ಬೆಂಗಳೂರು: ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ಅಂಗಳದಲ್ಲಿ ಮತ್ತೊಂದು ಹಗರಣ ಸದ್ದು ಮಾಡ್ತಿದೆ. ಬೀದಿನಾಯಿಗಳಿಗೆ ಅಳವಡಿಸಲು ಹೊರಟಿರುವ ಮೈಕ್ರೋಚಿಪ್ ಈಗ ಹಗರಣದ ಸ್ವರೂಪ ಪಡೆದುಕೊಳ್ಳುತ್ತಿದೆ.ಅನಗತ್ಯ ಹಾಗೂ ಅಪಾಯಕಾರಿಯಾಗಿರುವ ಮೈಕ್ರೋಚಿಪ್ ಅಳವಡಿಕೆ ನಿಯಮಬಾಹಿರ ಕೃತ್ಯ ಎಂದು ಪ್ರಾಣಿಪ್ರಿಯರು ಅಪಸ್ವರ ಎತ್ತಿದ್ದಾರೆ.
ನಾಯಿಗಳ ಸೆನ್ಸಸ್ ನಲ್ಲಿ ನಡೆಯಿತೆನ್ನಲಾದ ಹಗರಣದ ನಂತರ ಪಶುಪಾಲನಾ ಇಲಾಖೆಯಲ್ಲಿ ನಡೆಯೊಕ್ಕೆ ಹೊರಟಿರುವ ಹಗರಣ ಇದೆನ್ನಲಾಗಿದೆ.ಬೃಹತ್ತಾಗಿ ಬೆಳೆದಿರುವ ಬೆಂಗಳೂರಿನಲ್ಲಿ ಬೀದಿನಾಯಿಗಳು ಎಷ್ಟಿವೆ ಎಂದು ಕೇಳಿದ್ರೆ ಕರಾರುವಕ್ಕಾಗಿ ಹೇಳೊಕ್ಕೆ ಬರುವುದಿಲ್ಲ.ಒಂದು ಅಂದಾಜು 2,79,335 ಎಂದಿತ್ತು ಬಿಬಿಎಂಪಿ. ಯಾಕೆ ಕರಾರುವಕ್ಕಾಗಿ ಹೇಳೊಕ್ಕೆ ಬರೊಲ್ಲ ಎಂದು ಕೇಳಿದ್ರೆ ಬೀದಿನಾಯಿಗಳೆಲ್ಲವನ್ನು ಗಲ್ಲಿಗಲ್ಲಿಗೆ ಹೋಗಿ ಹುಡುಕಿ ಸೆನ್ಸಸ್ ಮಾಡೊಕ್ಕೆ ಆಗೊಲ್ಲ,ಹಾಗಾಗಿ ಏನೇ ಹೇಳಿದ್ರೂ ಅದು ಬಹುಷಃ ಎನ್ನುವ ಪದದಲ್ಲೇ ಉಲ್ಲೇಖಿಸಬೇಕು ಎಂದಿದ್ದಾಗಲೇ ಸಾರ್ವಜನಿಕ ವಲಯದಲ್ಲಿ ಏನೋ ವ್ಯತ್ಯಾಸವಾಗಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿತ್ತು.
ಹೋಗಲಿ ಬಿಡಿ….ಎಂದು ಸುಮ್ಮನಾದ್ರೂ ಈಗ ಪಶುಪಾಲನ ಇಲಾಖೆ ಕೈಗೆತ್ತಿಕೊಳ್ಳೊಕ್ಕೆ ಹೊರಟಿರುವ ಮೈಕ್ರೋಚಿಪ್ ಅಳವಡಿಕೆ ಇದೆಯೆಲ್ಲಾ ಅದು ಎಂಥವರಿಗೂ ವೈಜ್ಞಾನಿಕ ಹಾಗೂ ಪ್ರಕೃತಿ ಸಹಜ ಎನಿಸುವುದೇ ಇಲ್ಲ..ಏಕೆಂದರೆ ಬೀದಿನಾಯಿಗಳ ವಿಚಾರದಲ್ಲಿ ಮಾಡೊಕ್ಕೆ ಸಾಕಷ್ಟು ಸುಧಾರಣೆಯ ಕೆಲಸಗಳಿದ್ದರೂ ಅವನ್ನೆಲ್ಲಾ ಬಿಟ್ಟು ಚಿಪ್ ಅಳವಡಿಸ್ತೀನಿ ಎಂದು ಹೊರಟಿರುವುದು ಪ್ರಾಣಿದಯಾ ಸಂಘಗಳನ್ನು ನಖಶಿಖಾಂತ ಉರಿಸಿದೆ.ಇದು ಕೇವಲ ಹಣ ಲೂಟಿಯ ಸ್ಕೀಂ ಎನ್ನುವುದು ಮೈಕ್ರೋಚಿಪ್ ಅಳವಡಿಕೆ ವಿರುದ್ದ ದೊಡ್ಡ ಜನಾಂದೋಲನವನ್ನೇ ರೂಪಿಸ್ಲಿಕ್ಕೆ ಹೊರಟಿರುವ ಪ್ರಾಣಿಪ್ರಿಯ ಹಾಗೂ ಪ್ರಾಣಿಕಲ್ಯಾಣ ಮಂಡಳಿಯ ಆರೋಪ.
