98ನೇ ಆಸ್ಕರ್ ಸಂಭ್ರಮ: ಆಸ್ಕರ್ ಅಖಾಡದಲ್ಲಿ ಯಾರಿಗೆ ಎಷ್ಟು ಪ್ರಶಸ್ತಿ?
ಹಾಲಿವುಡ್ನ ಡಾಲ್ಬಿ ಥಿಯೇಟರ್ನಲ್ಲಿ ಅತ್ಯಂತ ವೈಭವಯುತವಾಗಿ ಜರುಗಿದ 98ನೇ ಅಕಾಡೆಮಿ ಪ್ರಶಸ್ತಿ ಪ್ರದಾನ ಸಮಾರಂಭವು ಸಿನಿಮಾ ರಂಗದ ಹೊಸ ದಾಖಲೆಗಳಿಗೆ ಸಾಕ್ಷಿಯಾಯಿತು.
ಈ ಬಾರಿಯ ಸಮಾರಂಭವನ್ನು ಖ್ಯಾತ ನಿರೂಪಕ ಕಾನನ್ ಒ’ಬ್ರೇನ್ ನಡೆಸಿಕೊಟ್ಟರೆ, ಭಾರತದ ಹೆಮ್ಮೆಯ ನಟಿ ಪ್ರಿಯಾಂಕಾ ಚೋಪ್ರಾ ಅವರು ಜೇವಿಯರ್ ಬಾರ್ಡೆಮ್ ಅವರೊಂದಿಗೆ ವೇದಿಕೆ ಹಂಚಿಕೊಂಡು ಅತ್ಯುತ್ತಮ ಅಂತರರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯನ್ನು ಪ್ರದಾನ ಮಾಡಿದ್ದು ವಿಶೇಷವಾಗಿತ್ತು. ಭಾರತೀಯ ಕಾಲಮಾನ ಮುಂಜಾನೆ 4:30ಕ್ಕೆ ಆರಂಭವಾದ ಈ ಕಾರ್ಯಕ್ರಮವು ಜಗತ್ತಿನಾದ್ಯಂತ ಸಿನಿಮಾ ಪ್ರೇಮಿಗಳ ಗಮನ ಸೆಳೆಯಿತು.
ಈ ವರ್ಷದ ಆಸ್ಕರ್ ಅಖಾಡದಲ್ಲಿ ‘ಒನ್ ಬ್ಯಾಟಲ್ ಆಫ್ಟರ್ ಅನದರ್’ (One Battle After Another) ಚಿತ್ರವು ಅಕ್ಷರಶಃ ಪಾರಮ್ಯ ಮೆರೆದಿದೆ. ಅತ್ಯುತ್ತಮ ಚಿತ್ರ ಎಂಬ ಅತ್ಯುನ್ನತ ಗೌರವದ ಜೊತೆಗೆ, ಅತ್ಯುತ್ತಮ ನಿರ್ದೇಶಕ,ಅತ್ಯುತ್ತಮ ಪಾತ್ರವರ್ಗ, ಅತ್ಯುತ್ತಮ ಪೋಷಕ ನಟಿ, ಅತ್ಯುತ್ತಮ ರೂಪಾಂತರಿತ ಚಿತ್ರಕಥೆ ಮತ್ತು ಅತ್ಯುತ್ತಮ ಸಂಕಲನ ವಿಭಾಗ ಸೇರಿದಂತೆ ಒಟ್ಟು ಆರು ಪ್ರಶಸ್ತಿಗಳನ್ನು ತನ್ನದಾಗಿಸಿಕೊಂಡು ರಾತ್ರಿಯ ಅತಿದೊಡ್ಡ ವಿಜೇತ ಚಿತ್ರವಾಗಿ ಹೊರಹೊಮ್ಮಿದೆ.
ಮತ್ತೊಂದೆಡೆ, ಬ್ಲ್ಯಾಕ್ ಪ್ಯಾಂಥರ್ ಖ್ಯಾತಿಯ ರಯಾನ್ ಕೂಗ್ಲರ್ ನಿರ್ದೇಶನದ ‘ಸಿನ್ನರ್ಸ್’ ಚಿತ್ರವು 16 ವಿಭಾಗಗಳಲ್ಲಿ ನಾಮನಿರ್ದೇಶನಗೊಂಡು ಭಾರಿ ಕುತೂಹಲ ಮೂಡಿಸಿತ್ತಾದರೂ, ಅಂತಿಮವಾಗಿ ನಾಲ್ಕು ಪ್ರಶಸ್ತಿಗಳಿಗೆ ತೃಪ್ತಿಪಟ್ಟುಕೊಂಡಿತು. ಈ ಚಿತ್ರಕ್ಕಾಗಿ ಮೈಕೆಲ್ ಬಿ ಜೋರ್ಡಾನ್ ಅತ್ಯುತ್ತಮ ನಟ ಪ್ರಶಸ್ತಿ ಮುಡಿಗೇರಿಸಿಕೊಂಡರೆ, ಅತ್ಯುತ್ತಮ ಮೂಲ ಚಿತ್ರಕಥೆ, ಮೂಲ ಸಂಗೀತ ಮತ್ತು ಅತ್ಯುತ್ತಮ ಛಾಯಾಗ್ರಹಣ ಪ್ರಶಸ್ತಿಗಳು ಈ ಚಿತ್ರದ ಪಾಲಾದವು.
ಅತ್ಯುತ್ತಮ ನಟಿ ವಿಭಾಗದಲ್ಲಿ ತೀವ್ರ ಪೈಪೋಟಿಯ ನಡುವೆಯೂ ಜೆಸ್ಸಿ ಬಕ್ಲಿ ಅವರು ಆಸ್ಕರ್ ಪ್ರಶಸ್ತಿಯನ್ನು ಗೆಲ್ಲುವಲ್ಲಿ ಯಶಸ್ವಿಯಾದರು. ಇನ್ನು ತಾಂತ್ರಿಕ ವಿಭಾಗದಲ್ಲಿ ಮಿಂಚಿದ ‘ಫ್ರಾಂಕೆನ್ಸ್ಟೈನ್’ ಚಿತ್ರವು ಅತ್ಯುತ್ತಮ ವೇಷಭೂಷಣ, ಕೇಶವಿನ್ಯಾಸ ಮತ್ತು ಮೇಕಪ್ ಹಾಗೂ ಅತ್ಯುತ್ತಮ ನಿರ್ಮಾಣ ವಿನ್ಯಾಸ ವಿಭಾಗಗಳಲ್ಲಿ ಒಟ್ಟು ಮೂರು ಪ್ರಶಸ್ತಿಗಳನ್ನು ಗೆದ್ದು, ಈ ಬಾರಿಯ ಮೂರನೇ ಅತಿದೊಡ್ಡ ವಿಜೇತ ಚಿತ್ರವಾಗಿ ಗುರುತಿಸಿಕೊಂಡಿತು. ಒಟ್ಟಾರೆಯಾಗಿ 98ನೇ ಆಸ್ಕರ್ ಸಮಾರಂಭವು ಹೊಸ ಪ್ರತಿಭೆಗಳ ಸಂಭ್ರಮಕ್ಕೆ ವೇದಿಕೆಯಾಯಿತು.
