ಲ್ಯಾಬ್ರಡಾರ್ ರಿಟ್ರೈವರ್; ಈಜುವುದರಲ್ಲಿ ನಿಸ್ಸೀಮ ಮತ್ತು ಸ್ನೇಹಕ್ಕೆ ಸಾಟಿಯಿಲ್ಲದ ಜೊತೆಗಾರ!

ಲ್ಯಾಬ್ರಡಾರ್ ರಿಟ್ರೈವರ್ ನಾಯಿಗಳು ಜಗತ್ತಿನಾದ್ಯಂತ ಅತ್ಯಂತ ಪ್ರೀತಿಪಾತ್ರವಾದ ಸಾಕುಪ್ರಾಣಿ. ಇವುಗಳ ಸ್ನೇಹಪರ ಸ್ವಭಾವ ಮತ್ತು ಚುರುಕುತನ ಎಲ್ಲರನ್ನೂ ಸೆಳೆಯುತ್ತದೆ. ಮೂಲತಃ ಕೆನಡಾದಿಂದ ಬಂದ ಈ ತಳಿಯ ನಾಯಿಗಳು ಮೀನುಗಾರರಿಗೆ ಸಹಾಯ ಮಾಡುತ್ತಿದ್ದವು. ಈ ಕಾರಣದಿಂದಲೇ ಇವುಗಳಿಗೆ ಈಜುವುದು ಎಂದರೆ ಬಹಳ ಇಷ್ಟ. ಇವುಗಳ ದೇಹದ ರಚನೆಯು ಕೂಡ ನೀರಿನಲ್ಲಿ ಸುಲಭವಾಗಿ ಚಲಿಸಲು ಪೂರಕ.

ಲ್ಯಾಬ್ರಡಾರ್‌ಗಳು ಮಧ್ಯಮ ಗಾತ್ರದ ಬಲಿಷ್ಠ ದೇಹವನ್ನು ಹೊಂದಿರುತ್ತವೆ. ಇವುಗಳ ಬಾಲವು ದಪ್ಪವಾಗಿದ್ದು ನೀರಿನಲ್ಲಿ ಈಜುವಾಗ ದೋಣಿಯ ಚುಕ್ಕಾಣಿಯಂತೆ ಕೆಲಸ ಮಾಡುತ್ತದೆ. ಇವುಗಳ ಮೈಮೇಲಿನ ಕೂದಲು ಎರಡು ಪದರಗಳನ್ನು ಹೊಂದಿದ್ದು, ಇದು ಚಳಿಯಿಂದ ಮತ್ತು ನೀರಿನಿಂದ ರಕ್ಷಣೆ ನೀಡುತ್ತದೆ. ಲ್ಯಾಬ್ರಡಾರ್‌ಗಳ ಪಾದಗಳಲ್ಲಿ ಬೆರಳುಗಳ ನಡುವೆ ತೆಳುವಾದ ಚರ್ಮದ ಪದರ ಇರುತ್ತದೆ (Webbed feet). ಇದು ಇವುಗಳಿಗೆ ನೀರಿನಲ್ಲಿ ಈಜಲು ಡಕ್‌ಗಳಂತೆ ಸಹಾಯ ಮಾಡುತ್ತದೆ. ಈ ವಿಶೇಷ ರಚನೆಯಿಂದಾಗಿ ಇವು ಬೇರೆ ನಾಯಿಗಳಿಗಿಂತ ವೇಗವಾಗಿ ಮತ್ತು ದೀರ್ಘಕಾಲ ಈಜಬಲ್ಲವು. ಮೈಮೇಲೆ ಇರುವ ಎಣ್ಣೆಯಂಶದ ಕೂದಲು ಇವು ನೀರಿಂದ ಹೊರಬಂದ ತಕ್ಷಣ ಮೈಯನ್ನು ಬೇಗನೆ ಒಣಗಿಸಿಕೊಳ್ಳಲು ಸಹಕರಿಸುತ್ತದೆ.ಸಾಮಾನ್ಯವಾಗಿ ಇವು ಹಳದಿ, ಕಪ್ಪು ಮತ್ತು ಚಾಕೊಲೇಟ್ ಬಣ್ಣಗಳಲ್ಲಿ ಕಂಡುಬರುತ್ತವೆ. ಇವುಗಳ ಮುಖದಲ್ಲಿ ಯಾವಾಗಲೂ ಒಂದು ರೀತಿಯ ಪ್ರೀತಿ ಮತ್ತು ಮುಗ್ಧತೆ ಎದ್ದು ಕಾಣುತ್ತಿರುತ್ತದೆ.

ಇವುಗಳ ಬುದ್ಧಿವಂತಿಕೆ ಮತ್ತು ಕಲಿಯುವ ಆಸಕ್ತಿ ತುಂಬಾ ಹೆಚ್ಚು. ಇವುಗಳನ್ನು ಸುಲಭವಾಗಿ ತರಬೇತುಗೊಳಿಸಬಹುದು, ಆದ್ದರಿಂದಲೇ ಇವುಗಳನ್ನು ಕೇವಲ ಮನೆಯ ನಾಯಿಗಳಾಗಿ ಮಾತ್ರವಲ್ಲದೆ ಪೊಲೀಸ್ ಇಲಾಖೆಯಲ್ಲಿ ಬಾಂಬ್ ಪತ್ತೆ ಹಚ್ಚಲು ಮತ್ತು ಮಾರ್ಗದರ್ಶಕ ನಾಯಿಗಳಾಗಿ ಬಳಸಲಾಗುತ್ತದೆ. ಇವುಗಳ ವಾಸನೆ ಗ್ರಹಿಸುವ ಶಕ್ತಿ ಬಹಳ ತೀಕ್ಷ್ಣವಾಗಿದ್ದು, ಎಂತಹ ಕಠಿಣ ಕೆಲಸವನ್ನಾದರೂ ಅಚ್ಚುಕಟ್ಟಾಗಿ ಮಾಡುತ್ತವೆ.

