ಕೇರಳ: ವಿಧಾನಸಭಾ ಚುನಾವಣೆಯ ಕಣ ರಂಗೇರುತ್ತಿದ್ದು, ಬಿಜೆಪಿ ತನ್ನ ಮೂರನೇ ಅಭ್ಯರ್ಥಿಗಳ ಪಟ್ಟಿಯನ್ನು ಬಿಡುಗಡೆ ಮಾಡುವ ಮೂಲಕ ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದೆ. ಈ ಪಟ್ಟಿಯಲ್ಲಿ 11 ಕ್ಷೇತ್ರಗಳ ಅಭ್ಯರ್ಥಿಗಳನ್ನು ಘೋಷಿಸಲಾಗಿದ್ದು, ಇದರೊಂದಿಗೆ ಬಿಜೆಪಿ ಇದುವರೆಗೆ ಒಟ್ಟು 97 ಕ್ಷೇತ್ರಗಳಿಗೆ ತನ್ನ ಅಭ್ಯರ್ಥಿಗಳನ್ನು ಅಂತಿಮಗೊಳಿಸಿದಂತಾಗಿದೆ. ಇತ್ತೀಚೆಗಷ್ಟೇ ಕಾಂಗ್ರೆಸ್ ತೊರೆದು ಬಿಜೆಪಿ ಸೇರಿದ್ದ ಪ್ರಭಾವಿ ನಾಯಕರಿಗೆ ಟಿಕೆಟ್ ನೀಡುವ ಮೂಲಕ ಕೇಸರಿ ಪಡೆ ಹಳೆಯ ಪಕ್ಷಗಳಿಗೆ ಟಕ್ಕರ್ ನೀಡಲು ಸಜ್ಜಾಗಿದೆ.
ಕಾಂಗ್ರೆಸ್ನಲ್ಲಿ ಅಭ್ಯರ್ಥಿಗಳ ಆಯ್ಕೆ ವಿಚಾರವಾಗಿ ಅಸಮಾಧಾನಗೊಂಡು ಬಿಜೆಪಿಗೆ ಬಂದಿದ್ದ ಬಿ.ಎಸ್. ಅನೂಪ್ ಮತ್ತು ಆರ್.ಎಸ್. ಅರುಣ್ ರಾಜ್ ಅವರಿಗೆ ಬಿಜೆಪಿ ಮಣೆ ಹಾಕಿದೆ. ಚಿರಯಿನ್ಕೀಳ್ ಕ್ಷೇತ್ರದಿಂದ ಬಿ.ಎಸ್. ಅನೂಪ್ ಹಾಗೂ ಚಡಯಮಂಗಲಂನಿಂದ ಅರುಣ್ ರಾಜ್ ಎನ್ಡಿಎ ಅಭ್ಯರ್ಥಿಗಳಾಗಿ ಕಣಕ್ಕಿಳಿಯಲಿದ್ದಾರೆ. ರಮ್ಯಾ ಹರಿದಾಸ್ ಅವರ ಆಯ್ಕೆಯನ್ನು ವಿರೋಧಿಸಿ ಕಾಂಗ್ರೆಸ್ಗೆ ಕೈಕೊಟ್ಟಿದ್ದ ಅನೂಪ್, ಇದೀಗ ಕಮಲ ಪಾಳಯದ ಮೂಲಕ ಅಖಾಡಕ್ಕಿಳಿಯುತ್ತಿರುವುದು ಕುತೂಹಲ ಮೂಡಿಸಿದೆ. ಇವರಿಬ್ಬರಿಗೂ ಬಿಜೆಪಿ ರಾಜ್ಯಾಧ್ಯಕ್ಷ ರಾಜೀವ್ ಚಂದ್ರಶೇಖರ್ ಅವರೇ ಪಕ್ಷದ ಸದಸ್ಯತ್ವ ನೀಡಿ ಸ್ವಾಗತಿಸಿದ್ದರು.
