ಬಾಂಗ್ಲಾದೇಶದ ಸೆರೆಯಲ್ಲಿದ್ದ ಆಂಧ್ರಪ್ರದೇಶದ 9 ಮೀನುಗಾರರು ಬರೋಬ್ಬರಿ ಮೂರು ತಿಂಗಳ ನಂತರ ಸುರಕ್ಷಿತವಾಗಿ ಸ್ವದೇಶಕ್ಕೆ ಮರಳಿದ್ದಾರೆ. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ನಿರಂತರ ರಾಜತಾಂತ್ರಿಕ ಪ್ರಯತ್ನಗಳ ಫಲವಾಗಿ ಈ ಮೀನುಗಾರರು ಇಂದು ತಮ್ಮ ಕುಟುಂಬಗಳನ್ನು ಸೇರಿಕೊಂಡಿದ್ದು, ವಿಜಯನಗರಂ ಜಿಲ್ಲೆಯ ಅಧಿಕಾರಿಗಳು ಅವರಿಗೆ ಅದ್ಧೂರಿ ಸ್ವಾಗತ ಕೋರಿದ್ದಾರೆ.
ಕಳೆದ ವರ್ಷ ಅಕ್ಟೋಬರ್ನಲ್ಲಿ ಬಂಗಾಳಕೊಲ್ಲಿಯಲ್ಲಿ ಮೀನುಗಾರಿಕೆಗೆ ತೆರಳಿದ್ದ ಈ ಒಂಬತ್ತು ಮಂದಿ, ಸಮುದ್ರದಲ್ಲಿ ಅಜಾಗರೂಕತೆಯಿಂದ ಅಂತರಾಷ್ಟ್ರೀಯ ಗಡಿಯನ್ನು ದಾಟಿದ್ದರು. ಈ ಹಿನ್ನೆಲೆಯಲ್ಲಿ ಬಾಂಗ್ಲಾದೇಶದ ನೌಕಾಪಡೆಯು ಇವರನ್ನು ಬಂಧಿಸಿ, ಅಲ್ಲಿನ ಬಗೇರ್ಹಟ್ ಜೈಲಿನಲ್ಲಿ ಇರಿಸಿತ್ತು. ಗಡಿ ದಾಟಿದ ಪ್ರಕರಣವಾಗಿರುವುದರಿಂದ ಇವರ ಬಿಡುಗಡೆಗಾಗಿ ಭಾರತ ಸರ್ಕಾರವು ಬಾಂಗ್ಲಾದೇಶದೊಂದಿಗೆ ಸುದೀರ್ಘ ಮಾತುಕತೆ ನಡೆಸಿತ್ತು.
ಜನವರಿ 29ರಂದು ಬಾಂಗ್ಲಾದೇಶದ ಕೋಸ್ಟ್ ಗಾರ್ಡ್ ಅಧಿಕಾರಿಗಳು ಭಾರತೀಯ ಕೋಸ್ಟ್ ಗಾರ್ಡ್ಗೆ ಈ ಮೀನುಗಾರರನ್ನು ಹಸ್ತಾಂತರಿಸಿದರು. ನಂತರ ಅಲ್ಲಿಂದ ವಿಶಾಖಪಟ್ಟಣಂ ಕರಾವಳಿಗೆ ಕರೆತರಲಾದ ಮೀನುಗಾರರನ್ನು ಸ್ಥಳೀಯ ಪೊಲೀಸರ ವಶಕ್ಕೆ ಒಪ್ಪಿಸಲಾಯಿತು. ಬಿಡುಗಡೆಯಾದವರಲ್ಲಿ ಮರುಪಲ್ಲಿ ಚಿನ್ನಪ್ಪಣ್ಣ, ರಮೇಶ್ ಅಪ್ಪಲಕೊಂಡ, ಪ್ರವೀಣ್ ಸೇರಿದಂತೆ ಒಟ್ಟು 9 ಮಂದಿ ಇದ್ದು, ಇವರಲ್ಲಿ ಆರು ಮಂದಿ ಕೊಂಡರಾಜುಪಾಲಂ ಗ್ರಾಮದವರಾದರೆ, ಉಳಿದ ಮೂವರು ತಿಪ್ಪಲವಲಸ ಗ್ರಾಮಕ್ಕೆ ಸೇರಿದವರಾಗಿದ್ದಾರೆ.
ಮೂರು ತಿಂಗಳ ಕಾಲ ಜೈಲು ವಾಸ ಅನುಭವಿಸಿ ತವರಿಗೆ ಮರಳಿದ ಮೀನುಗಾರರ ಕುಟುಂಬಗಳಲ್ಲಿ ಈಗ ಹಬ್ಬದ ವಾತಾವರಣ ನಿರ್ಮಾಣವಾಗಿದೆ. ಸಮುದ್ರದ ಗಡಿಗಳ ಬಗ್ಗೆ ಮೀನುಗಾರರಲ್ಲಿ ಜಾಗೃತಿ ಮೂಡಿಸುವ ಅಗತ್ಯವನ್ನು ಈ ಘಟನೆ ಮತ್ತೊಮ್ಮೆ ಎತ್ತಿ ತೋರಿಸಿದೆ.
