ಹೊಸದಿಲ್ಲಿ : ಭಾರತದ ಪ್ರಥಮ ಮಾನವ ಸಹಿತ ಬಾಹ್ಯಾಕಾಶ ಯೋಜನೆಯಾಗಿರುವ ಗಗನಯಾನಕ್ಕೆ ಇಸ್ರೋ ಭರ್ಜರಿ ಸಿದ್ಧತೆ ನಡೆಸುತ್ತಿದೆ. ಇದು ಭಾರತದ ಮಹತ್ವಾಕಾಂಕ್ಷಿ ಬಾಹ್ಯಾಕಾಶ ಯೋಜನೆಯಾಗಿದ್ದು, ಪ್ರಧಾನಿ ನರೇಂದ್ರ ಮೋದಿ ‘ಗಗನಯಾನ’ ಯೋಜನೆಗಾಗಿ ಪ್ರಸ್ತುತ ತರಬೇತಿ ಪಡೆಯುತ್ತಿರುವ ನಾಲ್ವರು ಗಗನಯಾತ್ರಿಗಳನ್ನು ರಾಷ್ಟ್ರಕ್ಕೆ ಪರಿಚಯಿಸಿದ್ದಾರೆ.
ಗಗನಯಾನ ಯೋಜನೆಗೆ ಗ್ರೂಪ್ ಕ್ಯಾಪ್ಟನ್ ಪಿ ಬಾಲಕೃಷ್ಣನ್ ನಾಯರ್, ಗ್ರೂಪ್ ಕ್ಯಾಪ್ಟನ್ ಅಜಿತ್ ಕೃಷ್ಣನ್, ಗ್ರೂಪ್ ಕ್ಯಾಪ್ಟನ್ ಅಂಗದ್ ಪ್ರತಾಪ್, ಮತ್ತು ವಿಂಗ್ ಕಮಾಂಡರ್ ಎಸ್ ಶುಕ್ಲಾ ಅವರನ್ನು ಗಗನಯಾತ್ರಿಗಳನ್ನಾಗಿ ಆಯ್ಕೆ ಮಾಡಲಾಗಿದೆ. ನಾಲ್ವರಿಗೂ ಪ್ರಧಾನಿ ನರೇಂದ್ರ ಮೋದಿ ಅವರು ‘ಆ್ಯಸ್ಟ್ರೋನಾಟ್ ವಿಂಗ್ಸ್’ ಬ್ಯಾಡ್ಜ್ ಅನ್ನು ನೀಡಿದರು. ನಾಲ್ಕು ವರ್ಷಗಳ ಹಿಂದೆಯೇ ಈ ನಾಲ್ವರು ಗಗನಯಾತ್ರಿಗಳನ್ನು ಆಯ್ಕೆ ಮಾಡಲಾಗಿತ್ತು.
ಏನಿದು ಗಗನಯಾನ ಯೋಜನೆ?
ಗಗನಯಾನ ಯೋಜನೆ ಭಾರತದ ಮೊದಲ ಮಾನವ ಸಹಿತ ಬಾಹ್ಯಾಕಾಶ ಯೋಜನೆಯಾಗಿದ್ದು, 2024-25ರಲ್ಲಿ ಕಾರ್ಯಗತವಾಗುವ ಸಾಧ್ಯತೆ ಇದೆ. ಮೂರು ಗಗನಯಾತ್ರಿಗಳನ್ನು ಮೂರು ದಿನಗಳ ಯೋಜನೆಯ ಭಾಗವಾಗಿ 400 ಕಿಲೋ ಮೀಟರ್ಗಳ ಎತ್ತರದಲ್ಲಿರುವ ಕಕ್ಷೆಗೆ ಕಳುಹಿಸುವ ಗುರಿಯನ್ನು ಈ ಯೋಜನೆ ಹೊಂದಿದೆ. ಆ ಬಳಿಕ, ಅವರು ಸುರಕ್ಷಿತವಾಗಿ ಮರಳಿ, ಭಾರತದ ಸೀಮೆಯಲ್ಲಿ ಸಮುದ್ರದಲ್ಲಿ ಇಳಿಯಲಿದ್ದಾರೆ. ಈಗಾಗಲೇ ಗಗನಯಾನದ ನೌಕೆಯ ಪ್ರಯೋಗಾರ್ಥ ಪರೀಕ್ಷೆಯನ್ನು ಕೂಡ ಇಸ್ರೋ ನಡೆಸಿದ್ದು, ಯಶಸ್ವಿಯಾಗಿದೆ. ಈ ಯೋಜನೆಗೆ ಭಾರತೀಯ ಉದ್ಯಮ ವಲಯಗಳ ನೆರವು, ಭಾರತೀಯ ವಿಶ್ವವಿದ್ಯಾಲಯಗಳು ಮತ್ತು ಸಂಶೋಧನಾ ಕೇಂದ್ರಗಳ ಬುದ್ಧಿಮತ್ತೆ, ಹಾಗೂ ಜಾಗತಿಕ ಸಂಸ್ಥೆಗಳು ಒದಗಿಸುವ ಅತ್ಯಾಧುನಿಕ ತಂತ್ರಜ್ಞಾನಗಳು ಯೋಜನೆಗೆ ಪೂರಕವಾಗಿವೆ.
ಗಗನಯಾತ್ರಿಗಳ ಆಯ್ಕೆ ಹೇಗೆ?
