ಕೃಷ್ಣರಾಜನಗರ : ಪುರಸಭೆ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ಪಟ್ಟಣದ ಶ್ರೀಕೃಷ್ಣರಾಜೇಂದ್ರ ವೃತ್ತದಲ್ಲಿ ಮೈಸೂರು ಮಹಾರಾಜರು ಸ್ಥಾಪಿಸಿದ ಗರುಢಗಂಬದ ಅಸ್ತಿತ್ವಕ್ಕೆ ಧಕ್ಕೆ ಉಂಟಾಗಿದೆ.
ಗರುಢಗಂಬದ ಸುತ್ತಲೂ ಮೃತಪಟ್ಟವರ ಹಾಗೂ ಇನ್ನಿತರೆ ಕಾರ್ಯಕ್ರಮಗಳ ಬ್ಯಾನರ್‌, ಪೋಸ್ಟರ್‌ ಹಾಕುತ್ತಿರುವುದರಿಂದ ಈ ಸ್ಥಳದ ವಿಶೇಷತೆಗೆ ಕುಂದುಂಟಾಗಿದೆ ಎಂದು ಪ್ರಜ್ಞಾವಂತರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
ಕೃಷ್ಣರಾಜಸಾಗರ ನಿರ್ಮಾಣದ ಸಂದರ್ಭದಲ್ಲಿ ಎಡತೊರೆ ಗ್ರಾಮ ಕಾವೇರಿ ನೀರಿನಲ್ಲಿ ಮುಳುಗಿದಾಗ ಮೈಸೂರು ಮಹಾರಾಜ ನಾಲ್ವಡಿ ಕೃಷ್ಣರಾಜ ಒಡೆಯರ್‌ 1935ರಲ್ಲಿ2 ಕಿ.ಮೀ. ದೂರದ ಎತ್ತರದ ಪ್ರದೇಶಕ್ಕೆ ಊರನ್ನು ಸ್ಥಳಾಂತರಿಸಿ ಅದಕ್ಕೆ ಕೃಷ್ಣರಾಜನಗರ ಎಂದು ಹೆಸರನ್ನಿಟ್ಟರು. ಅದರ ಕುರುಹಾಗಿ ಊರಿನ ಮಧ್ಯದಲ್ಲಿ ದೈವಸ್ವರೂಪಿ ಗರುಢಗಂಬವನ್ನು ಸ್ಥಾಪಿಸಿದ್ದಾರೆ. ಶ್ರೀ ಕೃಷ್ಣರಾಜೇಂದ್ರ ವೃತ್ತ ಎಂದು ನಾಮಕರಣಗೊಂಡಿದ್ದರೂ ಗರುಢಗಂಬ ವೃತ್ತ ಎಂದೇ ಜನಜನಿತವಾಗಿದೆ.
ದೇವಾಲಯದ ಮುಂದೆ ಗರುಢಗಂಬ ಇರುವುದು ಸಹಜ. ಆದರೆ, ಅಂದು ಊರು ನಿರ್ಮಾಣ ಮಾಡಿದಾಗ ಮೈಸೂರು ಮಹಾರಾಜರು ಊರಿಗೆ ಒಳ್ಳೆಯದಾಗಲಿ ಎಂದು ಗರುಢಗಂಬವನ್ನು ಪ್ರತಿಷ್ಠಾಪಿಸಿದರು. ಅದಕ್ಕೆ ಸುತ್ತಲೂ ಅಲಂಕೃತ ಕಬ್ಬಿಣದ ಸರಪಳಿ ಅಳವಡಿಸಿ, ಸಂರಕ್ಷಿತ ಪ್ರದೇಶವಾಗಿಸಿದ್ದರು. ಆದರೆ, ಪುರಸಭೆ ಆಡಳಿತದ ನಿರ್ಲಕ್ಷತ್ರ್ಯದಿಂದ ರಾಜಕೀಯ ಪಕ್ಷಗಳ ಬ್ಯಾನರ್‌, ಪೋಸ್ಟರ್‌ಗಳನ್ನು ಅಲ್ಲಿ ಹಾಕಲಾಗುತ್ತಿದೆ.
