ಮನಸ್ಸಿದ್ದರೆ ಮಾರ್ಗ ಮತ್ತು ಕಠಿಣ ಪರಿಶ್ರಮಕ್ಕೆ ಯಾವುದೂ ಅಡ್ಡಿಯಲ್ಲ ಎಂಬುದಕ್ಕೆ ಈ ಮಹಿಳಾ ಬಸ್ ಕಂಡಕ್ಟರ್ ಅವರ ಕಥೆ ಅತ್ಯುತ್ತಮ ಉದಾಹರಣೆಯಾಗಿದೆ. ಜೀವನದ ಜವಾಬ್ದಾರಿಗಳ ನಡುವೆಯೂ ತಮ್ಮ ಕನಸನ್ನು ಬೆನ್ನತ್ತಿರುವ ಈಕೆಯ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದ್ದು, ಸಾವಿರಾರು ಜನರಿಗೆ ಸ್ಫೂರ್ತಿ ನೀಡುತ್ತಿದೆ.
ಕೆಲಸದ ಒತ್ತಡ ಮತ್ತು ಸತತ ಓಡಾಟದ ನಡುವೆ ಸಿಗುವ ಅಲ್ಪ ಸಮಯವನ್ನೂ ವ್ಯರ್ಥ ಮಾಡದ ಈ ಮಹಿಳಾ ಕಂಡಕ್ಟರ್, ಬಸ್ಸಿನಲ್ಲಿಯೇ ಪುಸ್ತಕ ಹಿಡಿದು ಅಭ್ಯಾಸ ಮಾಡುತ್ತಿರುವುದು ಪ್ರಯಾಣಿಕರೊಬ್ಬರ ಗಮನ ಸೆಳೆದಿದೆ. ಕಚೇರಿಯ ಕೆಲಸ ಮುಗಿಸಿ ಸುಸ್ತಾಗಿ ಮನೆಗೆ ಮರಳುತ್ತಿದ್ದ ವರ್ಷಿಣಿ ಎಂಬುವವರು, ಬಸ್ಸಿನಲ್ಲಿ ಈ ದೃಶ್ಯವನ್ನು ಕಂಡು ಬೆರಗಾಗಿದ್ದಾರೆ. ತಕ್ಷಣವೇ ಈ ಸ್ಫೂರ್ತಿದಾಯಕ ಕ್ಷಣವನ್ನು ತಮ್ಮ ಮೊಬೈಲ್ನಲ್ಲಿ ಸೆರೆಹಿಡಿದು ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದಾರೆ.
ಅವಳು ಎಲ್ಲವನ್ನೂ ಸಾಧಿಸಲು ನಿರ್ಧರಿಸಿದರೆ ಅವಳನ್ನು ಯಾರೂ ತಡೆಯಲು ಸಾಧ್ಯವಿಲ್ಲ ಎಂಬ ಶೀರ್ಷಿಕೆಯಡಿ ಈ ವಿಡಿಯೋ ಪೋಸ್ಟ್ ಮಾಡಲಾಗಿದೆ. ವಿಡಿಯೋ ಮಾಡಿದವರು ಮಹಿಳೆಯ ಗೌಪ್ಯತೆಯನ್ನು ಕಾಪಾಡಲು ಅವರ ಮುಖವನ್ನು ತೋರಿಸಿಲ್ಲವಾದರೂ, ಅವರ ಶ್ರದ್ಧೆ ಮತ್ತು ಓದಿನ ಮೇಲಿರುವ ಆಸಕ್ತಿಯನ್ನು ಜಗತ್ತಿಗೆ ಪರಿಚಯಿಸಿದ್ದಾರೆ. “ನಾನು ಸುಸ್ತಾಗಿದ್ದಾಗ ಈಕೆಯನ್ನು ನೋಡಿ ಹೊಸ ಚೈತನ್ಯ ಬಂತು, ಯಾವುದೇ ನೆಪ ಹೇಳದೆ ಈಕೆ ತನ್ನ ಕನಸಿಗಾಗಿ ಓದುತ್ತಿರುವುದು ಯುವ ಮನಸ್ಸುಗಳಿಗೆ ಮಾದರಿ” ಎಂದು ವರ್ಷಿಣಿ ಬರೆದುಕೊಂಡಿದ್ದಾರೆ.
ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆಯೇ ನೆಟ್ಟಿಗರಿಂದ ಪ್ರಶಂಸೆಯ ಮಹಾಪೂರವೇ ಹರಿದುಬರುತ್ತಿದೆ. “ಸಮರ್ಪಣೆ ಎಂದರೆ ಇದೇ”, “ಪ್ರತಿ ನಿಮಿಷವನ್ನು ಸದುಪಯೋಗಪಡಿಸಿಕೊಳ್ಳುತ್ತಿರುವ ಈಕೆಗೆ ಒಂದು ಸಲಾಂ” ಎಂದು ಬಳಕೆದಾರರು ಕಾಮೆಂಟ್ ಮಾಡುತ್ತಿದ್ದಾರೆ. ಸವಲತ್ತುಗಳಿದ್ದೂ ಓದದವರ ಮಧ್ಯೆ, ಜವಾಬ್ದಾರಿಗಳ ನಡುವೆಯೂ ಜ್ಞಾನಕ್ಕಾಗಿ ಹಾತೊರೆಯುತ್ತಿರುವ ಈ ಮಹಿಳೆ ನಿಜಕ್ಕೂ ಇಂದಿನ ಯುವ ಪೀಳಿಗೆಗೆ ದೊಡ್ಡ ಸ್ಫೂರ್ತಿಯಾಗಿದ್ದಾರೆ.
