ರಸ್ತೆ ದಾಟಲು ಹೋರಾಟ: ಕಾಲೆರಡು ಸ್ವಾಧೀನ ಕಳೆದುಕೊಂಡ ಶ್ವಾನಕ್ಕೆ ಯುವಕನ ನೆರವು..!
ಇಂದಿನ ವೇಗದ ಜೀವನದಲ್ಲಿ ಇತರರಿಗೆ ಸಹಾಯ ಮಾಡುವುದು ದೂರದ ಮಾತು, ಕಷ್ಟದಲ್ಲಿರುವವರತ್ತ ತಿರುಗಿ ನೋಡುವವರೇ ಕಡಿಮೆ. ಆದರೆ ಈ ನಡುವೆ ಮಾನವೀಯತೆ ಇನ್ನೂ ಜೀವಂತವಾಗಿದೆ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ.
ಒಬ್ಬ ಯುವಕನು ಕಾಲೆರಡು ಸ್ವಾಧೀನ ಕಳೆದುಕೊಂಡ ಶ್ವಾನಕ್ಕೆ ರಸ್ತೆ ದಾಟಲು ನೆರವಾದ ವಿಡಿಯೋ ಈಗ ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿದೆ. ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋದಲ್ಲಿ, ಒಂದು ಶ್ವಾನ ರಸ್ತೆ ದಾಟಲು ಹೋರಾಡುತ್ತಿರುವುದು ಕಾಣಿಸುತ್ತದೆ. ಕಾಲೆರಡು ಕೆಲಸ ಮಾಡದ ಕಾರಣ ಅದು ನಿಧಾನವಾಗಿ ಸಾಗುತ್ತಿದ್ದು, ವಾಹನಗಳ ನಡುವೆ ಅದು ಅಪಾಯದಲ್ಲಿತ್ತು.
ಈ ದೃಶ್ಯವನ್ನು ಗಮನಿಸಿದ ಯುವಕನು ತನ್ನ ಬೈಕ್ನ್ನು ಶ್ವಾನದ ಪಕ್ಕದಲ್ಲೇ ನಿಧಾನವಾಗಿ ಚಲಾಯಿಸುತ್ತಾನೆ. ಬೈಕ್ ಮೂಲಕ ಶ್ವಾನಕ್ಕೆ ರಕ್ಷಣೆ ನೀಡುತ್ತಾ, ಅದನ್ನು ಸುರಕ್ಷಿತವಾಗಿ ರಸ್ತೆ ದಾಟಿಸುತ್ತಾನೆ. ಈ ಮಾನವೀಯ ಕೆಲಸವನ್ನು ಕಂಡ ನೆಟ್ಟಿಗರು ಯುವಕನನ್ನು ಹೃದಯಪೂರ್ವಕವಾಗಿ ಮೆಚ್ಚಿಕೊಂಡಿದ್ದಾರೆ. ಈ ಘಟನೆ ನಮಗೆ ಒಂದು ಮಹತ್ವದ ಸಂದೇಶ ನೀಡುತ್ತದೆ . ಸಹಾಯ ಮಾಡಲು ದೊಡ್ಡದೊಂದು ಕೆಲಸ ಮಾಡಬೇಕಿಲ್ಲ, ಸಣ್ಣ ಕಾಳಜಿಯೂ ದೊಡ್ಡ ಬದಲಾವಣೆಗೆ ಕಾರಣವಾಗಬಹುದು.
