ನೌಕರರು ತಮ್ಮ PF ಹಣವನ್ನ ಬಿಡಿಸಿಕೊಳ್ಳಬೇಕು ಅಂದರೆ ವಾರ, ತಿಂಗಳುಗಟ್ಟಲೆ ಕಾಯಬೇಕಿತ್ತು. ಆನ್ಲೈನ್ ಮೂಲಕ ಅರ್ಜಿ ಸಲ್ಲಿಸಿದರೂ ಕೂಡ ತಮ್ಮ ಪಿಎಫ್ ಹಣ ಬಿಡಿಸಿಕೊಳ್ಳಲು ಆಗುತ್ತಿರಲಿಲ್ಲ. ಅಲ್ಲದೇ ಕೆಲ ಕಾರಣಗಳನ್ನ ಒಡ್ಡಿ ಪಿಎಫ್ ರಿಜೆಕ್ಟ್ ಆಗುತ್ತಿದ್ದ ಉದಾಹರಣೆಗಳೇ ಹೆಚ್ಚು. ಆದರೆ ಇನ್ನು ಮುಂದೆ ಪಿಎಫ್ ಹಣವನ್ನ ಎಟಿಎಂನಲ್ಲಿ ತಾವು ಹಣ ಬಿಡಿಸಿಕೊಂಡಷ್ಟೇ ಸುಲಭವಾಗಿ ವಿತ್ ಡ್ರಾ ಮಾಡಬಹುದು.
ನೌಕರರ ಭವಿಷ್ಯ ನಿಧಿ ಸಂಸ್ಥೆ (EPFO) ತನ್ನ ಹೊಸ ಪ್ಲಾಟ್ಫಾರ್ಮ್ EPFO 3.0 ಶುರು ಮಾಡುತ್ತಿದೆ. ಇದರಲ್ಲಿ ಗ್ರಾಹಕರು ಪಿಎಫ್ ಹಣವನ್ನು ಪಡೆಯಲು ವಾರಗಟ್ಟಲೆ ಕಾಯಬೇಕಿಲ್ಲ. ಕ್ಷಣಮಾತ್ರದಲ್ಲಿ ನಿಮ್ಮ ಪಿಎಫ್ ಹಣ ನಿಮ್ಮ ಕೈಯಲ್ಲಿ ಇರುತ್ತದೆ. ಹೊಸ EPFO ಪ್ಲಾಟ್ಫಾರ್ಮ್ ಪ್ರಾರಂಭವಾದ ನಂತರ, ನೀವು ATM ಮತ್ತು UPI ಮೂಲಕವೂ ಹಣವನ್ನು ವಿತ್ಡ್ರಾ ಮಾಡಿಕೊಳ್ಳಬಹುದು.
ಇದೇ ಜೂನ್ನಿಂದ EPFO 3.0 ಪ್ಲಾಟ್ಫಾರ್ಮ್ ಶುರು ಆಗುತ್ತಿದೆ. ಇಪಿಎಫ್ ಸದಸ್ಯರು ಯುಪಿಐ ಮತ್ತು ಎಟಿಎಂ ಮೂಲಕ ಪಿಎಫ್ ಹಣವನ್ನು ತಕ್ಷಣವೇ ಪಡೆಯಲು ಸಾಧ್ಯವಾಗುತ್ತದೆ.
ಹೊಸ ಸೌಲಭ್ಯಗಳ ಅಡಿಯಲ್ಲಿ, ಇಪಿಎಫ್ ಸದಸ್ಯರು ಯುಪಿಐ ಮತ್ತು ಎಟಿಎಂ ಮೂಲಕ ಹಣವನ್ನು ಹಿಂಪಡೆಯಲು ಮಾತ್ರವಲ್ಲದೆ, ಅವರ ಪಿಎಫ್ ಬ್ಯಾಲೆನ್ಸ್ ಅನ್ನು ಸಹ ಪರಿಶೀಲಿಸಬಹುದು. ಇದಲ್ಲದೆ, ಜನರು ತಮ್ಮ ಆಯ್ಕೆಯ ಬ್ಯಾಂಕ್ ಖಾತೆಗೆ ಹಣವನ್ನು ವರ್ಗಾಯಿಸುವ ಸೌಲಭ್ಯವನ್ನು ಸಹ ಪಡೆಯುತ್ತಾರೆ. ಇದರಲ್ಲಿ ಭದ್ರತಾ ಕ್ರಮಗಳೂ ಇರುತ್ತವೆ, ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು, ಖಾತೆದಾರರು OTP ಪರಿಶೀಲನೆಯ ಮೂಲಕ ತಮ್ಮ EPF ಖಾತೆಯನ್ನು ನವೀಕರಿಸಬಹುದು.
