ಬಾಯಾರಿದ ಮರಿಯಾನೆಗೆ ನೀರು ಕುಡಿಸಿದ ಯುವಕ; ಕೃತಜ್ಞತೆ ಸಲ್ಲಿಸಿದ ಗಜಪಡೆ.
ಪ್ರಾಣಿಗಳು ಮನುಷ್ಯರಿಗಿಂತಲೂ ಮಿಗಿಲಾದ ಕೃತಜ್ಞತಾ ಭಾವವನ್ನು ಹೊಂದಿರುತ್ತವೆ ಎಂಬುದಕ್ಕೆ ಸಾಕ್ಷಿಯಾಗಿ ತಾಯಾನೆಯೊಂದು ತನ್ನ ಮರಿಯ ಬಾಯಾರಿಕೆ ನೀಗಿಸಿದ ಯುವಕನಿಗೆ ಧನ್ಯವಾದ ಅರ್ಪಿಸಿದ ಹೃದಯಸ್ಪರ್ಶಿ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ‘ಯೋಗ್’ ಎಂಬ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋದಲ್ಲಿ, ಮಾವುತನ ಜೊತೆ ರಸ್ತೆಯಲ್ಲಿ ಸಾಗುತ್ತಿದ್ದ ತಾಯಿ ಮತ್ತು ಮರಿಯಾನೆಯ ದೃಶ್ಯವಿದೆ. ಈ ಸಂದರ್ಭದಲ್ಲಿ ತೀವ್ರ ಬಾಯಾರಿಕೆಯಿಂದ ಬಳಲುತ್ತಿದ್ದ ಮರಿಯಾನೆಯು, ರಸ್ತೆ ಬದಿಯ ಗಿಡಗಳಿಗೆ ಪೈಪ್ ಮೂಲಕ ನೀರು ಹಾಕುತ್ತಿದ್ದ ಯುವಕನ ಬಳಿ ಓಡೋಡಿ ಹೋಗಿದೆ. ಆ ಯುವಕ ಕೂಡ ಪ್ರೀತಿಯಿಂದ ಪೈಪ್ ಅನ್ನು ಮರಿಯಾನೆಯ ಬಾಯಿಗಿಟ್ಟು ಅದರ ಬಾಯಾರಿಕೆ ತಣಿಸಿದ್ದಾನೆ.
ಮರಿಯಾನೆಯು ತೃಪ್ತಿಯಿಂದ ನೀರು ಕುಡಿದ ನಂತರ, ಅದರ ಜೊತೆಯಲ್ಲಿದ್ದ ತಾಯಾನೆಯು ಯುವಕನ ಈ ಕರುಣಾಜನಕ ಕಾರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸುವಂತೆ ತನ್ನ ಸೊಂಡಿಲೆತ್ತಿ ಧನ್ಯವಾದ ಅರ್ಪಿಸಿದೆ. ಏಪ್ರಿಲ್ 1 ರಂದು ಹಂಚಿಕೊಳ್ಳಲಾದ ಈ ವಿಡಿಯೋ ಈಗಾಗಲೇ 2.1 ಮಿಲಿಯನ್ ಪ್ರೇಕ್ಷಕರನ್ನು ಸೆಳೆದಿದ್ದು, ನೆಟ್ಟಿಗರು ಆನೆಯ ಈ ಸಂಸ್ಕಾರ ಮತ್ತು ತಾಯಿ ಪ್ರೀತಿಯನ್ನು ಮುಕ್ತಕಂಠದಿಂದ ಶ್ಲಾಘಿಸುತ್ತಿದ್ದಾರೆ. ಮನುಷ್ಯರಿಗಿಂತ ಪ್ರಾಣಿಗಳೇ ಗುಣದಲ್ಲಿ ಮೇಲು ಎಂದು ಹಲವರು ಕಾಮೆಂಟ್ ಮಾಡಿದ್ದು, ಈ ದೃಶ್ಯವು ಪ್ರಾಣಿ ಮತ್ತು ಮನುಷ್ಯರ ನಡುವಿನ ಸುಂದರ ಬಾಂಧವ್ಯಕ್ಕೆ ಸಾಕ್ಷಿಯಾಗಿದೆ. ಬಿಸಿಲಿನ ತಾಪಕ್ಕೆ ಬಾಯಾರಿದ್ದ ಮೂಕ ಪ್ರಾಣಿಗೆ ನೀರು ನೀಡಿದ ಯುವಕನ ಕಾರ್ಯವು ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.