ಮೈಕ್ರೋಚಿಪ್ ಅಳವಡಿಕೆ ಬಗ್ಗೆ ಬಿಬಿಎಂಪಿ ಆಸಕ್ತಿ ಯಾಕೆ?
ಬೀದಿನಾಯಿಗಳಿಗೆ ಮೈಕ್ರೋಚಿಪ್ ಅಳವಡಿಸುವ ಅಗತ್ಯವನ್ನು ಬಿಬಿಎಂಪಿಯ ಪಶುಸಂಗೋಪನಾ ಇಲಾಖೆಯ ಜಂಟಿ ನಿರ್ದೇಶಕರಾದ ಕೆಪಿ ರವಿಕುಮಾರ್ ಈ ರೀತಿ ಹೇಳ್ತಾರೆ. ಅವರ ಪ್ರಕಾರ 2.8 ಲಕ್ಷ ಬೀದಿನಾಯಿಗಳ ಪೈಕಿ ಸುಮಾರು 1.4 ಲಕ್ಷ ನಾಯಿಗಳಿಗೆ ಮೈಕ್ರೋಚಿಪ್ ಅಳವಡಿಸುವ ಹಿಂದಿನ ಉದ್ದೇಶ ಬೀದಿ ನಾಯಿಗಳ ಕಂಪ್ಲೀಟ್ ವಿವರಣೆಯನ್ನು ಒಂದು ಚಿಪ್ ನಲ್ಲಿ ಕ್ರೋಢೀಕರಿಸುವುದು.ಅಗತ್ಯಬಿದ್ದಾಗ ಕೋಡ್ ನ್ನು ಸ್ಕ್ಯಾನ್ ಮಾಡಿದ್ರೆ ಅದರ ಎಲ್ಲಾ ಮಾಹಿತಿ ಸಿಗುತ್ತದೆ.ಇದರಿಂದ ನಾಯಿಯ ವಿವರ, ಯಾವ ಏರಿಯಾದ್ದು,ಅದಕ್ಕೆ ಎಬಿಸಿ ಮಾಡಲಾಗಿದೆಯಾ..? ಎಆರ್ ವಿ ನೀಡಲಾಗಿದೆಯಾ..? ವ್ಯಾಕ್ಸಿನೇಷನ್ ಕೊಡಲಾಗಿದೆಯಾ ಎನ್ನುವ ಮಾಹಿತಿ ದೊರೆಯುತ್ತದೆ.ಇದರಿಂದ ಪದೇ ಪದೇ ವ್ಯಾಕ್ಸಿನೇಷನ್ ಮಾಡುವ ತಾಪತ್ರೆಯ ತಪ್ಪಿದಂತಾಗುತ್ತದೆ.
ಆದರೆ ಇದರ ಅಗತ್ಯ ಏನಿದೆ ಎನ್ನುವುದು ಪ್ರಾಣಿಪ್ರಿಯರು ಹಾಗೂ ವನ್ಯಜೀವಿ ಸಂರಕ್ಷಕರ ಪ್ರಶ್ನೆ.ಬೀದಿನಾಯಿಗಳ ವಿಚಾರದಲ್ಲಿ ಬಿಬಿಎಂಪಿಯಾಗಲಿ ಅಥವಾ ಅದಕ್ಕೆ ಸಂಬಂಧಿಸಿದ ಯಾವುದೇ ಏಜೆನ್ಸಿಯಾಗಲಿ ದಿಢೀರ್ ಮೈಕ್ರೋಚಿಪ್ ಅಳವಡಿಕೆಯಂಥ ನಿರ್ಧಾರ ಕೈಗೊಳ್ಳುವಂತಿಲ್ಲ.ಪ್ರಾಣಿಕಲ್ಯಾಣ ಮಂಡಳಿಯಲ್ಲಿ ಈ ಬಗ್ಗೆ ನಿರ್ಧಾರವಾಗಬೇಕು..ಸರ್ಕಾರದ ಗೆಜೆಟ್ ನಲ್ಲಿ ಇದರ ಉಲ್ಲೇಖವಾಗಬೇಕು.ಅದಾಗದ ಹೊರತು ಬಿಬಿಎಂಪಿ ಪಶುಪಾಲನಾ ಇಲಾಖೆ ಬೀದಿನಾಯಿಗಳ ವಿಚಾರದಲ್ಲಿ ಇಂತದ್ದೊಂದು ನಿರ್ಣಯ ಕೈಗೊಂಡಿರುವುದು ಅಕ್ರಮ ಎನ್ನಲಾಗುತ್ತಿದೆ.