ಓಲಾ ಎಲೆಕ್ಟ್ರಿಕ್ ಕಂಪನಿಯು ಭಾರತೀಯ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಯಲ್ಲಿ ಎದುರಿಸುತ್ತಿರುವ ಹಿನ್ನಡೆಯು ಉದ್ಯಮ ವಲಯದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ಕೇವಲ ಒಂದು ವರ್ಷದ ಹಿಂದೆ ತನ್ನ ಮಾರಾಟ ಜಾಲವನ್ನು 4,000 ಮಳಿಗೆಗಳಿಗೆ ವಿಸ್ತರಿಸುವ ಮಹತ್ವಾಕಾಂಕ್ಷೆ ಹೊಂದಿದ್ದ ಕಂಪನಿ, ಈಗ ಮಾರಾಟದ ಕುಸಿತದ ಹಿನ್ನೆಲೆ ತನ್ನ ಶೋರೂಂ ಸಂಖ್ಯೆಯನ್ನು ಗಣನೀಯವಾಗಿ ಕಡಿತಗೊಳಿಸಲು ಮುಂದಾಗಿರುವುದು ದೊಡ್ಡ ಬದಲಾವಣೆಯಾಗಿದೆ. ಈಗಾಗಲೇ ತನ್ನ ಮಳಿಗೆಗಳನ್ನು 700ಕ್ಕೆ ಇಳಿಸಿರುವ ಓಲಾ, ಮಾರ್ಚ್ ಅಂತ್ಯದ ವೇಳೆಗೆ ಇದನ್ನು 550ಕ್ಕೆ ಸೀಮಿತಗೊಳಿಸಲು ನಿರ್ಧರಿಸಿದೆ ಎಂದು ವರದಿಯಾಗಿದೆ.
ಆರ್ಥಿಕವಾಗಿ ಓಲಾ ಎಲೆಕ್ಟ್ರಿಕ್ ಭಾರಿ ನಷ್ಟವನ್ನು ಅನುಭವಿಸುತ್ತಿದೆ. ಡಿಸೆಂಬರ್ 31, 2025ಕ್ಕೆ ಅಂತ್ಯಗೊಂಡ ತ್ರೈಮಾಸಿಕದಲ್ಲಿ ಕಂಪನಿಯು 487 ಕೋಟಿ ರೂಪಾಯಿಗಳ ನಿವ್ವಳ ನಷ್ಟವನ್ನು ದಾಖಲಿಸಿದೆ. ವಿಶೇಷವೆಂದರೆ, ಕಂಪನಿಯ ಆದಾಯವು ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇ. 55 ರಷ್ಟು ಕುಸಿದು 470 ಕೋಟಿ ರೂಪಾಯಿಗೆ ತಲುಪಿದೆ. ವಾಹನಗಳ ವಿತರಣೆಯಲ್ಲಿ ಶೇ. 61 ರಷ್ಟು ಭಾರಿ ಇಳಿಕೆಯಾಗಿದ್ದು, ಮಾರುಕಟ್ಟೆಯ ಮೇಲಿನ ಹಿಡಿತ ಸಡಿಲವಾಗುತ್ತಿರುವುದು ಸ್ಪಷ್ಟವಾಗಿ ಕಂಡುಬರುತ್ತಿದೆ.
ಮಾರುಕಟ್ಟೆ ಪಾಲಿನ ವಿಚಾರದಲ್ಲೂ ಓಲಾಗೆ ಭಾರಿ ಹೊಡೆತ ಬಿದ್ದಿದೆ. ಒಂದು ವರ್ಷದ ಹಿಂದೆ ಶೇ. 26 ರಷ್ಟು ಮಾರುಕಟ್ಟೆ ಪಾಲು ಹೊಂದಿದ್ದ ಈ ಕಂಪನಿ, ಈಗ ಕೇವಲ ಶೇ. 6.3ಕ್ಕೆ ಕುಸಿದಿದೆ. ಟಿವಿಎಸ್ ಮೋಟಾರ್, ಬಜಾಜ್ ಆಟೋ ಮತ್ತು ಎಥರ್ ಎನರ್ಜಿಯಂತಹ ಕಂಪನಿಗಳು ನೀಡುತ್ತಿರುವ ಪ್ರಬಲ ಸ್ಪರ್ಧೆ ಹಾಗೂ ಗ್ರಾಹಕರಲ್ಲಿ ಉಂಟಾಗಿರುವ ಅಸಮಾಧಾನವು ಈ ಕುಸಿತಕ್ಕೆ ಪ್ರಮುಖ ಕಾರಣಗಳಾಗಿವೆ. ಫೆಬ್ರವರಿ ತಿಂಗಳ ಮೊದಲ 18 ದಿನಗಳಲ್ಲಿ ಕೇವಲ 2,575 ವಾಹನಗಳು ಮಾರಾಟವಾಗಿರುವುದು ಓಲಾ ಪಾಲಿಗೆ ಎಚ್ಚರಿಕೆಯ ಗಂಟೆಯಾಗಿದೆ.
