ಉತ್ತರ ಪ್ರದೇಶದ ಮೀರತ್ನಲ್ಲಿ ನಡೆದ ವಿಶಿಷ್ಟ ಘಟನೆಯೊಂದರಲ್ಲಿ, ನಿವೃತ್ತ ನ್ಯಾಯಾಧೀಶರೊಬ್ಬರು ವಿಚ್ಛೇದನ ಪಡೆದು ಮನೆಗೆ ಮರಳಿದ ತಮ್ಮ ಮಗಳನ್ನು ವಾದ್ಯಗೋಷ್ಠಿ ಮತ್ತು ಸಂಭ್ರಮದೊಂದಿಗೆ ಬರಮಾಡಿಕೊಳ್ಳುವ ಮೂಲಕ ಸಮಾಜಕ್ಕೆ ಹೊಸ ಸಂದೇಶ ನೀಡಿದ್ದಾರೆ. ಸಾಮಾನ್ಯವಾಗಿ ಹೆಣ್ಣುಮಕ್ಕಳು ವಿಚ್ಛೇದನ ಪಡೆದು ತವರು ಮನೆಗೆ ಮರಳುವುದನ್ನು ಕಳಂಕ ಎಂದು ಭಾವಿಸುವ ಸಾಮಾಜಿಕ ಚೌಕಟ್ಟನ್ನು ಮುರಿದಿರುವ ಈ ತಂದೆ, ಮಗಳ ಸಂತೋಷಕ್ಕಿಂತ ದೊಡ್ಡ ಕರ್ತವ್ಯ ಮತ್ತೊಂದಿಲ್ಲ ಎಂದು ಸಾರಿದ್ದಾರೆ. ಏಪ್ರಿಲ್ 4 ರಂದು ನ್ಯಾಯಾಲಯವು ಅಧಿಕೃತವಾಗಿ ವಿಚ್ಛೇದನ ನೀಡಿದ ನಂತರ, ಮೀರತ್ ಕೌಟುಂಬಿಕ ನ್ಯಾಯಾಲಯದ ಹೊರಗಡೆ ಸಂಬಂಧಿಕರು ಡೋಲು ಬಾರಿಸಿ, ನೃತ್ಯ ಮಾಡುತ್ತಾ ಮತ್ತು ಸಿಹಿತಿಂಡಿ ಹಂಚುತ್ತಾ ಆಕೆಯನ್ನು ಮನೆಗೆ ಕರೆದೊಯ್ದರು. ಈ ಸಂದರ್ಭದಲ್ಲಿ ಕುಟುಂಬದವರು ‘ಐ ಲವ್ ಮೈ ಡಾಟರ್’ ಎಂಬ ಬರಹವಿರುವ ಟಿ-ಶರ್ಟ್ಗಳನ್ನು ಧರಿಸಿ ಮಗಳಿಗೆ ಬೆಂಬಲ ಸೂಚಿಸಿದ್ದು ವಿಶೇಷವಾಗಿತ್ತು.
ಪ್ರಣೀತಾ ಅವರು 2018 ರಲ್ಲಿ ಸೇನಾ ಮೇಜರ್ ಗೌರವ್ ಅಗ್ನಿಹೋತ್ರಿ ಅವರನ್ನು ವಿವಾಹವಾಗಿದ್ದರು, ಆದರೆ ವೈವಾಹಿಕ ಜೀವನದಲ್ಲಿ ನಿರಂತರವಾಗಿ ಮಾನಸಿಕ, ಭಾವನಾತ್ಮಕ ಮತ್ತು ದೈಹಿಕ ಕಿರುಕುಳವನ್ನು ಅನುಭವಿಸುತ್ತಿದ್ದರು ಎನ್ನಲಾಗಿದೆ. ಮಗು ಜನಿಸಿದ ನಂತರವೂ ಪರಿಸ್ಥಿತಿ ಸುಧಾರಿಸದಿದ್ದಾಗ, ಅಸಹನೀಯ ಬದುಕಿನಿಂದ ಹೊರಬರಲು ಅವರು ವಿಚ್ಛೇದನದ ನಿರ್ಧಾರ ತಳೆದಿದ್ದರು. ಈ ಕಷ್ಟದ ಸಮಯದಲ್ಲಿ ತವರು ಮನೆಯವರು ಸಂಪೂರ್ಣ ಬೆಂಬಲವಾಗಿ ನಿಂತಿದ್ದು, ಮಗಳ ಮರುಜನ್ಮವನ್ನು ಹಬ್ಬದಂತೆ ಆಚರಿಸಿದ್ದಾರೆ. ಮಗಳನ್ನು ನೋವಿನ ಸಂಸಾರದಿಂದ ಮುಕ್ತಗೊಳಿಸಿ ಗೌರವಯುತವಾಗಿ ಮನೆಗೆ ಸ್ವಾಗತಿಸಿದ ಈ ನಿವೃತ್ತ ನ್ಯಾಯಾಧೀಶರ ನಡೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ.
