ಪಾಕಿಸ್ತಾನದ ಜನತೆಗೆ ವಿದ್ಯುತ್ ಬಿಸಿ: ಬೆಲೆ ಏರಿಕೆ ಮಾಡಿದ ಸರ್ಕಾರ!

ಆರ್ಥಿಕ ಸಂಕಷ್ಟದಿಂದ ತತ್ತರಿಸುತ್ತಿರುವ ಪಾಕಿಸ್ತಾನದ ಜನತೆಗೆ ಅಲ್ಲಿನ ಸರ್ಕಾರ ಇದೀಗ ವಿದ್ಯುತ್ ದರ ಏರಿಕೆ ಮಾಡುವ ಮೂಲಕ ಮತ್ತೊಂದು ದೊಡ್ಡ ಆಘಾತ ನೀಡಿದೆ. ರಾಷ್ಟ್ರೀಯ ವಿದ್ಯುತ್ ನಿಯಂತ್ರಣ ಪ್ರಾಧಿಕಾರವು ಫೆಬ್ರವರಿ 2026ರ ಇಂಧನ ವೆಚ್ಚದ ಹೊಂದಾಣಿಕೆಯನ್ನು ಉಲ್ಲೇಖಿಸಿ, ಪ್ರತಿ ಯೂನಿಟ್ ವಿದ್ಯುತ್ ದರವನ್ನು 1.42 ರೂ.ಗಳಷ್ಟು ಹೆಚ್ಚಿಸಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಇಂಧನ ಬೆಲೆಗಳ ಅನಿಶ್ಚಿತತೆ ಮುಂದುವರಿದಿರುವುದರಿಂದ, ಅಲ್ಲಿನ ಸಾರ್ವಜನಿಕರು ಇಂಧನ ಮತ್ತು ವಿದ್ಯುತ್‌ಗಾಗಿ ಹೆಚ್ಚಿನ ಹಣವನ್ನು ವ್ಯಯಿಸಬೇಕಾದ ಅನಿವಾರ್ಯತೆ ಎದುರಾಗಿದೆ.

ಈ ಬೆಲೆ ಏರಿಕೆಯು ಕೇವಲ ಸಾಮಾನ್ಯ ಜನರ ಮೇಲೆ ಮಾತ್ರವಲ್ಲದೆ, ಈಗಾಗಲೇ ನಷ್ಟದಲ್ಲಿರುವ ಕೈಗಾರಿಕಾ ವಲಯದ ಮೇಲೂ ಗಂಭೀರ ಪರಿಣಾಮ ಬೀರಲಿದೆ ಎಂದು ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ. ಕಳೆದ ಮೂರು ವರ್ಷಗಳಲ್ಲಿ ಪಾಕಿಸ್ತಾನದ ಕೈಗಾರಿಕೆಗಳು ಈಗಾಗಲೇ ಶತಕೋಟಿ ರೂಪಾಯಿಗಳ ಹೊರೆ ಅನುಭವಿಸಿದ್ದು, ಈ ಹೊಸ ಏರಿಕೆಯು ಉದ್ದಿಮೆಗಳ ಅಸ್ತಿತ್ವಕ್ಕೇ ಸವಾಲಾಗುವ ಸಾಧ್ಯತೆಯಿದೆ. ಮೂಲಗಳ ಪ್ರಕಾರ, 2024-25ರ ಹಣಕಾಸು ವರ್ಷದಲ್ಲಿ ಪ್ರಸರಣ ನಷ್ಟ ಮತ್ತು ಅಸಮರ್ಪಕ ಬಿಲ್ ವಸೂಲಾತಿಯಿಂದಾಗಿ ಪಾಕಿಸ್ತಾನದ ವಿದ್ಯುತ್ ವಲಯವು ಈಗಾಗಲೇ ಸುಮಾರು 397 ಶತಕೋಟಿ ರೂಪಾಯಿಗಳ ಭಾರಿ ನಷ್ಟವನ್ನು ಅನುಭವಿಸುತ್ತಿದೆ.