ಪಶ್ಚಿಮ ಏಷ್ಯಾ ಮತ್ತು ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಭೀಕರ ಸಂಘರ್ಷದ ನಡುವೆಯೇ, ಭಾರತದ ಧ್ವಜ ಹೊತ್ತ ‘ಗ್ರೀನ್ ಆಶಾ’ ಎಂಬ ಬೃಹತ್ ಟ್ಯಾಂಕರ್ ನೌಕೆಯು 15,400 ಟನ್ ಎಲ್ಪಿಜಿಯನ್ನು (LPG) ಹೊತ್ತು ಸುರಕ್ಷಿತವಾಗಿ ಮುಂಬೈ ತಲುಪಿದೆ. ಜಗತ್ತಿನ ಅತ್ಯಂತ ಸೂಕ್ಷ್ಮ ಪ್ರದೇಶವೆಂದು ಪರಿಗಣಿಸಲಾದ ಹಾರ್ಮುಜ್ ಜಲಸಂಧಿಯನ್ನು ಯಶಸ್ವಿಯಾಗಿ ದಾಟಿ ಬಂದಿರುವ ಈ ನೌಕೆಯನ್ನು ನವಿ ಮುಂಬೈನ ಜವಾಹರಲಾಲ್ ನೆಹರು ಬಂದರು ಪ್ರಾಧಿಕಾರವು ಹೆಮ್ಮೆಯಿಂದ ಸ್ವಾಗತಿಸಿದೆ.
ಯುದ್ಧದ ಸನ್ನಿವೇಶ ಮತ್ತು ಕದನ ವಿರಾಮದ ಹಿನ್ನೆಲೆಯಲ್ಲಿ ಈ ಬೆಳವಣಿಗೆಯು ಭಾರತದ ಪಾಲಿಗೆ ಅತ್ಯಂತ ಮಹತ್ವದ್ದಾಗಿದೆ. ಯುದ್ಧ ಪ್ರಾರಂಭವಾದ ನಂತರ ಈ ಬಂದರಿಗೆ ತಲುಪಿದ ಮೊದಲ ಹಡಗು ಇದಾಗಿದ್ದು, ನೌಕೆಯಲ್ಲಿರುವ ಎಲ್ಲಾ ಸಿಬ್ಬಂದಿಗಳು ಸುರಕ್ಷಿತವಾಗಿದ್ದಾರೆ ಎಂದು ಅಧಿಕಾರಿಗಳು ದೃಢಪಡಿಸಿದ್ದಾರೆ. ಸಂಘರ್ಷದ ಕಾರಣದಿಂದ ಇಂಧನ ಪೂರೈಕೆಯಲ್ಲಿ ವ್ಯತ್ಯಯವಾಗಬಹುದು ಎಂಬ ಆತಂಕದ ನಡುವೆ, ಈ ಹಡಗಿನ ಆಗಮನವು ದೇಶದ ಇಂಧನ ಭದ್ರತೆಗೆ ನೆಮ್ಮದಿ ತಂದಿದೆ. ಹಾರ್ಮುಜ್ ಜಲಸಂಧಿಯಂತಹ ಅಪಾಯಕಾರಿ ಮಾರ್ಗದಲ್ಲಿ ಭಾರತೀಯ ನೌಕೆಯು ಯಶಸ್ವಿಯಾಗಿ ಸಂಚರಿಸಿರುವುದು ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದೆ.
