ಅಣ್ಣಾವ್ರ ಊಟದ ಸೀಕ್ರೆಟ್ ಔಟ್: ಡಾ. ರಾಜ್ಕುಮಾರ್ ಅಚ್ಚುಮೆಚ್ಚಿನ ‘ವೆಜ್’ ಅಡುಗೆ ಯಾವುದು ಗೊತ್ತಾ?
ಕನ್ನಡ ಚಿತ್ರರಂಗದ ಧ್ರುವತಾರೆ, ಅಭಿಮಾನಿಗಳ ಪಾಲಿನ ‘ಬಂಗಾರದ ಮನುಷ್ಯ’ ಡಾ. ರಾಜ್ಕುಮಾರ್ ಅವರ ಬಗ್ಗೆ ತಿಳಿಯಲು ಇಂದಿಗೂ ಅಭಿಮಾನಿಗಳಲ್ಲಿ ಅದೇ ಕುತೂಹಲ ಮತ್ತು ಉತ್ಸಾಹ ಮನೆಮಾಡಿದೆ. ಅಣ್ಣಾವ್ರು ಕೇವಲ ತೆರೆಯ ಮೇಲಷ್ಟೇ ಅಲ್ಲ, ನಿಜ ಜೀವನದಲ್ಲೂ ಅತ್ಯಂತ ಶಿಸ್ತು ಮತ್ತು ಸರಳತೆಗೆ ಹೆಸರಾದವರು. ಅವರ ನಟನೆ, ಗಾಯನ ಮತ್ತು ಯೋಗದ ಬಗ್ಗೆ ನಮಗೆಲ್ಲಾ ತಿಳಿದೇ ಇದೆ.
ಆದರೆ, ಈ ಮಹಾನ್ ನಟನ ಊಟದ ತಟ್ಟೆಯಲ್ಲಿ ಅಚ್ಚುಮೆಚ್ಚಿನ ತಿನಿಸುಗಳು ಯಾವುವು ಎಂಬುದು ನಿಮಗೊತ್ತೇ? ಸಾಮಾನ್ಯವಾಗಿ ಅಣ್ಣಾವ್ರಿಗೆ ಮಾಂಸಾಹಾರ (Non-Veg) ಇಷ್ಟ ಎಂಬ ಮಾತು ಎಲ್ಲೆಡೆ ಇದೆ.
ಆದರೆ, ಅವರು ಸಸ್ಯಾಹಾರಿ ಅಡುಗೆಯಲ್ಲೂ ಕೆಲವು ವಿಶಿಷ್ಟ ಖಾದ್ಯಗಳನ್ನು ಅತೀವವಾಗಿ ಇಷ್ಟಪಡುತ್ತಿದ್ದರು. ಈ ಕುರಿತು ಅಣ್ಣಾವ್ರ ಪತ್ನಿ, ನಿರ್ಮಾಪಕಿ ಪಾರ್ವತಮ್ಮ ರಾಜ್ಕುಮಾರ್ ಅವರು ಹಳೆಯ ಸಂದರ್ಶನವೊಂದರಲ್ಲಿ ಹಂಚಿಕೊಂಡಿದ್ದ ಮಾತುಗಳು ಈಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿವೆ.
ಪಾರ್ವತಮ್ಮನವರ ಪ್ರಕಾರ, ಡಾ. ರಾಜ್ಕುಮಾರ್ ಅವರಿಗೆ ಸಸ್ಯಹಾರದಲ್ಲಿ ಮುಖ್ಯವಾಗಿ ‘ಕೋಸಂಬರಿ’ ಎಂದರೆ ಪಂಚಪ್ರಾಣವಂತೆ! ಹಬ್ಬದ ದಿನಗಳಲ್ಲಿ ಅಥವಾ ವಿಶೇಷ ಸಂದರ್ಭಗಳಲ್ಲಿ ಮಾಡುವ ಈ ಸಾಂಪ್ರದಾಯಿಕ ಸಲಾಡ್ ಅನ್ನು ಅವರು ಬಹಳ ಇಷ್ಟಪಟ್ಟು ಸವಿಯುತ್ತಿದ್ದರು.
ಅಣ್ಣಾವ್ರಿಗೆ ಅತ್ಯಂತ ಪ್ರಿಯವಾದ ಮತ್ತೊಂದು ಖಾದ್ಯವೆಂದರೆ ಅದು ‘ಒಬ್ಬಟ್ಟು ಸಾರು’. ಒಬ್ಬಟ್ಟು ಮಾಡಿದ ದಿನ ಅದರ ಬೇಳೆ ಕಟ್ಟಿನಿಂದ ಮಾಡುವ ಘಮಘಮಿಸುವ ಸಾರಿನ ರುಚಿಗೆ ಅವರು ಮಾರುಹೋಗುತ್ತಿದ್ದರು.
ಎಷ್ಟೇ ದೊಡ್ಡ ಸ್ಟಾರ್ ಆಗಿದ್ದರೂ, ಮನೆ ಮಂದಿಯೊಂದಿಗೆ ನೆಲದ ಮೇಲೆ ಕುಳಿತು ಊಟ ಮಾಡುವುದನ್ನು ಅವರು ತುಂಬಾ ಇಷ್ಟಪಡುತ್ತಿದ್ದರು. ಸಾವಿರಾರು ಕೋಟಿ ರೂಪಾಯಿ ವ್ಯವಹಾರ ಮಾಡುವ ಸಿನಿಮಾ ರಂಗದಲ್ಲಿದ್ದರೂ, ಅಣ್ಣಾವ್ರ ಮನಸ್ಸು ಮಾತ್ರ ಯಾವಾಗಲೂ ಕರುನಾಡಿನ ಮಣ್ಣಿನ ಸೊಗಡಿನ ಹಳ್ಳಿ ಶೈಲಿಯ ಅಡುಗೆಗಳನ್ನೇ ಬಯಸುತ್ತಿತ್ತು.
ಅವರ ಈ ಫುಡ್ ಸೀಕ್ರೆಟ್ ಕೇಳಿ ಅಭಿಮಾನಿಗಳು “ನಮ್ಮ ಅಣ್ಣಾವ್ರು ನಿಜಕ್ಕೂ ಸರಳತೆಯ ಸಾಕಾರ ಮೂರ್ತಿ” ಎಂದು ಹೆಮ್ಮೆಯಿಂದ ಕಮೆಂಟ್ ಮಾಡುತ್ತಿದ್ದಾರೆ.
ಅಣ್ಣಾವ್ರ ನೆನಪುಗಳು ಅವರ ಸಿನಿಮಾಗಳ ಮೂಲಕ ಮಾತ್ರವಲ್ಲ, ಇಂತಹ ಪುಟ್ಟ ಪುಟ್ಟ ಇಷ್ಟ-ಕಷ್ಟಗಳ ಮೂಲಕವೂ ನಮ್ಮ ನಡುವೆ ಎಂದಿಗೂ ಜೀವಂತವಾಗಿವೆ.
