ಸಮುದ್ರದ ಅಡಿಯಲ್ಲಿ ಅಡಗಿದೆ 2 ಕೋಟಿ ಟನ್ ಚಿನ್ನ..!ನಮಗೂ ಸಿಗುತ್ತಾ ‘ಬಂಗಾರದ’ ಪಾಲು?
ಸಮುದ್ರದ ಅಗಾಧ ನೀಲಿ ನೀರಿನ ಅಡಿಯಲ್ಲಿ ಕೇವಲ ಜಲಚರಗಳಷ್ಟೇ ಅಲ್ಲ, ಮನುಷ್ಯನ ಕಲ್ಪನೆಗೂ ಮೀರಿದ ಬೃಹತ್ ಪ್ರಮಾಣದ ಚಿನ್ನದ ನಿಧಿ ಅಡಗಿದೆ. ವಿಜ್ಞಾನಿಗಳ ಅಂದಾಜಿನ ಪ್ರಕಾರ, ಜಗತ್ತಿನಾದ್ಯಂತ ಇರುವ ಸಮುದ್ರಗಳ ಒಡಲಲ್ಲಿ ಸುಮಾರು 2 ಕೋಟಿ ಟನ್ಗಳಷ್ಟು ಚಿನ್ನವಿದೆ. ಭೂಮಿಯ ಮೇಲಿನ ಎಲ್ಲಾ ಗಣಿಗಳಲ್ಲಿರುವ ಬಂಗಾರವನ್ನು ಒಟ್ಟುಗೂಡಿಸಿದರೂ ಸಮುದ್ರದ ಈ ನಿಧಿಯ ಮುಂದೆ ಅದು ತೀರಾ ಅಲ್ಪ ಎನ್ನುವುದು ಬೆರಗುಗೊಳಿಸುವ ಸತ್ಯ.
ಈ ನಿಧಿಯ ಬಗ್ಗೆ ಅತ್ಯಂತ ಆಶ್ಚರ್ಯಕರ ವಿಷಯವೆಂದರೆ, ಒಂದು ವೇಳೆ ಸಮುದ್ರದ ಗರ್ಭದಲ್ಲಿರುವ ಈ ಎಲ್ಲಾ ಚಿನ್ನವನ್ನು ಯಶಸ್ವಿಯಾಗಿ ಹೊರತೆಗೆದು ಭೂಮಿಯ ಮೇಲಿರುವ ಪ್ರತಿಯೊಬ್ಬ ಮನುಷ್ಯನಿಗೂ ಸಮಾನವಾಗಿ ಹಂಚಿದರೆ, ಪ್ರತಿಯೊಬ್ಬರಿಗೂ ತಲಾ 4 ಕೆಜಿ ಚಿನ್ನ ಸಿಗುತ್ತದೆ. ಇಂದಿನ ಮಾರುಕಟ್ಟೆ ಬೆಲೆಯಲ್ಲಿ ಇದರ ಮೌಲ್ಯವನ್ನು ಲೆಕ್ಕ ಹಾಕಿದರೆ, ಭೂಮಿಯ ಮೇಲಿರುವ ಪ್ರತಿಯೊಬ್ಬ ವ್ಯಕ್ತಿಯೂ ಕ್ಷಣಾರ್ಧದಲ್ಲಿ ಕೋಟ್ಯಧಿಪತಿಯಾಗಬಲ್ಲ!
ಇಷ್ಟೊಂದು ದೊಡ್ಡ ಪ್ರಮಾಣದ ಸಂಪತ್ತು ನಮ್ಮ ಕಣ್ಣಮುಂದೆಯೇ ಇದ್ದರೂ ಅದನ್ನು ಹೊರತೆಗೆಯಲು ಸಾಧ್ಯವಾಗದಿರಲು ಎರಡು ಪ್ರಮುಖ ತಾಂತ್ರಿಕ ಸವಾಲುಗಳಿವೆ. ಮೊದಲನೆಯದಾಗಿ, ಸಮುದ್ರದ ನೀರಿನಲ್ಲಿ ಚಿನ್ನವು ಅತಿ ಸೂಕ್ಷ್ಮ ಕಣಗಳ ರೂಪದಲ್ಲಿ ಕರಗಿದೆ. ಒಂದು ಲೀಟರ್ ನೀರಿನಲ್ಲಿರುವ ಈ ಚಿನ್ನವನ್ನು ಬೇರ್ಪಡಿಸಲು ತಗಲುವ ಸಂಸ್ಕರಣಾ ವೆಚ್ಚವು ಆ ಚಿನ್ನದ ಮಾರುಕಟ್ಟೆ ಬೆಲೆಗಿಂತಲೂ ಹತ್ತಾರು ಪಟ್ಟು ಹೆಚ್ಚಾಗಿರುತ್ತದೆ. ಅಂದರೆ, ಒಂದು ರೂಪಾಯಿ ಚಿನ್ನಕ್ಕಾಗಿ ನೂರು ರೂಪಾಯಿ ಖರ್ಚು ಮಾಡುವ ಅನಿವಾರ್ಯತೆ ನಮಗಿದೆ.
ಎರಡನೆಯದಾಗಿ, ಸಮುದ್ರದ ತಳಭಾಗದ ಬಂಡೆಗಳಲ್ಲಿ ಅಡಗಿರುವ ಚಿನ್ನದ ಗಣಿಗಳು ಸುಮಾರು 1 ರಿಂದ 2 ಮೈಲಿಗಳಷ್ಟು ಆಳದಲ್ಲಿವೆ. ಅಷ್ಟು ಆಳದ ಒತ್ತಡವನ್ನು ತಡೆದುಕೊಂಡು ಗಣಿಗಾರಿಕೆ ಮಾಡುವಂತಹ ರೋಬೋಟಿಕ್ ತಂತ್ರಜ್ಞಾನ ಮನುಷ್ಯನಿಗೆ ಇನ್ನೂ ಪೂರ್ಣ ಪ್ರಮಾಣದಲ್ಲಿ ಸಿದ್ಧವಾಗಿಲ್ಲ. ಆದರೂ, ವಿಜ್ಞಾನಿಗಳು ನಿರಂತರ ಸಂಶೋಧನೆಯಲ್ಲಿ ತೊಡಗಿದ್ದು, ಭವಿಷ್ಯದಲ್ಲಿ ತಂತ್ರಜ್ಞಾನ ಬೆಳೆದಂತೆ ಈ ‘ಸಾಗರ ರತ್ನ’ ಮನುಕುಲದ ಕೈಸೇರುವ ಸಾಧ್ಯತೆ ಇದೆ.
