ಕುಂಭಮೇಳದ ಹುಡುಗಿ ಈಗ ಬಾಲಿವುಡ್ ಹೀರೋಯಿನ್;ದಿ ಡೈರಿ ಆಫ್ ಮಣಿಪುರ್
ಮಹಾಕುಂಭಮೇಳದ ಮಣಿ ಸರ ಮಾರುವ ಹುಡುಗಿಯಿಂದ – ಬಾಲಿವುಡ್ ಹೀರೋಯಿನ್ ವರೆಗೆ, ಮೊನಾಲಿಸಾ ಭೋಸ್ಲೆ ಅವರ ಅಚ್ಚರಿಯ ಯಾನವಿದು. ಸೋಶಿಯಲ್ ಮೀಡಿಯಾದಲ್ಲಿ ರಾತ್ರೋರಾತ್ರಿ ವೈರಲ್ ಆಗುವವರೆಲ್ಲ ಯಶಸ್ಸು ಕಾಣುವುದಿಲ್ಲ ಎಂಬ ಮಾತನ್ನು ಸುಳ್ಳು ಮಾಡಿರುವ ಮೊನಾಲಿಸಾ, ಈಗ ತಮ್ಮ ಮೊದಲ ಹಿಂದಿ ಸಿನಿಮಾ ‘ದಿ ಡೈರಿ ಆಫ್ ಮಣಿಪುರ್’ ಚಿತ್ರೀಕರಣವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ. ಈ ಚಿತ್ರದ ಮೂಲಕ ಅವರು ಬೆಳ್ಳಿತೆರೆಗೆ ಅದ್ಧೂರಿ ಪ್ರವೇಶ ನೀಡಲು ಸಜ್ಜಾಗಿದ್ದಾರೆ.
ಕಳೆದ ವರ್ಷ ಮಹಾಕುಂಭಮೇಳದಲ್ಲಿ ಮಣಿ ಸರಗಳನ್ನು ಮಾರುತ್ತಿದ್ದ ಮೊನಾಲಿಸಾ ಅವರ ಸೌಂದರ್ಯ ಮತ್ತು ಸರಳತೆಗೆ ನೆಟ್ಟಿಗರು ಮಾರುಹೋಗಿದ್ದರು. ಆ ಫೋಟೋಗಳು ಮತ್ತು ವಿಡಿಯೋಗಳು ವೈರಲ್ ಆದ ಬೆನ್ನಲ್ಲೇ ಅವರಿಗೆ ಸಿನಿಮಾರಂಗದಿಂದ ಅವಕಾಶಗಳ ಮಹಾಪೂರವೇ ಹರಿದುಬಂದಿತ್ತು. ಈ ಅವಕಾಶವನ್ನು ಸರಿಯಾಗಿ ಬಳಸಿಕೊಂಡ ಮೊನಾಲಿಸಾ, ನಟನೆಯ ತರಬೇತಿ ಪಡೆದು ಕ್ಯಾಮೆರಾ ಎದುರಿಸಲು ಸಿದ್ಧರಾದರು. ವಿಶೇಷವೆಂದರೆ, ಈ ಸಿನಿಮಾದಲ್ಲಿ ಬಾಲಿವುಡ್ ಖ್ಯಾತ ನಟ ರಾಜ್ಕುಮಾರ್ ರಾವ್ ಅವರ ಸಹೋದರ ಅಮಿತ್ ರಾವ್ ಅವರು ಮೊನಾಲಿಸಾ ಜೊತೆ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.
ಸನೋಜ್ ಮಿಶ್ರಾ ನಿರ್ದೇಶನದ ಈ ಸಿನಿಮಾಗೆ ಅನೇಕ ಸವಾಲುಗಳು ಎದುರಾಗಿದ್ದವು. ಚಿತ್ರದ ಕೆಲಸಗಳು ಆರಂಭವಾದಾಗ ನಿರ್ದೇಶಕರ ಮೇಲೆ ಹಲವಾರು ಆರೋಪಗಳನ್ನು ಹೊರಿಸಿ ಅಡ್ಡಿಪಡಿಸಲಾಗಿತ್ತು. ಆದರೆ, ಎಲ್ಲವನ್ನೂ ಮೆಟ್ಟಿನಿಂತ ಚಿತ್ರತಂಡವು ನಾಲ್ಕು ಹಂತಗಳಲ್ಲಿ ಶೂಟಿಂಗ್ ಪೂರ್ಣಗೊಳಿಸಿದೆ. ಉತ್ತರ ಪ್ರದೇಶ, ಮಣಿಪುರ, ನೇಪಾಳ ಮತ್ತು ಡೆಹರಾಡೂನ್ನ ಸುಂದರ ತಾಣಗಳಲ್ಲಿ ಚಿತ್ರೀಕರಣ ನಡೆಸಲಾಗಿದೆ. ಶೂಟಿಂಗ್ ಮುಗಿಸಿರುವ ಚಿತ್ರತಂಡವು ಈಗ ಗಂಗಾ ಮಾತೆಯ ಆಶೀರ್ವಾದ ಪಡೆಯಲು ಸಿದ್ಧತೆ ನಡೆಸುತ್ತಿದೆ.
ಸಿನಿಮಾ ರಂಗಕ್ಕೆ ಬಂದಿದ್ದರೂ ಮೊನಾಲಿಸಾ ತಮ್ಮ ವಿದ್ಯಾಭ್ಯಾಸವನ್ನು ಕೈಬಿಟ್ಟಿಲ್ಲ. ನಟನೆಯ ಜೊತೆ ಜೊತೆಗೆ ಓದಿನಲ್ಲೂ ತೊಡಗಿಕೊಂಡಿರುವ ಅವರಿಗೆ ಈಗ ದಕ್ಷಿಣ ಭಾರತದ ಚಿತ್ರರಂಗದಿಂದಲೂ ಅವಕಾಶಗಳು ಹುಡುಕಿಕೊಂಡು ಬರುತ್ತಿವೆ ಎನ್ನಲಾಗಿದೆ. ಕಠಿಣ ಪರಿಶ್ರಮ ಮತ್ತು ಸಿಕ್ಕ ಜನಪ್ರಿಯತೆಯನ್ನು ಸರಿಯಾಗಿ ಬಳಸಿಕೊಂಡರೆ ಬದುಕು ಹೇಗೆ ಬದಲಾಗಬಹುದು ಎಂಬುದಕ್ಕೆ ಮೊನಾಲಿಸಾ ಭೋಸ್ಲೆ ಈಗ ಉದಾಹರಣೆಯಾಗಿದ್ದಾರೆ.
