ದಶಕಗಳ ಹಿಂದಿನ ಮಾಜಿ ಪ್ರಧಾನಿ ಹೆಚ್.ಡಿ. ದೇವೇಗೌಡರ ಪದಚ್ಯುತಿಯ ಕುರಿತಾದ ರಹಸ್ಯವೊಂದನ್ನು ಬಿಚ್ಚಿಟ್ಟಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಗೌಡರ ಅಧಿಕಾರ ಉರುಳಲು ಕಾಂಗ್ರೆಸ್ ಕಾರಣವಲ್ಲ, ಬದಲಾಗಿ ಅವರ ‘ಗೂಢಚರ್ಯೆ’ , ಫೋನ್ ಕದ್ದಾಲಿಕೆಯ ಚಾಳಿಯೇ ಕಾರಣ ಎಂದು ಸ್ಫೋಟಕ ಹೇಳಿಕೆ ನೀಡಿದ್ದಾರೆ.
ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರ ಫೋನ್ ಟ್ಯಾಪಿಂಗ್ ಆರೋಪಗಳಿಗೆ ತಿರುಗೇಟು ನೀಡಿದ ಸಿಎಂ, ಕುಮಾರಸ್ವಾಮಿಯವರಿಗೆ ಈ ಫೋನ್ ಕದ್ದಾಲಿಕೆಯ ಪಾಠ ಮಾಡಿದ್ದೇ ಅವರ ತಂದೆ ದೇವೇಗೌಡರು ಇರಬೇಕು ಎಂದು ವ್ಯಂಗ್ಯವಾಡಿದ್ದಾರೆ. ಅಟಲ್ ಬಿಹಾರಿ ವಾಜಪೇಯಿ ಅವರು ಅಧಿಕಾರಕ್ಕೆ ಬರದಂತೆ ತಡೆಯುವ ಉದ್ದೇಶದಿಂದ ಕಾಂಗ್ರೆಸ್ ಬೆಂಬಲದೊಂದಿಗೆ ಗೌಡರು ಪ್ರಧಾನಿಯಾಗಿದ್ದರು, ಆದರೆ ಅಧಿಕಾರ ಸಿಕ್ಕ ಬಳಿಕ ಅವರು ಮಾಡಿದ ಸ್ವಯಂಕೃತ ಅಪರಾಧಗಳೇ ಅವರಿಗೆ ಮುಳುವಾದವು ಎಂದು ವಿಶ್ಲೇಷಿಸಿದ್ದಾರೆ.
ಎಐಸಿಸಿ ಅಧ್ಯಕ್ಷರಾಗಿದ್ದ ಸೀತಾರಾಂ ಕೇಸರಿ ಅವರ ಫೋನ್ ಅನ್ನು ದೇವೇಗೌಡರು ಕದ್ದಾಲಿಕೆ ಮಾಡಿಸಿದ್ದರು ,ಬೆಂಬಲ ನೀಡಿದ್ದ ಕಾಂಗ್ರೆಸ್ ನಾಯಕರ ಮೇಲೆಯೇ ಕಣ್ಣಿಟ್ಟಿದ್ದ ಗೌಡರ ನಡೆಯಿಂದ ಬೇಸತ್ತು ಕಾಂಗ್ರೆಸ್ ಬೆಂಬಲ ವಾಪಸ್ ಪಡೆಯಿತು ಎಂಬ ಇತಿಹಾಸವನ್ನು ಸಿದ್ದರಾಮಯ್ಯ ನೆನಪಿಸಿದ್ದಾರೆ. “ಸೀತಾರಾಂ ಕೇಸರಿ ಬೆನ್ನಿಗೆ ಗೌಡರು ಚೂರಿ ಹಾಕಿದರೇ?” ಎಂಬ ಪ್ರಶ್ನೆಗೆ ಪೂರಕವಾಗಿ ಮಾತನಾಡಿದ ಸಿಎಂ, ದೇವೇಗೌಡರು ಅಂದು ಗೂಢಚರ್ಯೆ ಮಾಡದೇ ಹೋಗಿದ್ದರೆ ಅವರ ಪ್ರಧಾನಿ ಪಟ್ಟಕ್ಕೆ ಯಾವುದೇ ಅಪಾಯವಿರುತ್ತಿರಲಿಲ್ಲ . ಡಿ.ಕೆ. ಶಿವಕುಮಾರ್ ವಿರುದ್ಧ ಕುಮಾರಸ್ವಾಮಿ ಮಾಡುತ್ತಿರುವ ಫೋನ್ ಟ್ಯಾಪಿಂಗ್ ಆರೋಪಗಳಿಗೆ ಈ ಮೂಲಕ ಸಿಎಂ ತಾರ್ಕಿಕವಾಗಿ ತಿರುಗೇಟು ನೀಡಿದ್ದಾರೆ.
ರಾಜಕೀಯ ಜಟಾಪಟಿಯಲ್ಲಿ ಫೋನ್ ಟ್ಯಾಪಿಂಗ್ ವಿಚಾರ ಈಗ ದಶಕಗಳ ಹಿಂದಿನ ಹಳೆಯ ಇತಿಹಾಸವನ್ನು ಕೆದಕುವಂತೆ ಮಾಡಿದೆ. ಕುಮಾರಸ್ವಾಮಿಯವರು ಸದಾ ಬೇರೆಯವರ ಮೇಲೆ ಗೂಢಚರ್ಯೆಯ ಆರೋಪ ಮಾಡುತ್ತಾರೆ, ಆದರೆ ಇಂತಹ ವಿದ್ಯೆಯನ್ನು ಅವರು ತಮ್ಮ ಮನೆಯಲ್ಲೇ ಕಲಿತಿದ್ದಾರೆ ಎಂಬುದು ಸಿದ್ದರಾಮಯ್ಯ ಅವರ ವಾದದ ಸಾರಾಂಶವಾಗಿದೆ. ಈ ಹೇಳಿಕೆಯು ಈಗ ರಾಜ್ಯ ರಾಜಕೀಯದಲ್ಲಿ ಹೊಸ ಸಂಚಲನ ಮೂಡಿಸಿದ್ದು, ಜೆಡಿಎಸ್ ನಾಯಕರು ಇದಕ್ಕೆ ಯಾವ ರೀತಿ ಪ್ರತಿಕ್ರಿಯಿಸುತ್ತಾರೆ ಎಂಬುದು ಕುತೂಹಲಕಾರಿಯಾಗಿದೆ.
