ್ರದ ಮೇಲೂ ತೀವ್ರಗೊಂಡಿದ್ದು, ಇರಾನ್ನ ನೌಕಾಪಡೆಯನ್ನು ಅಮೆರಿಕ ಸೈನ್ಯವು ಅಕ್ಷರಶಃ ಧೂಳೀಪಟ ಮಾಡುತ್ತಿದೆ. ಫ್ಲೋರಿಡಾದ ಡೋರಲ್ನಲ್ಲಿ ನಡೆದ ನ್ಯಾಷನಲ್ ರಿಪಬ್ಲಿಕನ್ ಸಭೆಯಲ್ಲಿ ಮಾತನಾಡಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ‘ಆಪರೇಷನ್ ಎಪಿಕ್ ಫ್ಯೂರಿ’ ಕಾರ್ಯಾಚರಣೆಯ ಯಶಸ್ಸಿನ ಕುರಿತು ಮಾಹಿತಿ ಹಂಚಿಕೊಳ್ಳುವಾಗ ಮಿಲಿಟರಿ ಅಧಿಕಾರಿಗಳೊಂದಿಗಿನ ತಮ್ಮ ಸ್ವಾರಸ್ಯಕರ ಸಂಭಾಷಣೆಯನ್ನು ಬಹಿರಂಗಪಡಿಸಿದ್ದಾರೆ.
ಕೇವಲ ಮೂರೂವರೆ ದಿನಗಳಲ್ಲಿ ಅಮೆರಿಕದ ನೌಕಾಪಡೆಯು ಇರಾನ್ನ 46 ಯುದ್ಧ ನೌಕೆಗಳನ್ನು ಸಮುದ್ರದ ಪಾಲಾಗಿಸಿದೆ. ಈ ಬಗ್ಗೆ ಟ್ರಂಪ್ ಅವರು ಸೇನಾಧಿಕಾರಿಗಳನ್ನು ಪ್ರಶ್ನಿಸಿ, “ಇರಾನ್ನ ಹಡಗುಗಳು ಉತ್ತಮ ಗುಣಮಟ್ಟದ್ದಾಗಿವೆ, ಅವುಗಳನ್ನು ವಶಪಡಿಸಿಕೊಂಡು ನಮ್ಮ ಸೇನೆಯಲ್ಲಿ ಬಳಸಬಹುದಿತ್ತಲ್ಲವೇ? ಏಕೆ ಮುಳುಗಿಸಿದ್ದೀರಿ?” ಎಂದು ಕೇಳಿದ್ದರಂತೆ. ಅದಕ್ಕೆ ಸೈನಿಕರು ನೀಡಿದ ಉತ್ತರ ಕೇಳಿ ಸ್ವತಃ ಅಧ್ಯಕ್ಷರೇ ಬೆರಗಾಗಿದ್ದಾರೆ. “ಸರ್, ಆ ಹಡಗುಗಳನ್ನು ವಶಪಡಿಸಿಕೊಳ್ಳುವುದಕ್ಕಿಂತ ಅವುಗಳನ್ನು ಮುಳುಗಿಸುವುದೇ ನಮಗೆ ಹೆಚ್ಚು ಮಜಾ ನೀಡುತ್ತದೆ” ಎಂದು ಸೈನಿಕರು ಉತ್ತರಿಸಿದ್ದಾಗಿ ಟ್ರಂಪ್ ಹಾಸ್ಯಮಯವಾಗಿ ಸಭೆಯಲ್ಲಿ ತಿಳಿಸಿದ್ದಾರೆ.
ಸೈನಿಕರು ಶತ್ರು ಹಡಗುಗಳನ್ನು ಮುಳುಗಿಸುವುದನ್ನೇ ಹೆಚ್ಚು ಇಷ್ಟಪಡುತ್ತಾರೆ ಮತ್ತು ಅದು ಭದ್ರತೆಯ ದೃಷ್ಟಿಯಿಂದಲೂ ಸುರಕ್ಷಿತ ಎಂದು ಅವರು ನಂಬಿದ್ದಾರೆ. ಬಹುಶಃ ಅವರ ಮಾತು ಸರಿಯೇ ಇರಬಹುದು ಎಂದು ಟ್ರಂಪ್ ಮಾರ್ಮಿಕವಾಗಿ ನುಡಿದಿದ್ದಾರೆ. ಈ ಕಾರ್ಯಾಚರಣೆಯು ಕೇವಲ ಹಡಗುಗಳಿಗೆ ಸೀಮಿತವಾಗಿಲ್ಲ; ಇರಾನ್ನ ಡ್ರೋನ್ ಮತ್ತು ಕ್ಷಿಪಣಿ ತಾಣಗಳನ್ನೂ ಗುರಿಯಾಗಿಸಿಕೊಂಡು ಧ್ವಂಸಗೊಳಿಸಲಾಗುತ್ತಿದೆ. ಈ ಮೂಲಕ ಇರಾನ್ ಸೈನ್ಯವು ಸಂಪೂರ್ಣ ಸೋಲಿನ ಹಾದಿಯಲ್ಲಿದೆ ಎಂದು ಅಮೆರಿಕ ಪ್ರತಿಪಾದಿಸಿದೆ.
ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ನಡೆಸುತ್ತಿರುವ ಈ ಪ್ರಬಲ ದಾಳಿಯಿಂದಾಗಿ ಇರಾನ್ನ ನೌಕಾ ಶಕ್ತಿಯು ಕುಸಿದುಬಿದ್ದಿದೆ. ಈ ಬೆಳವಣಿಗೆಯು ಜಾಗತಿಕ ರಾಜಕೀಯದಲ್ಲಿ ಹೊಸ ಸಂಚಲನ ಮೂಡಿಸಿದ್ದು, ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ಹಿಡಿತ ಮತ್ತಷ್ಟು ಬಿಗಿಯಾಗುತ್ತಿದೆ.
