ವಿಜಯಪತ್ ಸಿಂಘಾನಿಯಾ (87) ಅವರು ಶನಿವಾರ ಸಂಜೆ ಮುಂಬೈನಲ್ಲಿ ನಿಧನರಾಗಿದ್ದಾರೆ. ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದ ಅವರು ಮಾರ್ಚ್ 28ರಂದು ಇಹಲೋಕ ತ್ಯಜಿಸಿದ್ದು, ಅವರ ಅಂತ್ಯಸಂಸ್ಕಾರವು ಭಾನುವಾರ ಮಧ್ಯಾಹ್ನ ಮುಂಬೈನ ಚಂದನವಾಡಿಯಲ್ಲಿ ನೆರವೇರಲಿದೆ. ಅವರ ಪುತ್ರ ಹಾಗೂ ರೇಮಂಡ್ ಗ್ರೂಪ್ನ ಹಾಲಿ ಮುಖ್ಯಸ್ಥ ಗೌತಮ್ ಸಿಂಘಾನಿಯಾ ಈ ವಿಷಯವನ್ನು ಸಾಮಾಜಿಕ ಜಾಲತಾಣದ ಮೂಲಕ ಖಚಿತಪಡಿಸಿದ್ದಾರೆ.
1980ರಲ್ಲಿ ರೇಮಂಡ್ ಸಂಸ್ಥೆಯ ಚುಕ್ಕಾಣಿ ಹಿಡಿದ ವಿಜಯಪತ್ ಅವರು, ಕೇವಲ ಎರಡು ದಶಕಗಳಲ್ಲಿ ಸಂಸ್ಥೆಯನ್ನು ಕೇವಲ ಟೆಕ್ಸ್ಟೈಲ್ ಕ್ಷೇತ್ರಕ್ಕೆ ಸೀಮಿತಗೊಳಿಸದೆ ಸಿಮೆಂಟ್, ಉಕ್ಕು ಮತ್ತು ಸಿಂಥೆಟಿಕ್ ಫ್ಯಾಬ್ರಿಕ್ಸ್ನಂತಹ ವಿವಿಧ ಕ್ಷೇತ್ರಗಳಿಗೆ ವಿಸ್ತರಿಸುವ ಮೂಲಕ ಸಂಸ್ಥೆಗೆ ಹೊಸ ಎತ್ತರ ನೀಡಿದ್ದರು. 2000ನೇ ಇಸವಿಯಲ್ಲಿ ತಮ್ಮಲ್ಲಿದ್ದ ಶೇ. 37ರಷ್ಟು ಪಾಲನ್ನು ಪುತ್ರ ಗೌತಮ್ ಸಿಂಘಾನಿಯಾ ಅವರಿಗೆ ಹಸ್ತಾಂತರಿಸಿ ನಿವೃತ್ತಿ ಹೊಂದಿದ್ದರು. ಉದ್ಯಮ ಲೋಕದ ಯಶಸ್ಸಿನ ಜೊತೆಗೆ ವಿಜಯಪತ್ ಅವರು ಅಪ್ರತಿಮ ಸಾಹಸಿಯೂ ಆಗಿದ್ದರು. ವಿಮಾನ ಹಾರಾಟದಲ್ಲಿ ಅಪಾರ ಆಸಕ್ತಿ ಹೊಂದಿದ್ದ ಅವರು 5,000ಕ್ಕೂ ಹೆಚ್ಚು ಗಂಟೆಗಳ ಕಾಲ ಹಾರಾಟ ನಡೆಸಿದ ಅನುಭವ ಹೊಂದಿದ್ದರು.
ಅವರ ಸಾಹಸಗಳಲ್ಲಿ ಪ್ರಮುಖವಾಗಿ 67ನೇ ವಯಸ್ಸಿನಲ್ಲಿ ಹಾಟ್ ಏರ್ ಬಲೂನ್ ಮೂಲಕ 69,000 ಅಡಿ ಎತ್ತರಕ್ಕೆ ಹಾರುವ ಮೂಲಕ ಜಾಗತಿಕ ದಾಖಲೆ ಬರೆದಿದ್ದು ಮತ್ತು 1988ರಲ್ಲಿ ಲಂಡನ್ನಿಂದ ದೆಹಲಿಯವರೆಗೆ ಒಬ್ಬರೇ ಮೈಕ್ರೋಲೈಟ್ ಫ್ಲೈಟ್ನಲ್ಲಿ 23 ದಿನಗಳ ಕಾಲ ಪ್ರಯಾಣ ಬೆಳೆಸಿದ್ದು ಸೇರಿವೆ. ಇವರ ಈ ಅದ್ವಿತೀಯ ಸಾಧನೆಗಳನ್ನು ಗುರುತಿಸಿ ಭಾರತೀಯ ವಾಯುಪಡೆಯು ಗೌರವ ಸಲ್ಲಿಸಿತ್ತು. ಉದ್ಯಮ ಮತ್ತು ಸಾಹಸ ಎರಡರಲ್ಲೂ ಅಳಿಸಲಾಗದ ಛಾಪು ಮೂಡಿಸಿರುವ ಸಿಂಘಾನಿಯಾ ಅವರ ನಿರ್ಗಮನವು ಕಾರ್ಪೊರೇಟ್ ಜಗತ್ತಿಗೆ ದೊಡ್ಡ ನಷ್ಟವಾಗಿದೆ.
