ಇಂದಿನ ಕಾಲದಲ್ಲಿ ಸ್ಮಾರ್ಟ್ಫೋನ್ ಕೊಳ್ಳುವಾಗ ನಾವು ಮೊದಲು ಗಮನಿಸುವುದೇ ಅದರ ಕ್ಯಾಮೆರಾ ಮೆಗಾಪಿಕ್ಸೆಲ್. 108 MP ಅಥವಾ 200 MP ಕ್ಯಾಮೆರಾ ಇದ್ದರೆ ಅದೇ ದೊಡ್ಡದು ಎಂದು ನಾವು ಸಂಭ್ರಮಿಸುತ್ತೇವೆ. ಆದರೆ ಪ್ರಕೃತಿ ನಮಗೆ ನೀಡಿರುವ ಎರಡು ಕಣ್ಣುಗಳ ಮುಂದೆ ಜಗತ್ತಿನ ಯಾವುದೇ ದುಬಾರಿ ಕ್ಯಾಮೆರಾಗಳು ಸಾಟಿಯಿಲ್ಲ ಎಂಬುದು ನಿಮಗೆ ಗೊತ್ತೇ?
ಮನುಷ್ಯನ ಕಣ್ಣಿನ 576 ಮೆಗಾಪಿಕ್ಸೆಲ್ ಪವರ್ ಮುಂದೆ ಜಗತ್ತಿನ ಯಾವುದೇ ಕ್ಯಾಮೆರಾ ಶೂನ್ಯ!
ಸಂಶೋಧನೆಗಳ ಪ್ರಕಾರ, ಮನುಷ್ಯನ ಕಣ್ಣುಗಳು ಬರೋಬ್ಬರಿ 576 ಮೆಗಾಪಿಕ್ಸೆಲ್ ಸಾಮರ್ಥ್ಯವನ್ನು ಹೊಂದಿವೆ!ಸಾಮಾನ್ಯವಾಗಿ ಡಿಜಿಟಲ್ ಕ್ಯಾಮೆರಾಗಳು ಒಂದು ನಿರ್ದಿಷ್ಟ ಚೌಕಟ್ಟಿನೊಳಗೆ ಇರುವ ಚಿತ್ರವನ್ನು ಮಾತ್ರ ಸೆರೆಹಿಡಿಯುತ್ತವೆ. ಆದರೆ ನಮ್ಮ ಕಣ್ಣುಗಳು ಸುಮಾರು 180 ಡಿಗ್ರಿಯಷ್ಟು ವಿಶಾಲವಾದ ದೃಶ್ಯವನ್ನು ನೋಡಬಲ್ಲವು. ಈ ಸಂಪೂರ್ಣ ದೃಶ್ಯವನ್ನು ಡಿಜಿಟಲ್ ಪಿಕ್ಸೆಲ್ಗಳಿಗೆ ಹೋಲಿಸಿದರೆ, ಅದರ ಸ್ಪಷ್ಟತೆಯು ಅತ್ಯಾಧುನಿಕ 8K ಟಿವಿಯ ದೃಶ್ಯಕ್ಕಿಂತಲೂ ನೂರಾರು ಪಟ್ಟು ಹೆಚ್ಚಿರುತ್ತದೆ.
ಮನುಷ್ಯ ನಿರ್ಮಿತ ಯಾವುದೇ ಲೆನ್ಸ್ ಇಷ್ಟು ನಿಖರವಾಗಿ ಮತ್ತು ನೈಸರ್ಗಿಕವಾಗಿ ಬಣ್ಣಗಳನ್ನು ಗುರುತಿಸಲು ಸಾಧ್ಯವಿಲ್ಲ.ಇಲ್ಲಿನ ಮತ್ತೊಂದು ರೋಚಕ ಸಂಗತಿಯೆಂದರೆ, ನಮ್ಮ ಕಣ್ಣುಗಳು ಕ್ಯಾಮೆರಾದಂತೆ ಕೇವಲ ಫೋಟೋ ಕ್ಲಿಕ್ ಮಾಡುವುದಿಲ್ಲ. ಬದಲಾಗಿ ಅವು ಮೆದುಳಿಗೆ ನಿರಂತರವಾಗಿ ‘ಲೈವ್ ವಿಡಿಯೋ ಸ್ಟ್ರೀಮಿಂಗ್’ ಮಾಡುತ್ತಿರುತ್ತವೆ. ಕಣ್ಣುಗಳು ಕಳುಹಿಸುವ ಅಸಂಖ್ಯಾತ ಬಿಡಿ ಚಿತ್ರಗಳನ್ನು ನಮ್ಮ ಮೆದುಳು ಅತಿ ವೇಗವಾಗಿ ಸಂಸ್ಕರಿಸಿ ನಮಗೆ ಒಂದು ಸುಂದರವಾದ ಮತ್ತು ಅಡೆತಡೆಯಿಲ್ಲದ ದೃಶ್ಯವನ್ನು ತೋರಿಸುತ್ತದೆ.
ನಮಗೆ ಜಗತ್ತು ಇಷ್ಟು ಸ್ಪಷ್ಟವಾಗಿ ಕಾಣಲು ಕಣ್ಣುಗಳಷ್ಟೇ ಅಲ್ಲ, ನಮ್ಮ ಮೆದುಳಿನ ಕಾರ್ಯಕ್ಷಮತೆಯೂ ಕಾರಣ.ಕತ್ತಲೆಯಲ್ಲಿ ದೃಶ್ಯಗಳನ್ನು ಸೆರೆಹಿಡಿಯಲು ದೊಡ್ಡ ದೊಡ್ಡ ಕ್ಯಾಮೆರಾಗಳು ಪರದಾಡುತ್ತವೆ. ಆದರೆ ನಮ್ಮ ಕಣ್ಣುಗಳು ಕತ್ತಲಿಗೆ ತಕ್ಕಂತೆ ಅದ್ಭುತವಾಗಿ ಹೊಂದಿಕೊಳ್ಳುತ್ತವೆ. ಬೆಳಕು ಕಡಿಮೆಯಾದಾಗ ಕಣ್ಣಿನ ಪಾಪೆಯು ದೊಡ್ಡದಾಗಿ, ಲಭ್ಯವಿರುವ ಅತ್ಯಲ್ಪ ಬೆಳಕನ್ನೂ ಹೀರಿಕೊಂಡು ನಮಗೆ ದಾರಿ ತೋರಿಸುತ್ತದೆ. ಕೋಟಿ ರೂಪಾಯಿ ಬೆಲೆಬಾಳುವ ಕ್ಯಾಮೆರಾಗಳು ನೀಡದ ಈ ಅದ್ಭುತ ಸ್ಪಷ್ಟತೆಯನ್ನು ದೇವರು ನಮಗೆ ಉಚಿತವಾಗಿ ನೀಡಿದ್ದಾನೆ. ಈ ಅಮೂಲ್ಯವಾದ ಕಣ್ಣುಗಳನ್ನು ಜಾಗರೂಕತೆಯಿಂದ ಕಾಪಾಡಿಕೊಳ್ಳುವುದು ನಮ್ಮೆಲ್ಲರ ಕರ್ತವ್ಯ.
