ಬೆಂಗಳೂರು: ರಾಜ್ಯದ ಅಂತರ್ಜಲ ವೃದ್ಧಿ ಮತ್ತು ರೈತರ ಹಿತರಕ್ಷಣೆಗಾಗಿ ಸಣ್ಣ ನೀರಾವರಿ ಇಲಾಖೆಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಭರ್ಜರಿ ಕೊಡುಗೆ ನೀಡಿದ್ದಾರೆ. ಬಯಲು ಸೀಮೆಯ ದಾಹ ನೀಗಿಸಲು ಹೆಬ್ಬಾಳ-ನಾಗವಾರ (H.N. Valley) ಯೋಜನೆಯನ್ನು ವಿಸ್ತರಿಸಲಾಗಿದ್ದು, ನೂರಾರು ಕೆರೆಗಳಿಗೆ ಮರುಜೀವ ನೀಡಲು ಕೋಟ್ಯಂತರ ರೂಪಾಯಿ ಅನುದಾನ ಘೋಷಿಸಲಾಗಿದೆ.
ಬಜೆಟ್ನ ಪ್ರಮುಖ ಮುಖ್ಯಾಂಶಗಳು:
- 164 ಕೆರೆಗಳಿಗೆ ನೀರು: ಶಿಡ್ಲಘಟ್ಟ ಮತ್ತು ಚಿಂತಾಮಣಿ ತಾಲ್ಲೂಕಿನ 164 ಕೆರೆಗಳಿಗೆ ನೀರು ತುಂಬಿಸಲು 237 ಕೋಟಿ ರೂ. ಯೋಜನೆ ಜಾರಿ!
- ಹೊಸಕೋಟೆ ಕೆರೆಗಳ ಅಭಿವೃದ್ಧಿ: ಸೂಲಿಬೆಲೆ ಮತ್ತು ನಂದಗುಡಿ ಹೋಬಳಿಯ 59 ಕೆರೆಗಳಿಗೆ ಎಚ್.ಎನ್ ವ್ಯಾಲಿ ನೀರು ತುಂಬಿಸಲು 140 ಕೋಟಿ ರೂ. ನಿಗದಿ.
- ವೃಷಭಾವತಿ ವ್ಯಾಲಿ ಯೋಜನೆ: ನೆಲಮಂಗಲ ಮತ್ತು ದೊಡ್ಡಬಳ್ಳಾಪುರ ತಾಲ್ಲೂಕಿನ 119 ಕೆರೆಗಳಿಗೆ ನೀರುಣಿಸಲು 650 ಕೋಟಿ ರೂ. ಬೃಹತ್ ಯೋಜನೆ ಘೋಷಣೆ.
- ರಾಜ್ಯಾದ್ಯಂತ 112 ಕಾಮಗಾರಿ: ಎಲ್ಲ ಜಿಲ್ಲೆಗಳಲ್ಲಿ ಕೆರೆ ಪುನಶ್ಚೇತನ ಮತ್ತು ಚೆಕ್ ಡ್ಯಾಂ ನಿರ್ಮಾಣಕ್ಕಾಗಿ 1,793 ಕೋಟಿ ರೂ. ಅನುಮೋದನೆ.
- ಅಂತರ್ಜಲ ವೃದ್ಧಿಗೆ ಒತ್ತು: ಕೊಪ್ಪಳದ ಯಲಬುರ್ಗಾ, ಕುಕನೂರು ಹಾಗೂ ಕಲಬುರಗಿಯ ಜಿಡಗಾದಲ್ಲಿ ಕೆರೆಗಳ ಆಧುನೀಕರಣಕ್ಕೆ 25 ಕೋಟಿ ರೂ. ಮೀಸಲು.
- ಕೆರೆ ಬಳಕೆದಾರರ ಸಂಘ: ಕೆರೆಗಳ ಸಂರಕ್ಷಣೆಗಾಗಿ ರಾಜ್ಯಾದ್ಯಂತ ಇರುವ ಬಳಕೆದಾರರ ಸಂಘಗಳ ಬಲವರ್ಧನೆಗೆ ನಿರ್ಧಾರ.
