ಸ್ಯಾಂಡಲ್ವುಡ್ನ ಪ್ರತಿಭಾವಂತ ನಟಿ ಚೈತ್ರಾ ಜೆ. ಆಚಾರ್ ಕಾಲಿವುಡ್ ಸೂಪರ್ ಸ್ಟಾರ್ ಧನುಷ್ ಜೊತೆ ನಟಿಸುವ ಸುವರ್ಣಾವಕಾಶ ಕೂದಲೆಳೆ ಅಂತರದಲ್ಲಿ ಕೈತಪ್ಪಿ ಹೋಗಿದೆ. ‘ಸಪ್ತ ಸಾಗರದಾಚೆ ಎಲ್ಲೋ’ ಸಿನಿಮಾದ ಅಭಿನಯದ ಮೂಲಕ ಗಮನ ಸೆಳೆದಿದ್ದ ಚೈತ್ರಾ, ರಾಷ್ಟ್ರ ಪ್ರಶಸ್ತಿ ವಿಜೇತ ಧನುಷ್ ಅವರ ‘ಕರ’ ಸಿನಿಮಾಗೆ ನಾಯಕಿಯಾಗಿ ಆಯ್ಕೆಯಾಗಿದ್ದರು. ಶೂಟಿಂಗ್ ಹಂತದವರೆಗೂ ತಲುಪಿದ್ದ ಈ ದೊಡ್ಡ ಆಫರ್ ಕೊನೆ ಕ್ಷಣದಲ್ಲಿ ಕೈಬಿಟ್ಟು ಹೋಗಿರುವುದು ಅವರ ಅಭಿಮಾನಿಗಳಿಗೆ ತೀವ್ರ ಬೇಸರ ತಂದಿದೆ. ಆದರೆ ಈ ಬದಲಾವಣೆಯ ಹಿಂದೆ ಒಂದು ವಿಚಿತ್ರವಾದ ಕಾರಣ ಅಡಗಿದೆ.
‘ಪೋರ್ ತೊಳಿಲ್’ ಖ್ಯಾತಿಯ ನಿರ್ದೇಶಕ ವಿಘ್ನೇಶ್ ರಾಜಾ ಅವರು ಚೈತ್ರಾ ಆಚಾರ್ ‘ಕರ’ ಸಿನಿಮಾಗೆ ಫೈನಲ್ ಮಾಡಿ ಲುಕ್ ಟೆಸ್ಟ್ ಕೂಡ ನಡೆಸಿದ್ದರು. ಎಲ್ಲವೂ ಅಂದುಕೊಂಡಂತೆ ಸಾಗುತ್ತಿತ್ತು, ಆದರೆ ಚೈತ್ರಾ ಈಗಾಗಲೇ ನಟಿಸಿರುವ ‘ಮೈ ಲಾರ್ಡ್’ ಸಿನಿಮಾ ಈ ಅವಕಾಶಕ್ಕೆ ಅಡ್ಡಿಯಾಗಿದೆ. ‘ಮೈ ಲಾರ್ಡ್’ ಚಿತ್ರದಲ್ಲಿ ಚೈತ್ರಾ ಗೆಟಪ್ ಹೇಗಿತ್ತೋ, ಅದೇ ಮಾದರಿಯ ಲುಕ್ ‘ಕರ’ ಚಿತ್ರಕ್ಕೂ ಬೇಕಿತ್ತು. ಒಂದೇ ರೀತಿಯ ಲುಕ್ ಹೊಂದಿರುವ ಎರಡು ಸಿನಿಮಾಗಳು ಅಕ್ಕಪಕ್ಕದಲ್ಲೇ ಬಿಡುಗಡೆಯಾದರೆ ಪ್ರೇಕ್ಷಕರಿಗೆ ನಾಯಕಿಯ ಪಾತ್ರದಲ್ಲಿ ಹೊಸತನ ಕಾಣಿಸುವುದಿಲ್ಲ ಎಂಬ ಕಾರಣಕ್ಕೆ ನಿರ್ದೇಶಕರು ಅನಿವಾರ್ಯವಾಗಿ ನಾಯಕಿಯನ್ನು ಬದಲಿಸಲು ನಿರ್ಧರಿಸಿದರು.
ಚೈತ್ರಾ ಆಚಾರ್ ಅವರಿಂದ ತೆರವಾದ ಈ ಸ್ಥಾನಕ್ಕೆ ಈಗ ಮಲಯಾಳಂನ ‘ಪ್ರೇಮಲು’ ಬೆಡಗಿ ಮಮಿತಾ ಬೈಜು ಆಯ್ಕೆಯಾಗಿದ್ದಾರೆ. ಸದಾ ಬಬ್ಲಿ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಮಮಿತಾ ಅವರಿಗೆ ಇದು ಸೀರಿಯಸ್ ಆಕ್ಷನ್ ಥ್ರಿಲ್ಲರ್ ಆಗಿದ್ದು, ಧನುಷ್ ಎದುರು ನಟಿಸುವ ಚಾನ್ಸ್ ಗಿಟ್ಟಿಸಿಕೊಂಡಿದ್ದಾರೆ. ಏಪ್ರಿಲ್ 30ರಂದು ಅದ್ಧೂರಿಯಾಗಿ ತೆರೆಕಾಣಲಿರುವ ‘ಕರ’ ಸಿನಿಮಾದಲ್ಲಿ ಧನುಷ್ ಜೊತೆ ಸೂರಜ್ ವೆಂಜಾರಮೂಡು ಮತ್ತು ಜಯರಾಮ್ ಅಂತಹ ದಿಗ್ಗಜ ಕಲಾವಿದರು ನಟಿಸುತ್ತಿದ್ದು, ಜಿ.ವಿ. ಪ್ರಕಾಶ್ ಕುಮಾರ್ ಸಂಗೀತ ನೀಡುತ್ತಿದ್ದಾರೆ.
ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ ಎಂಬಂತೆ ಚೈತ್ರಾ ಆಚಾರ್ ಅವರಿಗೆ ಧನುಷ್ ಕಾಂಬಿನೇಶನ್ ಮಿಸ್ ಆಗಿರಬಹುದು. ಆದರೆ ಅವರ ನಟನಾ ಕೌಶಲಕ್ಕೆ ಪರಭಾಷಾ ಚಿತ್ರರಂಗದಲ್ಲಿ ಈಗಾಗಲೇ ಬೇಡಿಕೆ ಸೃಷ್ಟಿಯಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಇದಕ್ಕಿಂತ ದೊಡ್ಡ ಅವಕಾಶಗಳು ಅವರನ್ನು ಹುಡುಕಿಕೊಂಡು ಬರುವುದರಲ್ಲಿ ಸಂಶಯವಿಲ್ಲ. ಸದ್ಯಕ್ಕೆ ಈ ಸೀಕ್ರೆಟ್ ಕಹಾನಿ ಗಾಂಧಿನಗರ ಮತ್ತು ಕಾಲಿವುಡ್ ಅಂಗಳದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