ನಾಲ್ಕು ವರ್ಷಗಳ ಹಿಂದೆಯೇ ಗಗನಯಾನ ಯೋಜನೆಯ ಗಗನಯಾತ್ರಿಗಳಾಗಿ ಆಯ್ಕೆಗೊಂಡಿರುವ ನಾಲ್ವರೂ ಭಾರತೀಯ ವಾಯುಪಡೆಯ ಬೆಂಗಳೂರಿನಲ್ಲಿರುವ ಏರ್ಕ್ರಾಫ್ಟ್ ಆ್ಯಂಡ್ ಸಿಸ್ಟಮ್ಸ್ ಟೆಸ್ಟಿಂಗ್ ಎಸ್ಟಾಬ್ಲಿಷ್ಮೆಂಟ್ (ಎಎಸ್ಟಿಇ) ಪರೀಕ್ಷಾ ಪೈಲಟ್ಗಳಾಗಿದ್ದಾರೆ. ದೊಡ್ಡ ಸಂಖ್ಯೆಯಲ್ಲಿ ಪರೀಕ್ಷಾ ಪೈಲಟ್ಗಳು ಗಗನಯಾತ್ರಿಗಳಾಗಲು ತಮ್ಮ ಹೆಸರನ್ನು ನೋಂದಾಯಿಸಿದ್ದರು. ಅವರಲ್ಲಿ 12 ಜನರು ಮಾತ್ರವೇ ಬೆಂಗಳೂರಿನಲ್ಲಿ ಸೆಪ್ಟೆಂಬರ್ 2019ರಲ್ಲಿ ನಡೆದ ಆಯ್ಕೆ ಪ್ರಕ್ರಿಯೆಯ ಮೊದಲ ಹಂತವನ್ನು ಪೂರ್ಣಗೊಳಿಸಿದ್ದರು.
ಈ ಆಯ್ಕೆ ಪ್ರಕ್ರಿಯೆಯನ್ನು ಭಾರತೀಯ ವಾಯುಪಡೆಯಡಿ ಕಾರ್ಯಾಚರಿಸುವ ಇನ್ಸ್ಟಿಟ್ಯೂಟ್ ಆಫ್ ಏರೋಸ್ಪೇಸ್ ಮೆಡಿಸಿನ್ (ಐಎಎಂ) ನಲ್ಲಿ ನಡೆಸಲಾಗಿತ್ತು. ಆಯ್ಕೆ ಪ್ರಕ್ರಿಯೆಯ ಹಲವು ಹಂತಗಳ ಬಳಿಕ, ಇಸ್ರೋ ಮತ್ತು ಐಎಎಂಗಳು ಅಭ್ಯರ್ಥಿಗಳ ಸಂಖ್ಯೆಯನ್ನು ಅಂತಿಮ ನಾಲ್ಕು ಜನರಿಗೆ ಇಳಿಸಿದವು. 2020ರ ಆರಂಭದಲ್ಲಿ, ಇಸ್ರೋ ನಾಲ್ವರು ಟೆಸ್ಟ್ ಪೈಲಟ್ಗಳನ್ನು ಆರಂಭಿಕ ತರಬೇತಿಗಾಗಿ ರಷ್ಯಾಗೆ ಕಳುಹಿಸಿತು. ಕೋವಿಡ್-19 ಸಾಂಕ್ರಾಮಿಕದ ಪರಿಣಾಮವಾಗಿ ಉಂಟಾದ ಒಂದಷ್ಟು ತೊಡಕುಗಳ ಹೊರತಾಗಿಯೂ, ಅವರ ತರಬೇತಿ 2021ರಲ್ಲಿ ಯಶಸ್ವಿಯಾಗಿ ಪೂರ್ಣಗೊಂಡಿತು.
ಗಗನಯಾನ ಯೋಜನೆಗೆ ಪರಿಚಯಿಸಲ್ಪಟ್ಟ ಬಳಿಕ, ನಾಲ್ವರು ಗಗನಯಾತ್ರಿಗಳು ಭಾರತದಲ್ಲಿ ನಡೆಯುತ್ತಿರುವ ವಿವಿಧ ತರಬೇತಿ ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಾ ಬಂದಿದ್ದಾರೆ. ಇಸ್ರೋ ಈ ತರಬೇತಿಗಳಿಗಾಗಿ ಸೇನಾ ಸಂಸ್ಥೆಗಳು ಸೇರಿದಂತೆ, ವಿವಿಧ ಸಂಸ್ಥೆಗಳೊಡನೆ ಸಹಯೋಗ ಮಾಡಿಕೊಂಡಿತ್ತು. ಅದರೊಡನೆ, ಇಸ್ರೋ ವಿವಿಧ ಶ್ರೇಣಿಗಳ ಸಿಮ್ಯುಲೇಟರ್ಗಳೊಂದಿಗೆ ತನ್ನ ಹ್ಯುಮನ್ ಸ್ಪೇಸ್ ಫ್ಲೈಟ್ ಸೆಂಟರ್ (ಎಚ್ಎಸ್ಎಫ್ಸಿ) ಅನ್ನು ಅಭಿವೃದ್ಧಿ ಪಡಿಸುತ್ತಿದೆ. ಗಗನಯಾತ್ರಿಗಳು ತಮ್ಮ ದೈಹಿಕ ಕ್ಷಮತೆ ಕಾಪಾಡಿಕೊಳ್ಳುವ ನಿಟ್ಟಿನಲ್ಲಿ ಭಾರತೀಯ ವಾಯುಪಡೆಯ ನಿಯಮಿತ ಹಾರಾಟ ಚಟುವಟಿಕೆಗಳಲ್ಲಿ ಭಾಗವಹಿಸುತ್ತಿದ್ದು, ದೈನಂದಿನ ಚಟುವಟಿಕೆಗಳ ಭಾಗವಾಗಿ ಇತರ ದೈಹಿಕ ಕ್ಷಮತಾ ಅಭ್ಯಾಸಗಳನ್ನು ನಡೆಸುತ್ತಿದ್ದಾರೆ.
