ಬೆಳಗಾವಿ: ಪತಿಯ ಮೇಲಿನ ಅನುಮಾನದಿಂದ ಪತಿಯ ಮೇಲೆ ಪತ್ನಿ ಕಾದ ಅಡುಗೆ ಎಣ್ಣೆಯನ್ನು ಸುರಿದು ಹತ್ಯೆಗೆ ಯತ್ನಿಸಿದ ಘಟನೆ ಬೆಳಗಾವಿ ತಾಲೂಕಿನ ಮಚ್ಚೆ ಗ್ರಾಮದ ರಾಮನಗರದಲ್ಲಿ ನಡೆದಿದೆ.. ಪತಿ ಸುಭಾಷ ಪಾಟೀಲ್ ಮೇಲೆ ಪತ್ನಿ ವೈಶಾಲಿ ಪಾಟೀಲ್ ಎಣ್ಣೆ ಸುರಿದ ಹಿನ್ನೆಲೆ ಗಂಭೀರವಾಗಿ ಗಾಯಗೊಂಡಿದ್ದು, ಆಸ್ಪತ್ರೆಯಲ್ಲಿ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದಾರೆ.
ಸುಭಾಷ್ ಪಾಟೀಲ್ ಸಿಲಿಂಡರ್ ವಿತರಣೆಯ ಕೆಲಸ ಮಾಡುತ್ತಿದ್ದರು. ದಿನನಿತ್ಯದ ಕೆಲಸ ಮುಗಿಸಿ ಮನೆಗೆ ವಾಪಸಾದ ಸುಭಾಷ್, ರಾತ್ರಿಯ ಊಟಕ್ಕೆ ಕುಳಿತಿದ್ದ ವೇಳೆ ಈ ಘಟನೆ ನಡೆದಿದೆ. ವೈಶಾಲಿ, ತನ್ನ ಪತಿಯ ಮೇಲೆ ಬೇರೆ ಮಹಿಳೆಯೊಂದಿಗೆ ಅನೈತಿಕ ಸಂಬಂಧ ಇಟ್ಟುಕೊಂಡಿದ್ದಾನೆ ಎಂದು ಸಂಶಯಗೊಂಡಿದ್ದರು. ಈ ಸಂಶಯದಿಂದಾಗಿ, ಹಲವಾರು ವರ್ಷಗಳಿಂದ ದಂಪತಿಗಳ ನಡುವೆ ಸಂಸಾರದ ಕಲಹ ಮುಂದುವರೆದಿತ್ತು.
ಆದರೆ, ಈ ಬಾರಿ ವೈಶಾಲಿಯ ಕೋಪ ತಾರಕಕ್ಕೇರಿ, ಏಕಾಏಕಿ ಕಾದಿರುವ ಅಡುಗೆ ಎಣ್ಣೆಯನ್ನು ಪತಿಯ ತಲೆಯ ಮೇಲೆ ಸುರಿದಿದ್ದಾರೆ. ಬಿಸಿ ಎಣ್ಣೆಯಿಂದ ತೀವ್ರವಾಗಿ ಸುಟ್ಟುಹೋಗಿರುವ ಸುಭಾಷ್, ಕೂಡಲೇ ಸ್ಥಳೀಯ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ವೈದ್ಯರು ಅವರ ಸ್ಥಿತಿ ಗಂಭೀರವಾಗಿದೆ ಎಂದು ತಿಳಿಸಿದ್ದಾರೆ.
ವೈಶಾಲಿಯ ಈ ಕೃತ್ಯವು ಕೇವಲ ಕೋಪದಿಂದ ಉಂಟಾದುದೇ, ಅಥವಾ ಯೋಜಿತವಾಗಿ ನಡೆದ ಕೊಲೆ ಯತ್ನವೇ ಎಂಬುದನ್ನು ಪೊಲೀಸರು ತನಿಖೆಯ ಮೂಲಕ ಕಂಡುಹಿಡಿಯಲಿದ್ದಾರೆ. ಸದ್ಯಕ್ಕೆ, ವೈಶಾಲಿಯನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದು, ಆಕೆಯ ವಿರುದ್ಧ ಕೊಲೆ ಯತ್ನದ ಆರೋಪದಡಿ ಪ್ರಕರಣ ದಾಖಲಾಗಿದೆ.