ಅಲ್ಲದೇ ಕಾರ್ಯಕ್ರಮದ ಬಗ್ಗೆ ಗಮನ ಸೆಳೆಯಲು ಗರುಢಗಂಬದ ಮೇಲೆ ಹತ್ತಿ ಲೈಟಿಂಗ್‌ ಹಾಗೂ ಬಾವುಟ ಕಟ್ಟುವುದು ಸಾಮಾನ್ಯವಾಗಿದೆ. ಇದರಿಂದ ಗರುಢಗಂಬಕ್ಕೆ ಅಗೌರವ ಸಲ್ಲಿಸಲಾಗುತ್ತಿದೆ. ಅಲ್ಲದೇ ಈಗಾಗಲೇ ರಕ್ಷಣೆಗಾಗಿ ಹಾಕಲಾಗಿದ್ದ ಕಬ್ಬಿಣದ ಸರಳು ಹಾಗೂ ಕಲ್ಲಿನ ಕಂಬಗಳು ಮುರಿದುಬಿದ್ದಿವೆ. ಅದರ ದುರಸ್ತಿಗೂ ಕ್ರಮ ಕೈಗೊಳ್ಳದಿರುವುದು ಜನತೆಯಲ್ಲಿ ಬೇಸರವನ್ನುಂಟು ಮಾಡಿದೆ.
ಪಟ್ಟಣ ಸೇರಿದಂತೆ ಅಕ್ಕಪಕ್ಕ ಗ್ರಾಮದಲ್ಲಿ ಯಾರೇ ಮೃತಪಟ್ಟರೂ ನೇರವಾಗಿ ಅವರ ಫ್ಲೆಕ್ಸ್‌ ತಂದು ಗರುಢಗಂಬ ಮುಂದೆ ಹಾಕುವುದು ಸಾಮಾನ್ಯವಾಗಿದೆ. ಇದು ವಾರಗಟ್ಟಲೇ ಅಲ್ಲೇ ಇರುವುದರಿಂದ ಪ್ರಯಾಣಿಕರ ದೃಷ್ಟಿ ಬೇರೆಡೆಗೆ ಹರಿದು ಅಪಘಾತಗಳಿಗೂ ಕಾರಣವಾಗಿದೆ.
ಮುಂದಾದರೂ ಸಂಬಂಧಪಟ್ಟ ಪುರಸಭೆ ಅಕಾರಿಗಳು ಕ್ರಮ ಕೈಗೊಂಡು ಗರುಢಗಂಬದ ಮೇಲೆ ಹತ್ತಿ ಯಾವುದೇ ಪೋಸ್ಟರ್‌, ಲೈಟಿಂಗ್ಸ್‌ ಇಲ್ಲವೇ ಫ್ಲೆಕ್ಸ್‌ ಅಳವಡಿಸುವುದನ್ನು ತಪ್ಪಿಸುವಂತೆ ನಾಗರಿಕರು ಒತ್ತಾಯಿಸಿದ್ದಾರೆ.
ಪಟ್ಟಣದ ಎಲ್ಲೆಡೆ ಅನುಮತಿ ಇಲ್ಲದೆ ಪೋಸ್ಟರ್‌ ಹಾಕುವ ಸಂಸ್ಕೃತಿ ಹೆಚ್ಚಾಗಿದೆ. ಈಗಾಗಲೇ ಸಿಬ್ಬಂದಿಗೆ ಪೋಸ್ಟರ್‌ಗಳನ್ನು ತೆರವುಗೊಳಿಸುವಂತೆ ತಿಳಿಸಲಾಗಿದೆ. ರಜೆ ಇದ್ದ ಕಾರಣ ತೆಗೆದಿಲ್ಲ. ಪುರಸಭೆ ಆಡಳಿತ ಮಂಡಳಿ ಜತೆಗೆ ಸಮಾಲೋಚನೆ ನಡೆಸಿ ಕ್ರಮ ಕೈಗೊಳ್ಳಲಾಗುವುದು.
ಊರು ನಿರ್ಮಾಣ ಮಾಡಿದಾಗ ಸ್ಥಾಪಿತವಾದ ಗರುಢಗಂಬಕ್ಕೆ ಎಲ್ಲರೂ ಗೌರವ ಕೊಡಬೇಕು. ಸಂಬಂಧಪಟ್ಟ ಪುರಸಭೆ ಅಕಾರಿಗಳು ಕೃಷ್ಣರಾಜನಗರದ ಸಂಕೇತವಾದ ಗರುಢಗಂಬದ ನೈಜ ಸ್ವರೂಪ, ಗೌರವ ಕಾಪಾಡಬೇಕು.
ಜಾಹೀರಾತು ನೀಡಲು ಸಂಪರ್ಕಿಸಿ
Phone Number : +91-9164072277
Email id : salesatfreedomtv@gmail.com
