ಬೆಂಗಳೂರು: ಮಹತ್ವದ ಬೆಳವಣಿಗೆಯಲ್ಲಿ ಆರ್ಟಿಐ ವ್ಯಾಪ್ತಿಗೆ ಬೆಂಗಳೂರಿನ ಪ್ರತಿಷ್ಠಿತ ಸೆಂಚುರಿ ಕ್ಲಬ್ ಬರುತ್ತದೆ ಎಂದು ಹೈಕೋರ್ಟ್ ಸ್ಪಷ್ಟಪಡಿಸಿ ಆದೇಶ ಹೊರಡಿಸಿದೆ. ಸೆಂಚುರಿ ಕ್ಲಬ್ ಸಾರ್ವಜನಿಕ ಪ್ರಾಧಿಕಾರವಾಗಿದ್ದು, ಇದು ಮಾಹಿತಿ ಹಕ್ಕು ಕಾಯ್ದೆಯ ವ್ಯಾಪ್ತಿಗೆ ಒಳಪಡುತ್ತದೆ ಎಂಬುದಾಗಿ ಮಾಹಿತಿ ಆಯೋಗ ಹೊರಡಿಸಿದ್ದ ಆದೇಶವನ್ನು ಹೈಕೋರ್ಟ್ ಎತ್ತಿಹಿಡಿದಿದೆ.
ಮಾಹಿತಿ ಆಯೋಗ ಹೊರಡಿಸಿದ ತೀರ್ಪು ಪ್ರಶ್ನಿಸಿ ಸೆಂಚುರಿ ಕ್ಲಬ್ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನೆಡೆಸಿದ ನ್ಯಾ. ಸೂರಜ್ ಗೋವಿಂದರಾಜು ಅವರಿದ್ದ ಏಕಸದಸ್ಯ ಪೀಠ ಈ ಆದೇಶ ಹೊರಡಿಸಿದೆ. ಅಂದಿನ ಮಹಾರಾಜರು, ಮೈಸೂರು ಸಂಸ್ಥಾನಕ್ಕೆ ಸೇರಿದ್ದ 7.5 ಎಕರೆ ಜಮೀನನ್ನು ಸೆಂಚುರಿ ಕ್ಲಬ್ ಗಾಗಿ ಮಂಜೂರು ಮಾಡಿದ್ದರು. ಇದಕ್ಕೆ ಪ್ರತಿಯಾಗಿ ಕ್ಲಬ್ ನಿಂದ ಮಹಾರಾಜರು ಹಣ ಪಡೆದಿರಲಿಲ್ಲ.
ಜೊತೆಗೆ ಮೈಸೂರು ಮಹಾರಾಜರು ಮಂಜೂರು ಮಾಡಿದ 7.5 ಎಕರೆ ಜಾಗದಲ್ಲೇ ಈಗ ಕ್ಲಬ್ ನಡೆಯುತ್ತಿದೆ. ಈ ಭೂಮಿ ಇಲ್ಲವಾದಲ್ಲಿ ಕ್ಲಬ್ ನ ಅಸ್ಥಿತ್ವವೇ ಇಲ್ಲವಾಗಲಿದೆ.
ಕ್ಲಬ್ ಗೆ ಮೈಸೂರು ಮಹಾರಾಜರು ನೀಡಿದ್ದ ಜಮೀನಿನ ಹಾಲಿನ ಮೌಲ್ಯ ನೂರಾರು ಕೋಟಿ ರೂಪಾಯಿ.. ಆದ್ರೆ ಸದಸ್ಯರು ಪಾವತಿ ಮಾಡುವ ಸದಸ್ಯತ್ವ ಶುಲ್ಕ ಅತ್ಯಲ್ಪ. ಈ ಎಲ್ಲ ಅಂಶಗಳನ್ನು ಪರಿಗಣಿಸಿದರೆ ಕ್ಲಬ್ ಗೆ ಸರ್ಕಾರ ಹೆಚ್ಚಿನ ಅನುದಾನ ನೀಡಿದೆ. ಹೀಗಾಗಿ ಸೆಂಚುರಿ ಕ್ಲಬ್ ಮಾಹಿತಿ ಹಕ್ಕು ಕಾಯ್ದೆಯ ವ್ಯಾಪಿಗೆ ಬರಲಿದೆ ಎಂದು ಹೈಕೋರ್ಟ್ ನ್ಯಾಯಪೀಠ ಹೇಳಿದೆ.
