ಟೀಮ್ ಇಂಡಿಯಾದ ಪ್ರತಿಭಾವಂತ ಆಟಗಾರ ಹಾಗೂ ಮೈದಾನದಲ್ಲಿನ ತನ್ನ ಸೌಮ್ಯ ಸ್ವಭಾವಕ್ಕೆ ಹೆಸರಾದ ಸಂಜು ಸ್ಯಾಮ್ಸನ್, ಇದೀಗ ತಮ್ಮ ಉದಾರತೆಯ ಮೂಲಕ ಕ್ರಿಕೆಟ್ ಅಭಿಮಾನಿಗಳ ಹೃದಯ ಗೆದ್ದಿದ್ದಾರೆ. ಪಾಲಕ್ಕಾಡ್ನ ಬಸ್ ನಿಲ್ದಾಣವೊಂದರ ಬಳಿ ಸಂಜು ಸ್ಯಾಮ್ಸನ್ ಅವರು ಸೆಲ್ಫಿ ಕೇಳಲು ಬಂದ ಅಭಿಮಾನಿಯೊಬ್ಬರಿಗೆ ಹೊಸ ಮೊಬೈಲ್ ಫೋನ್ ಉಡುಗೊರೆಯಾಗಿ ನೀಡುವ ಮೂಲಕ ಸುದ್ದಿಯಾಗಿದ್ದಾರೆ. ಕದಂಬಜಿಪುರಂ ಮೂಲದ ಶಬರೀಶ್ ಎಂಬ ಯುವಕನು ಸಂಜು ಸ್ಯಾಮ್ಸನ್ ಅವರ ರೇಂಜ್ ರೋವರ್ ಕಾರನ್ನು ಕಂಡು ಅವರೊಂದಿಗೆ ಸೆಲ್ಫಿ ತೆಗೆದುಕೊಳ್ಳಲು ಓಡಿ ಬಂದಿದ್ದನು. ಈ ವೇಳೆ ಶಬರೀಶ್ ಕೈಯಲ್ಲಿದ್ದ ಮೊಬೈಲ್ ಫೋನ್ನ ಡಿಸ್ಪ್ಲೇ ಸಂಪೂರ್ಣವಾಗಿ ಒಡೆದಿರುವುದನ್ನು ಸಂಜು ಗಮನಿಸಿದರು.
ಯುವಕನ ಸ್ಥಿತಿಯನ್ನು ಕಂಡು ಮರುಗಿದ ಸಂಜು ಸ್ಯಾಮ್ಸನ್, ತಕ್ಷಣವೇ ತಮ್ಮ ಕಾರಿನಲ್ಲಿದ್ದ ಸುಮಾರು 40 ಸಾವಿರ ರೂಪಾಯಿ ಮೌಲ್ಯದ ಹೊಸ ಸ್ಮಾರ್ಟ್ಫೋನ್ ಅನ್ನು ತೆಗೆದು ಆತನಿಗೆ ಉಡುಗೊರೆಯಾಗಿ ನೀಡಿದರು. ಅಷ್ಟೇ ಅಲ್ಲದೆ, ಅಲ್ಲೇ ಕ್ರಿಕೆಟ್ ಆಡುತ್ತಿದ್ದ ಆ ಯುವಕನಿಗೆ ಚೆನ್ನಾಗಿ ಅಭ್ಯಾಸ ಮಾಡಿ ಉತ್ತಮವಾಗಿ ಕ್ರಿಕೆಟ್ ಆಡುವಂತೆ ಪ್ರೋತ್ಸಾಹದ ಮಾತುಗಳನ್ನು ಹೇಳಿ ಅಲ್ಲಿಂದ ಹೊರಟಿದ್ದಾರೆ. ಈ ಅನಿರೀಕ್ಷಿತ ಉಡುಗೊರೆಯಿಂದ ಶಬರೀಶ್ ದಂಗಾಗಿದ್ದು, ಸ್ಟಾರ್ ಆಟಗಾರನೊಬ್ಬನ ಈ ಸರಳತೆ ಮತ್ತು ಮಾನವೀಯತೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದೆ.
ಪ್ರಸ್ತುತ ಐಪಿಎಲ್ 2026ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡವನ್ನು ಪ್ರತಿನಿಧಿಸುತ್ತಿರುವ ಸಂಜು ಸ್ಯಾಮ್ಸನ್, ಪಂದ್ಯಾವಳಿಯ ಬಿಡುವಿನ ವೇಳೆಯಲ್ಲಿ ತಮ್ಮ ಊರಿಗೆ ಬಂದಿದ್ದಾಗ ಈ ಘಟನೆ ನಡೆದಿದೆ. ಮೈದಾನದ ಹೊರಗೆ ಸಂಜು ತೋರಿರುವ ಈ ಕರುಣಾಮಯಿ ನಡವಳಿಕೆಯು “ಸಂಜು ಕೇವಲ ಉತ್ತಮ ಆಟಗಾರನಲ್ಲ, ಅದಕ್ಕಿಂತ ಮಿಗಿಲಾದ ಉತ್ತಮ ವ್ಯಕ್ತಿ” ಎಂಬುದನ್ನು ಸಾಬೀತುಪಡಿಸಿದೆ. ಈ ಘಟನೆಯ ಫೋಟೋಗಳು ಮತ್ತು ಮಾಹಿತಿ ಈಗ ಅಂತರ್ಜಾಲದಲ್ಲಿ ವೈರಲ್ ಆಗುತ್ತಿದ್ದು, ಅಭಿಮಾನಿಗಳು ಸಂಜು ಸ್ಯಾಮ್ಸನ್ ಅವರ ಫಾರ್ಮ್ ಮತ್ತು ಉಜ್ವಲ ಭವಿಷ್ಯಕ್ಕಾಗಿ ಹಾರೈಸುತ್ತಿದ್ದಾರೆ.