ಇವುಗಳ ಆಹಾರ ಮತ್ತು ವ್ಯಾಯಾಮದ ಬಗ್ಗೆ ಸ್ವಲ್ಪ ಹೆಚ್ಚಿನ ಕಾಳಜಿ ಬೇಕು. ಲ್ಯಾಬ್ರಡಾರ್‌ಗಳಿಗೆ ತಿನ್ನುವುದು ಎಂದರೆ ಬಹಳ ಇಷ್ಟ, ಇದರಿಂದ ಇವು ಬೇಗನೆ ದಪ್ಪಗಾಗುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ಪ್ರತಿದಿನ ಇವುಗಳ ಜೊತೆ ಆಟವಾಡುವುದು ಅಥವಾ ನಡಿಗೆಗೆ ಕರೆದುಕೊಂಡು ಹೋಗುವುದು ಬಹಳ ಮುಖ್ಯ. ಚೆಂಡು ಎಸೆಯುವ ಆಟ ಇವುಗಳಿಗೆ ತುಂಬಾ ಖುಷಿ ಕೊಡುತ್ತದೆ. ಸರಿಯಾದ ಆರೈಕೆ ಮಾಡಿದರೆ ಇವು ಹತ್ತರಿಂದ ಹನ್ನೆರಡು ವರ್ಷಗಳ ಕಾಲ ಆರಾಮವಾಗಿ ಬದುಕುತ್ತವೆ.

ಲ್ಯಾಬ್ರಡಾರ್‌ಗಳು ಕೇವಲ ಪ್ರಾಣಿಗಳಾಗಿ ಮಾತ್ರವಲ್ಲದೆ ಮನುಷ್ಯರ ಭಾವನೆಗಳನ್ನು ಅರ್ಥಮಾಡಿಕೊಳ್ಳುವ ಅದ್ಭುತ ಶಕ್ತಿಯನ್ನು ಹೊಂದಿವೆ. ಇವುಗಳನ್ನು ‘ಥೆರಪಿ ಡಾಗ್ಸ್’ ಎಂದು ಕರೆಯಲಾಗುತ್ತದೆ, ಏಕೆಂದರೆ ಇವು ಒತ್ತಡ ಅಥವಾ ಖಿನ್ನತೆಯಲ್ಲಿರುವ ಮನುಷ್ಯರನ್ನು ಸಮಾಧಾನಪಡಿಸುವಲ್ಲಿ ತುಂಬಾ ಪ್ರಭಾವಶಾಲಿ. ಮಾಲೀಕರು ಬೇಸರದಲ್ಲಿದ್ದಾಗ ಅಥವಾ ಅಸಮಾಧಾನಗೊಂಡಾಗ ಇವು ಅದನ್ನು ತಕ್ಷಣವೇ ಗ್ರಹಿಸಿ ಅವರ ಹತ್ತಿರ ಬಂದು ಕುಳಿತುಕೊಳ್ಳುವ ಮೂಲಕ ಸಾಂತ್ವನ ನೀಡುತ್ತವೆ.

ಇವುಗಳ ವಾಸನೆ ಗ್ರಹಿಸುವ ಶಕ್ತಿ ಎಷ್ಟು ಪ್ರಬಲವಾಗಿದೆ ಎಂದರೆ, ವೈದ್ಯಕೀಯ ಲೋಕದಲ್ಲಿ ಇವುಗಳನ್ನು ಕೆಲವು ಕಾಯಿಲೆಗಳನ್ನು ಪತ್ತೆಹಚ್ಚಲು ಕೂಡ ಬಳಸಲಾಗುತ್ತದೆ. ಮನುಷ್ಯನ ದೇಹದಲ್ಲಿ ಆಗುವ ಸಣ್ಣ ಬದಲಾವಣೆಗಳನ್ನು ವಾಸನೆಯ ಮೂಲಕವೇ ಗುರುತಿಸುವ ಸಾಮರ್ಥ್ಯ ಇವುಗಳಿಗಿದೆ. ಇಷ್ಟೆಲ್ಲಾ ವಿಶೇಷ ಗುಣಗಳಿರುವುದರಿಂದಲೇ ಲ್ಯಾಬ್ರಡಾರ್‌ಗಳನ್ನು ಕೇವಲ ಸಾಕುಪ್ರಾಣಿ ಎನ್ನುವುದಕ್ಕಿಂತ ಹೆಚ್ಚಾಗಿ ಮನುಷ್ಯನ ಅತ್ಯುತ್ತಮ ಸ್ನೇಹಿತ ಎಂದು ಕರೆಯಲಾಗುತ್ತದೆ.