ಜಾಗತಿಕ ಯುದ್ಧದ ಪರಿಸ್ಥಿತಿಯು ಈಗ ಭಾರತದ ಕಾಂಡೋಮ್ ಉದ್ಯಮದ ಮೇಲೂ ಗಂಭೀರ ಪರಿಣಾಮ ಬೀರಿದ್ದು, ಉತ್ಪಾದನಾ ವೆಚ್ಚದಲ್ಲಿ ಭಾರಿ ಏರಿಕೆಯಾಗಿದೆ. ಕಾಂಡೋಮ್ ತಯಾರಿಕೆಗೆ ಅತ್ಯಗತ್ಯವಾಗಿ ಬೇಕಾಗಿರುವ ಅಮೋನಿಯಾ ರಾಸಾಯನಿಕದ ಕೊರತೆಯಿಂದಾಗಿ ಈ ಬಿಕ್ಕಟ್ಟು ಸೃಷ್ಟಿಯಾಗಿದ್ದು, ಮುಂಬರುವ ದಿನಗಳಲ್ಲಿ ಕಾಂಡೋಮ್ ಬೆಲೆಗಳು ಶೇಕಡಾ 40 ರಿಂದ 50 ರಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ. ಭಾರತವು ತನ್ನ ಅಮೋನಿಯಾ ಅಗತ್ಯದ ಶೇಕಡಾ 86 ರಷ್ಟು ಭಾಗವನ್ನು ಸೌದಿ ಅರೇಬಿಯಾ ಮತ್ತು ಕತಾರ್ನಂತಹ ದೇಶಗಳಿಂದ ಆಮದು ಮಾಡಿಕೊಳ್ಳುತ್ತಿದೆ. ಆದರೆ, ಯುದ್ಧದ ಕಾರಣದಿಂದಾಗಿ ಹರ್ಮುಜ್ ಬಂದರು ಮೂಲಕ ನಡೆಯುವ ಪೂರೈಕೆಯು ಬಹುತೇಕ ಸ್ಥಗಿತಗೊಂಡಿರುವುದು ತಯಾರಿಕಾ ಕಂಪನಿಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.
ಭಾರತದಲ್ಲಿ ಕಾಂಡೋಮ್ ವಹಿವಾಟು ವಾರ್ಷಿಕವಾಗಿ 14 ಸಾವಿರ ಕೋಟಿ ರೂಪಾಯಿಗಳಿಗಿಂತಲೂ ಅಧಿಕವಾಗಿದ್ದು, ಬೆಲೆ ಏರಿಕೆಯು ಮ್ಯಾನ್ಕೈಂಡ್ ಫಾರ್ಮಾ, ಎಚ್ಎಲ್ಎಲ್ ಲೈಫ್ ಕೇರ್ ಮತ್ತು ಕ್ಯುಪಿಡ್ ಲಿಮಿಟೆಡ್ನಂತಹ ಪ್ರಮುಖ ಕಂಪನಿಗಳ ಮೇಲೆ ನೇರ ಹೊರೆ ಬೀರಲಿದೆ. ಕಚ್ಚಾ ವಸ್ತುಗಳ ಪೂರೈಕೆಯಲ್ಲಿನ ವ್ಯತ್ಯಯದಿಂದಾಗಿ ಉತ್ಪಾದನಾ ವೆಚ್ಚವು ಗಣನೀಯವಾಗಿ ಹೆಚ್ಚಾಗುತ್ತಿದ್ದು, ಇದು ಅಂತಿಮವಾಗಿ ಗ್ರಾಹಕರ ಜೇಬಿಗೆ ಕತ್ತರಿ ಹಾಕಲಿದೆ. ಕಾಂಡೋಮ್ ಪ್ಯಾಕೆಟ್ಗಳ ಬೆಲೆ ಒಂದೂವರೆ ಪಟ್ಟಿನಷ್ಟು ದುಬಾರಿಯಾಗುವ ಭೀತಿ ಎದುರಾಗಿದ್ದು, ಜನಸಂಖ್ಯಾ ನಿಯಂತ್ರಣ ಮತ್ತು ಆರೋಗ್ಯ ಜಾಗೃತಿಯ ದೃಷ್ಟಿಯಿಂದ ಇದು ಕಳವಳಕಾರಿ ಸಂಗತಿಯಾಗಿದೆ. ಯುದ್ಧದ ಬಿಸಿಯು ಅನಿವಾರ್ಯವಾಗಿ ಅಗತ್ಯ ವಸ್ತುಗಳ ಪಟ್ಟಿಗೆ ಸೇರಿದ ಈ ಉತ್ಪನ್ನದ ಮೇಲೆಯೂ ಸವಾರಿ ಮಾಡುತ್ತಿದೆ.
