ಸಾವಿನ ಶೋಕದಲ್ಲೂ ಛಲ ಬಿಡದೆ ಸ್ಟೇಟ್ ಟಾಪರ್ ಆದ ದಿಶಾ!
ದ್ವಿತೀಯ ಪಿಯುಸಿ ಫಲಿತಾಂಶದಲ್ಲಿ 600ಕ್ಕೆ 600 ಅಂಕಗಳನ್ನು ಪಡೆದು ವಾಣಿಜ್ಯ ವಿಭಾಗದಲ್ಲಿ ರಾಜ್ಯಕ್ಕೆ ಪ್ರಥಮ ಸ್ಥಾನ ಗಳಿಸಿದ ದಕ್ಷಿಣ ಕನ್ನಡದ ಮೂಡುಬಿದಿರೆಯ ಆಳ್ವಾಸ್ ಕಾಲೇಜಿನ ವಿದ್ಯಾರ್ಥಿನಿ ದಿಶಾಳ ಸಾಧನೆ ಅಕ್ಷರಶಃ ಕಲ್ಲು ಹೃದಯವನ್ನೂ ಕರಗಿಸುವಂತಿದೆ. ಈಕೆಯ ಈ ಐತಿಹಾಸಿಕ ಯಶಸ್ಸಿನ ಹಿಂದೆ ಎದೆ ನಡುಗಿಸುವ ಕಣ್ಣೀರಿನ ಕಥೆಯಿದ್ದು, ಹೆತ್ತ ತಾಯಿಯ ಸಾವಿನ ಶೋಕದ ನಡುವೆಯೂ ದಿಶಾ ತೋರಿದ ಛಲ ಮತ್ತು ಧೈರ್ಯ ಇಂದು ಇಡೀ ನಾಡೇ ಹೆಮ್ಮೆ ಪಡುವಂತೆ ಮಾಡಿದೆ. ಪರೀಕ್ಷೆಗಳು ನಡೆಯುತ್ತಿದ್ದ ಸಂದರ್ಭದಲ್ಲೇ ದಿಶಾ ತನ್ನ ಪ್ರಾಣಕ್ಕಿಂತ ಹೆಚ್ಚಾಗಿ ಪ್ರೀತಿಸುತ್ತಿದ್ದ ತಾಯಿಯನ್ನು ಕಳೆದುಕೊಂಡಿದ್ದು, ಈ ವಾರ್ತೆ ಕೇಳಿದವರ ಕಣ್ಣಾಲಿಗಳು ತೇವಗೊಳ್ಳುತ್ತಿವೆ.
ಪರೀಕ್ಷೆಯ ದಿನದಂದು “ಚೆನ್ನಾಗಿ ಬರೆ ಮಗಳೇ” ಎಂದು ಹರಸಿ ಕಳಿಸಿದ್ದ ತಾಯಿ, ದಿಶಾ ತನ್ನ ಮೂರನೇ ಪರೀಕ್ಷೆ ಮುಗಿಸಿ ಮನೆಗೆ ಹಿಂದಿರುಗುವಷ್ಟರಲ್ಲಿ ಅಕಾಲಿಕವಾಗಿ ನಿಧನರಾಗಿದ್ದರು. ಪರೀಕ್ಷೆ ಮುಗಿದ ಸಂಭ್ರಮದಲ್ಲಿ ಅಮ್ಮನ ಬಳಿ ಓಡಿ ಬಂದ ವಿದ್ಯಾರ್ಥಿನಿಗೆ ಎದುರಾಗಿದ್ದು ತಾಯಿಯ ಮೃತದೇಹ. ಜೀವನದ ಅತ್ಯಂತ ಕಠಿಣ ಕ್ಷಣದಲ್ಲೂ ಎದೆಗುಂದದ ದಿಶಾ, ತಾಯಿಯ ಅಂತ್ಯಸಂಸ್ಕಾರದ ಮರುದಿನವೇ ಪರೀಕ್ಷಾ ಕೇಂದ್ರಕ್ಕೆ ತೆರಳಿ ಉಳಿದ ಪರೀಕ್ಷೆಗಳನ್ನು ಬರೆದಿದ್ದಾಳೆ. ತಾಯಿಯ ಆತ್ಮಕ್ಕೆ ಶಾಂತಿ ಸಿಗಬೇಕೆಂದರೆ ನಾನು ಸಾಧನೆ ಮಾಡಲೇಬೇಕು ಎಂಬ ಅವಳ ಸಂಕಲ್ಪ ಇಂದು ಆಕೆಯನ್ನು ರಾಜ್ಯಕ್ಕೆ ಟಾಪರ್ ಆಗಿ ಮಾಡಿದೆ. ಅಮ್ಮನ ನೆನಪುಗಳನ್ನೇ ಶಕ್ತಿಯಾಗಿಸಿಕೊಂಡು ಈಕೆ ಮಾಡಿರುವ ಸಾಧನೆ ಇಂದು ಎಲ್ಲರಿಗೂ ಮಾದರಿಯಾಗಿದೆ.
