ಬೆಂಗಳೂರಿನಲ್ಲಿ ಹೊಸತೊಡಕಿನ ಅಬ್ಬರ; ಮಾಂಸಕ್ಕಾಗಿ ಮುಗಿಬಿದ್ದ ಜನಜಂಗುಳಿ!
ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಯುಗಾದಿ ಹಬ್ಬದ ಸಂಭ್ರಮ ಸಡಗರದ ಬೆನ್ನಲ್ಲೇ ಹೊಸತೊಡಕಿನ ಅಬ್ಬರ ಜೋರಾಗಿದೆ. ಯುಗಾದಿಯ ಮರುದಿನ ಆಚರಿಸಲಾಗುವ ಈ ಹೊಸತೊಡಕಿಗಾಗಿ ಮಾಂಸಪ್ರಿಯರು ಮುಂಜಾನೆಯಿಂದಲೇ ಸನ್ನದ್ಧರಾಗಿದ್ದು, ನಗರದ ವಿವಿಧ ಭಾಗಗಳಲ್ಲಿರುವ ಚಿಕನ್ ಮತ್ತು ಮಟನ್ ಸ್ಟಾಲ್ಗಳ ಮುಂದೆ ಜನಜಂಗುಳಿ ನಿರ್ಮಾಣವಾಗಿದೆ. ಬೆಳ್ಳಂಬೆಳಗ್ಗೆ ಚಳಿ ಎನ್ನದೆ ಸಾಲಿನಲ್ಲಿ ನಿಂತು ತಮಗೆ ಬೇಕಾದ ಮಾಂಸವನ್ನು ಖರೀದಿಸುತ್ತಿರುವ ದೃಶ್ಯಗಳು ಎಲ್ಲೆಡೆ ಸಾಮಾನ್ಯವಾಗಿದೆ.
ಗ್ರಾಹಕರ ಈ ಭಾರೀ ಬೇಡಿಕೆಯನ್ನು ಗಮನದಲ್ಲಿಟ್ಟುಕೊಂಡು ಮಾಂಸದ ವ್ಯಾಪಾರಿಗಳು ಮುನ್ನೆಚ್ಚರಿಕಾ ಕ್ರಮವಾಗಿ ಬೇರೆ ಬೇರೆ ರಾಜ್ಯ ಹಾಗೂ ಜಿಲ್ಲೆಗಳಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಕುರಿ, ಮೇಕೆ, ನಾಟಿ ಕೋಳಿ ಮತ್ತು ಫಾರಂ ಕೋಳಿಗಳನ್ನು ತರಿಸಿಕೊಂಡಿದ್ದಾರೆ. ನಸುಕಿನ 5 ಗಂಟೆಯಿಂದಲೇ ವ್ಯಾಪಾರ ವಹಿವಾಟು ಆರಂಭವಾಗಿದ್ದು, ಅಂಗಡಿಗಳ ಮುಂದೆ ಕಿಲೋಮೀಟರ್ಗಟ್ಟಲೆ ಉದ್ದದ ಕ್ಯೂ ಕಂಡುಬರುತ್ತಿದೆ. ಬೇಡಿಕೆ ಹೆಚ್ಚಾದಂತೆ ದರದಲ್ಲೂ ಏರಿಕೆಯಾಗಿದ್ದು, ಪ್ರಸ್ತುತ ಮಟನ್ ದರ ಪ್ರತಿ ಕೆಜಿಗೆ 900 ರೂಪಾಯಿಗಳ ಗಡಿಯನ್ನು ದಾಟಿರುವುದು ವರದಿಯಾಗಿದೆ.
ಹೆಚ್ಚಿನ ದರವಿದ್ದರೂ ಲೆಕ್ಕಿಸದ ಜನತೆ ಹೊಸತೊಡಕಿನ ಅಂಗವಾಗಿ ಭರ್ಜರಿ ಬಾಡೂಟ ಸವಿಯಲು ಸಿದ್ಧತೆ ನಡೆಸುತ್ತಿದ್ದಾರೆ. ಮಾಂಸದಂಗಡಿಗಳ ಮಾಲೀಕರಿಗೆ ಇಂದು ಸುಗ್ಗಿಯ ಕಾಲವಾಗಿದ್ದು, ವ್ಯಾಪಾರ ಭರ್ಜರಿಯಾಗಿ ಸಾಗುತ್ತಿದೆ. ಜನರು ತಮಗೆ ಬೇಕಾದ ಮಾಂಸವನ್ನು ಖರೀದಿಸಿ ಮನೆಗೆ ತಂದು ವಿವಿಧ ಬಗೆಯ ಮಾಂಸದ ಅಡುಗೆಗಳನ್ನು ತಯಾರಿಸಿ, ಕುಟುಂಬದವರೊಂದಿಗೆ ಸೇರಿ ವರ್ಷದ ಮೊದಲ ಬಾಡೂಟವನ್ನು ಸವಿಯುವ ತಯಾರಿಯಲ್ಲಿದ್ದಾರೆ.