ಬಂಡಾಯ ಶಾಸಕರಿಗೆ TB ಜಯಚಂದ್ರ & HK ಪಾಟೀಲ್ ನೇತೃತ್ವ – ಅಧಿವೇಶನದಲ್ಲಿ ಡಿಕೆಶಿಗೆ ಮುಜುಗರ!
Rebel MLAs led by T.B. Jayachandra & H.K. Patil – Embarrassment for DKSH in the session!
ಬೆಂಗಳೂರು : ರಾಜ್ಯ ಕಾಂಗ್ರೆಸ್ನಲ್ಲಿ ಮತ್ತೊಮ್ಮೆ ಬಂಡಾಯದ ಕಾವು ಜೋರಾಗಿದೆ. ಮುಂದಿನ ವಿಧಾನಸಭಾ ಅಧಿವೇಶನವನ್ನು ಟಾರ್ಗೆಟ್ ಮಾಡಿಕೊಂಡು ಅಸಮಾಧಾನಿತ ಶಾಸಕರು ಹೊಸ ತಂತ್ರ ರೂಪಿಸಿದ್ದಾರೆ. ಈ ಬಂಡಾಯ ಗುಂಪಿಗೆ ಹಿರಿಯ ನಾಯಕರಾದ TB ಜಯಚಂದ್ರ ಮತ್ತು ಹಾಲಿ ಕಾನೂನು ಸಚಿವ H.K ಪಾಟೀಲ್ ನೇತೃತ್ವವಹಿಸಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ.
ಅಧಿವೇಶನದಲ್ಲಿ ಉಪಮುಖ್ಯಮಂತ್ರಿ ಹಾಗೂ KPCC ಅಧ್ಯಕ್ಷ DK ಶಿವಕುಮಾರ್ ಅವರಿಗೆ ಮುಜುಗರ ಉಂಟು ಮಾಡುವ ಉದ್ದೇಶದಿಂದಲೇ ಈ ಚರ್ಚೆ ನಡೆದಿದೆ ಎಂದು ಹೇಳಲಾಗ್ತಿದೆ.
ಬಂಡಾಯ ಶಾಸಕರ ಪ್ರಮುಖ ಬೇಡಿಕೆಗಳು:
- ಸಚಿವ ಸಂಪುಟ ಪುನರ್ ರಚನೆ : ತಕ್ಷಣವೇ ಖಾಲಿ ಇರುವ ಸ್ಥಾನಗಳನ್ನು ಭರ್ತಿ ಮಾಡಬೇಕು
- ನಿಗಮ-ಮಂಡಳಿ : ಮೂಲ ಕಾಂಗ್ರೆಸ್ಸಿಗರಿಗೆ ಆದ್ಯತೆ ನೀಡಬೇಕು. “ಆಮದು” ನಾಯಕರಿಗೆ ಹೆಚ್ಚು ಸ್ಥಾನ ನೀಡುತ್ತಿದ್ದಾರೆ ಎಂಬ ಅಸಮಾಧಾನ
- ಗ್ಯಾರಂಟಿ ಅನುಷ್ಠಾನ : ಕ್ಷೇತ್ರಗಳಿಗೆ ಅನುದಾನ ಬಿಡುಗಡೆಯಲ್ಲಿ ತಾರತಮ್ಯ ಆಗ್ತಿದೆ
ಮೂಲ ಕಾಂಗ್ರೆಸ್ಸಿಗರ ಹಠಕ್ಕೆ ಸುರ್ಜೇವಾಲಾ ಕಂಗಾಲು : ಈ ಬೆಳವಣಿಗೆಯಿಂದ AICC ಉಸ್ತುವಾರಿ ರಂದೀಪ್ ಸುರ್ಜೇವಾಲಾ ಅವರು ಕಂಗಾಲಾಗಿದ್ದಾರೆ. “ಮೂಲ ಕಾಂಗ್ರೆಸ್ಸಿಗರಿಗೆ ಮಣೆ ಹಾಕುತ್ತಿಲ್ಲ” ಎಂದು ಬಹಿರಂಗವಾಗಿಯೇ ಅಸಮಾಧಾನ ಹೊರಹಾಕಿರುವ ಹಲವು ಹಿರಿಯ ಶಾಸಕರು, ಸುರ್ಜೇವಾಲಾ ಅವರು ಮಾತನಾಡಿಸಿದರೂ ಬಗ್ಗುತ್ತಿಲ್ಲ ಎನ್ನಲಾಗಿದೆ.
ಸುರ್ಜೇವಾಲಾ ಅವರು ಈಗಾಗಲೇ 2 ಬಾರಿ ಬೆಂಗಳೂರಿಗೆ ಭೇಟಿ ನೀಡಿ ಶಾಸಕರ ಮನವೊಲಿಸಲು ಯತ್ನಿಸಿದ್ದಾರೆ. ಆದರೆ “ನಮ್ಮ ಮಾತನ್ನು ಕೇಳದಿದ್ದರೆ ಅಧಿವೇಶನದಲ್ಲಿ ಬಹಿರಂಗವಾಗಿ ಪ್ರಶ್ನೆ ಮಾಡುತ್ತೇವೆ” ಎಂದು ಶಾಸಕರು ಖಡಕ್ ಸಂದೇಶ ನೀಡಿದ್ದಾರೆ.
ಸಿದ್ದರಾಮಯ್ಯ ಬಣದ ತಂತ್ರವೇ?
TB ಜಯಚಂದ್ರ ಮತ್ತು HK ಪಾಟೀಲ್ ಇಬ್ಬರೂ ಸಿಎಂ ಸಿದ್ದರಾಮಯ್ಯ ಅವರ ಆಪ್ತ ವಲಯದವರು. ಹಾಗಾಗಿ ಈ ಬಂಡಾಯದ ಹಿಂದೆ ಸಿದ್ದರಾಮಯ್ಯ ಬಣದ ಕೈ ಇದೆ ಮತ್ತು DK ಅವರ ಪ್ರಭಾವ ಕಡಿಮೆ ಮಾಡುವ ತಂತ್ರ ರೂಪಿಸಿದ್ದಾರೆ ಎನ್ನಲಾಗುತ್ತಿದೆ.
ಈ ಬಗ್ಗೆ ಮಾತನಾಡಿದ DK ಶಿವಕುಮಾರ್, “ಕಾಂಗ್ರೆಸ್ನಲ್ಲಿ ಡಿಸಿಪ್ಲಿನ್ ಇದೆ. ಯಾರೂ ಪಕ್ಷಕ್ಕೆ ಮುಜುಗರ ತರಲ್ಲ. ಚುನಾವಣೆ ಹತ್ತಿರ ಬರುತ್ತಿರುವಾಗ ಇಂತಹ ಚರ್ಚೆ ಬೇಡ. ಎಲ್ಲಾ ಸಮಸ್ಯೆಗಳನ್ನು ಹೈಕಮಾಂಡ್ ಜೊತೆ ಚರ್ಚಿಸಿ ಬಗೆಹರಿಸುತ್ತೇವೆ” ಎಂದು ಹೇಳಿದರು.
ಲೋಕಸಭಾ ಚುನಾವಣೆ ಹತ್ತಿರ ಬರುತ್ತಿರುವಾಗ ಕಾಂಗ್ರೆಸ್ನಲ್ಲಿ ಕಾಣಿಸಿಕೊಂಡಿರುವ ಈ ಒಳಜಗಳ ಪಕ್ಷಕ್ಕೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.