ಇನ್ನುಳಿದ ಕ್ಷೇತ್ರಗಳ ಪೈಕಿ ಪೀರುಮೇಡುವಿನಿಂದ ವಿ. ರತೀಶ್, ಪುದುಪ್ಪಳ್ಳಿಯಿಂದ ರವೀಂದ್ರನಾಥ್ ವಾಕತ್ತಾನಂ ಮತ್ತು ಮಾವೇಲಿಕ್ಕರದಿಂದ ಅಜಿಮೋನ್ ಸ್ಪರ್ಧಿಸಲಿದ್ದಾರೆ. ಅಡೂರ್ ಕ್ಷೇತ್ರಕ್ಕೆ ಪಂಡಲಮ್ ಪ್ರತಾಪನ್, ಚಾವರಕ್ಕೆ ಕೆ.ಆರ್. ರಾಜೇಶ್, ಅರುವಿಕ್ಕರಕ್ಕೆ ವಿವೇಕ್ ಗೋಪನ್ ಹಾಗೂ ನೆಯ್ಯಾಟ್ಟಿನ್ಕರ ಕ್ಷೇತ್ರಕ್ಕೆ ರಾಜಶೇಖರನ್ ನಾಯರ್ ಅವರನ್ನು ಅಭ್ಯರ್ಥಿಗಳನ್ನಾಗಿ ಘೋಷಿಸಲಾಗಿದೆ. ಆರ್ಜೆಡಿ ತೊರೆದು ಐಎಸ್ಜೆಡಿ ಸೇರಿದ್ದ ಟಿ.ಎನ್. ಸುರೇಶ್ ಅವರಿಗೆ ಕೋವಳಂ ಕ್ಷೇತ್ರದಿಂದ ಸ್ಪರ್ಧಿಸಲು ಅವಕಾಶ ಕಲ್ಪಿಸಲಾಗಿದೆ. ಎಡಪಕ್ಷದ ಅಭ್ಯರ್ಥಿಯಾಗುವ ಆಸೆಯಿಂದ ಆರ್ಜೆಡಿ ಬಿಟ್ಟಿದ್ದ ಸುರೇಶ್, ಕೊನೆಗೆ ಎನ್ಡಿಎ ಮೈತ್ರಿಕೂಟದ ಅಭ್ಯರ್ಥಿಯಾಗಿ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ.
ರಾಜಧಾನಿ ತಿರುವನಂತಪುರಂ ಸೆಂಟ್ರಲ್ ಕ್ಷೇತ್ರದಲ್ಲಿ ಬಿಜೆಪಿ ಅಚ್ಚರಿಯ ನಿರ್ಧಾರ ಕೈಗೊಂಡಿದೆ. ಎಲ್ಡಿಎಫ್ ತೊರೆದಿದ್ದ ಮಾಜಿ ಸಚಿವ ಸುರೇಂದ್ರನ್ ಪಿಳ್ಳೈ ಅವರ ಹೆಸರನ್ನು ಪರಿಗಣಿಸದೆ, ಪಕ್ಷದ ನಿಷ್ಠಾವಂತ ನಾಯಕ ಕರಮನ ಜಯನ್ ಅವರಿಗೆ ಟಿಕೆಟ್ ನೀಡಲಾಗಿದೆ. ಜಯನ್ ಅವರ ಸಂಘಟನಾ ಶಕ್ತಿ ಮತ್ತು ಕ್ಷೇತ್ರದಲ್ಲಿ ಅವರಿಗಿರುವ ಜನಪ್ರಿಯತೆಯನ್ನು ಗಮನದಲ್ಲಿಟ್ಟುಕೊಂಡು ಹೈಕಮಾಂಡ್ ಈ ತೀರ್ಮಾನ ತೆಗೆದುಕೊಂಡಿದೆ ಎಂದು ಹೇಳಲಾಗುತ್ತಿದೆ. ಒಟ್ಟಾರೆಯಾಗಿ, ವಲಸೆ ಬಂದ ನಾಯಕರು ಮತ್ತು ನಿಷ್ಠಾವಂತ ಕಾರ್ಯಕರ್ತರ ಮಿಶ್ರಣದೊಂದಿಗೆ ಬಿಜೆಪಿ ಕೇರಳದಲ್ಲಿ ಪ್ರಬಲ ಪೈಪೋಟಿ ನೀಡಲು ಸಿದ್ಧತೆ ನಡೆಸಿದೆ.
