ಖಾಸಗಿ ಸ್ವಾಮ್ಯದ ಶೆಲ್ ಪೆಟ್ರೋಲ್ ಬಂಕ್ಗಳು ಗ್ರಾಹಕರಿಗೆ ಸತತವಾಗಿ ದರ ಏರಿಕೆಯ ಶಾಕ್ ನೀಡುತ್ತಿದ್ದು, ಕಳೆದ 15 ದಿನಗಳಲ್ಲಿ ನಾಲ್ಕನೇ ಬಾರಿಗೆ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಳ ಮಾಡಲಾಗಿದೆ. ಈ ಹೊಸ ಪರಿಷ್ಕರಣೆಯ ನಂತರ ಸಾಮಾನ್ಯ ಪೆಟ್ರೋಲ್ ದರ ಲೀಟರ್ಗೆ 7 ರೂಪಾಯಿ ಏರಿಕೆಯಾಗಿ 119.8 ರೂಪಾಯಿಗೆ ತಲುಪಿದ್ದರೆ, ಪ್ರೀಮಿಯಂ ಪೆಟ್ರೋಲ್ ಬೆಲೆ ಲೀಟರ್ಗೆ 129.8 ರೂಪಾಯಿಯ ಗಡಿ ದಾಟಿದೆ. ಇಂಧನ ಕೊರತೆಯ ವದಂತಿಗಳ ನಡುವೆಯೇ ನಡೆದಿರುವ ಈ ಬೆಲೆ ಏರಿಕೆಯು ಖಾಸಗಿ ಬಂಕ್ಗಳನ್ನು ಅವಲಂಬಿಸಿರುವ ವಾಹನ ಸವಾರರಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.
ಇನ್ನು ಡೀಸೆಲ್ ದರದಲ್ಲಂತೂ ಕಲ್ಪನಾತೀತ ಏರಿಕೆ ಕಂಡುಬಂದಿದ್ದು, ಸಾಮಾನ್ಯ ಡೀಸೆಲ್ ಬೆಲೆ ಒಂದೇ ಬಾರಿಗೆ ಲೀಟರ್ಗೆ 25 ರೂಪಾಯಿಗಳಷ್ಟು ದುಬಾರಿಯಾಗಿ 123 ರೂಪಾಯಿಗೆ ಏರಿಕೆಯಾಗಿದೆ. ನಾಲ್ಕು ದಿನಗಳ ಹಿಂದಷ್ಟೇ 98 ರೂಪಾಯಿ ಇದ್ದ ಡೀಸೆಲ್ ದರ ಈಗ ಶತಕ ದಾಟಿ ಮುನ್ನುಗ್ಗುತ್ತಿರುವುದು ಸಾರಿಗೆ ವಲಯಕ್ಕೆ ದೊಡ್ಡ ಹೊಡೆತ ನೀಡಿದೆ. ಅದೇ ರೀತಿ ಪ್ರೀಮಿಯಂ ಡೀಸೆಲ್ ಬೆಲೆಯೂ ಲೀಟರ್ಗೆ 133 ರೂಪಾಯಿಗೆ ಏರಿಕೆಯಾಗಿದ್ದು, ಸರ್ಕಾರಿ ಸ್ವಾಮ್ಯದ ಬಂಕ್ಗಳಿಗಿಂತ ಶೆಲ್ ಬಂಕ್ಗಳಲ್ಲಿ ಇಂಧನ ದರ ಗಣನೀಯವಾಗಿ ಹೆಚ್ಚಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ. ಬೆಲೆ ಏರಿಕೆಯ ಈ ಸರಣಿಯು ಸಾಮಾನ್ಯ ಜನರ ಮಾಸಿಕ ಬಜೆಟ್ ಮೇಲೆ ತೀವ್ರ ಪರಿಣಾಮ ಬೀರುತ್ತಿದೆ.
