ಚಂದನವನದ ಕಣ್ಮಣಿ ಮಿಲನಾ ನಾಗರಾಜ್ ಇತ್ತೀಚೆಗೆ ತಮ್ಮ 37ನೇ ವರ್ಷದ ಹುಟ್ಟುಹಬ್ಬವನ್ನು ಅತ್ಯಂತ ಸಂಭ್ರಮದಿಂದ ಆಚರಿಸಿಕೊಂಡಿದ್ದು, ಈ ಬಾರಿ ತಮ್ಮ ಆಪ್ತ ಗೆಳೆಯರ ಬಳಗದೊಂದಿಗೆ ಶ್ರೀಲಂಕಾ ಪ್ರವಾಸದಲ್ಲಿದ್ದಾರೆ. ಕಡಲ ತೀರಗಳ ನಾಡು ಶ್ರೀಲಂಕಾದಲ್ಲಿ ತಮ್ಮ ಪತಿ ಡಾರ್ಲಿಂಗ್ ಕೃಷ್ಣ ಹಾಗೂ ಮುದ್ದಾದ ಮಗಳು ಪರಿ ಜೊತೆಗೂಡಿ ಸರಳವಾಗಿ ಕೇಕ್ ಕತ್ತರಿಸುವ ಮೂಲಕ ಈ ವಿಶೇಷ ದಿನವನ್ನು ಮಿಲನಾ ಸ್ಮರಣೀಯವಾಗಿಸಿಕೊಂಡಿದ್ದಾರೆ. ಇವರ ಜೊತೆಯಲ್ಲಿ ನಟಿ ಅಮೃತಾ ಅಯ್ಯಂಗಾರ್ ಸೇರಿದಂತೆ ಹಲವು ಆಪ್ತ ಸ್ನೇಹಿತರು ಕೂಡ ಹಾಜರಿದ್ದು, ಸಮ್ಮರ್ ವೆಕೇಶನ್ ಮೂಡ್ನಲ್ಲಿರುವ ಈ ತಾರಾ ಬಳಗವು ಶ್ರೀಲಂಕಾದ ಸುಂದರ ಕಡಲ ತೀರಗಳಲ್ಲಿ ಎಂಜಾಯ್ ಮಾಡುತ್ತಿರುವ ಫೋಟೋಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ.
ಇನ್ನು ವೈಯಕ್ತಿಕ ಜೀವನದ ಬಗ್ಗೆ ಹೇಳುವುದಾದರೆ, ಏಪ್ರಿಲ್ 25, 1989 ರಂದು ಜನಿಸಿದ ಮಿಲನಾ ಅವರು ಬಹುಕಾಲದ ಗೆಳೆಯ ಹಾಗೂ ನಟ ಡಾರ್ಲಿಂಗ್ ಕೃಷ್ಣ ಅವರನ್ನೇ 2021ರ ಫೆಬ್ರವರಿ 14ರಂದು ವಿವಾಹವಾಗಿದ್ದರು. ಇತ್ತೀಚೆಗಷ್ಟೇ ತೆರೆಕಂಡು ಭರ್ಜರಿ ಯಶಸ್ಸು ಕಂಡಿರುವ ‘ಲವ್ ಮಾಕ್ಟೇಲ್ 3’ ಸಿನಿಮಾದ ಸಂಭ್ರಮದಲ್ಲಿರುವ ಈ ಜೋಡಿ, ಈ ಗೆಲುವಿನ ಬೆನ್ನಲ್ಲೇ ಈ ಬ್ರೇಕ್ ತೆಗೆದುಕೊಂಡಿದ್ದಾರೆ. ಸಿನಿಮಾದ ಯಶಸ್ಸು ಮತ್ತು ಹುಟ್ಟುಹಬ್ಬ ಎರಡನ್ನೂ ಒಟ್ಟಾಗಿ ಆಚರಿಸಲು ಈ ತಂಡವು ಶ್ರೀಲಂಕಾವನ್ನು ಆಯ್ಕೆ ಮಾಡಿಕೊಂಡಿದ್ದು, ಈ ಹಿಂದೆಯೂ ಕೂಡ ಇದೇ ತಂಡ ಈ ಸುಂದರ ದೇಶಕ್ಕೆ ಭೇಟಿ ನೀಡಿದ್ದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು.
ಮಿಲನಾ ನಾಗರಾಜ್ ಅವರ ಸಿನಿ ಪಯಣ ಕೂಡ ಅತ್ಯಂತ ರೋಚಕವಾಗಿದ್ದು, ‘ನಮ್ ದುನಿಯಾ ನಮ್ ಸ್ಟೈಲ್’ ಚಿತ್ರದ ಮೂಲಕ ಅವರು ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದರು. ವಿಶೇಷವೆಂದರೆ ತಮ್ಮ ಮೊದಲ ಚಿತ್ರದಲ್ಲೇ ಡಾರ್ಲಿಂಗ್ ಕೃಷ್ಣ ಅವರಿಗೆ ಜೋಡಿಯಾಗಿದ್ದ ಮಿಲನಾ, ಇಲ್ಲಿಯವರೆಗೆ ಸುಮಾರು 17ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಪ್ರಮುಖವಾಗಿ ‘ಚಾರ್ಲಿ’, ‘ಲವ್ ಮಾಕ್ಟೇಲ್’ ಸರಣಿಯ ಮೂರು ಚಿತ್ರಗಳು, ‘ಮಿಸ್ಟರ್ ಬ್ಯಾಚುಲರ್ಸ್’, ‘ಲವ್ ಬರ್ಡ್ಸ್’ ಹಾಗೂ ‘ಕೌಸಲ್ಯ ಸುಪ್ರಜಾ ರಾಮ’ ಚಿತ್ರಗಳಲ್ಲಿ ಈ ರಿಯಲ್ ಲೈಫ್ ಜೋಡಿ ರೀಲ್ ಲೈಫ್ನಲ್ಲಿಯೂ ಮೋಡಿ ಮಾಡಿದೆ. ಸದ್ಯ ಅವರ ಅಭಿನಯದ ‘ಬೆಲ್ಲ’ ಎನ್ನುವ ಸಿನಿಮಾ ಬಿಡುಗಡೆಗೆ ಸಜ್ಜಾಗಿದ್ದು, ಅಭಿಮಾನಿಗಳು ಈ ಚಿತ್ರಕ್ಕಾಗಿ ಕಾತರದಿಂದ ಕಾಯುತ್ತಿದ್ದಾರೆ.