ಮೈಕ್ರೋಚಿಪ್ ಅಳವಡಿಸುವ ಭರಾಟೆಯಲ್ಲಿ ಬೀದಿನಾಯಿಗಳ ಆರೋಗ್ಯ ಹಾಗೂ ಜೀವದೊಂದಿಗೂ ಬಿಬಿಎಂಪಿ ಚೆಲ್ಲಾಟವಾಡಿದಂತಾಗುತ್ತಿದೆ.ಮೈಕ್ರೋಚಿಪ್ ಅಳವಡಿಸಿ ಕೈತೊಳೆದುಕೊಂಡ್ರೆ ಹೇಗೆ..? ನಮಗೂ ಬೀದಿನಾಯಿಗಳಿಗೂ ಯಾವುದೇ ಸಂಬಂಧವಿಲ್ಲ ಎನ್ನುವಂತೆ ಕೂರುವಂಗಿಲ್ಲ.ಅಲ್ಲದೇ ಕುತ್ತಿಗೆಯೊಳಗೆ ರಂಧ್ರ ಕೊರೆದು ಅಳವಡಿಸುವ ಮೈಕ್ರೋಚಿಪ್ ಜಾರಿ ದೇಹದೊಳಗೆ ಜಾರಿದ್ರೆ ಅದು ಇನ್ಫೆಕ್ಷನ್ ಆಗುವ ಆತಂಕವಿದೆ.ಇದು ಬೀದಿನಾಯಿಗಳ ಜೀವಕ್ಕೇ ಮಾರಕವಾದ್ರೆ ಇದರ ಹೊಣೆ ಯಾರು ಎಂಬ ಪ್ರಶ್ನೆಗಳು ಉದ್ಭವಿಸಿವೆ.
ಇನ್ನೂ…ಇದರ ಸಾಧಕ-ಬಾಧಕಗಳ ಬಗ್ಗೆ ಚರ್ಚೆಯೇ ನಡೆದಿಲ್ಲ.ಈ ವಿಷಯವನ್ನು ಸಾರ್ವಜನಿಕ ಚರ್ಚೆಗೇನೆ ಬಿಟ್ಟಿಲ್ಲ.ನಮ್ಮನ್ನೆಲ್ಲಾ ಮಾತುಕತೆಗೇನೆ ಆಹ್ವಾನಿಸಿಲ್ಲ.ಇವರ ಇಷ್ಟಕ್ಕೆ ಬಂದಂತೆ ನಿರ್ಧಾರ ಮಾಡಿದ್ದಾರೆಂದು ಪ್ರಾಣಿ ಪ್ರಿಯರು ಆರೋಪಿಸಿದ್ದಾರೆ..
ಬೀದಿನಾಯಿಗಳಿಗೆ ಕಳಪೆ ಗುಣಮಟ್ಟದ ಮೈಕ್ರೋಚಿಪ್ ಅಳವಡಿಸಿದ್ರೆ ಅಪಾಯ:
ಮೈಕ್ರೋಚಿಪ್ ಗಳನ್ನು ಅಳವಡಿಸುವ ಕೆಲಸ ನಡೆದೇ ಇಲ್ಲವೆಂದೇನಿಲ್ಲ.ಕೆಲವರು ಖಾಸಗಿಯಾಗಿ ತಮ್ಮ ಸಾಕುನಾಯಿಗಳಿಗೆ ಈ ಮೈಕ್ರೋಚಿಪ್ ಅಳವಡಿಸುತ್ತಾರೆ.ಆದರೆ ಆ ಮೈಕ್ರೋಚಿಪ್ ಗಳಿಗೂ ಬಿಬಿಎಂಪಿ ಅಳವಡಿಸಲು ಹೊರಟಿರುವ ಮೈಕ್ರೋಚಿಪ್ ಗಳಿಗೂ ಸಾಕಷ್ಟು ವ್ಯತ್ಯಾಸಗಳಿವೆ.4 -5 ಸಾವಿರ ಮೌಲ್ಯದ ಒಳ್ಳೆ ಗುಣಮಟ್ಟದ ಮೈಕ್ರೋಚಿಪ್ ಗಳನ್ನು ಅಳವಡಿಸುತ್ತಾರೆ. ಅವುಗಳಿಂದ ನಾಯಿಗಳ ಜೀವಕ್ಕೆ ಕಂಟಕವಿರುವುದಿಲ್ಲ. ಆದರೆ ಬಿಬಿಎಂಪಿಯವರು ಅಳವಡಿಸಲು ಹೊರಟಿರುವುದು 195 ಮೌಲ್ಯದ ಮೈಕ್ರೋಚಿಪ್ ಗಳನ್ನು. ಅವುಗಳ ಗುಣಮಟ್ಟ-ಬಾಳಿಕೆ-ಅಡ್ಡಪರಿಣಾಮದಂಥ ಸಾಧಕ-ಬಾಧಕಗಳ ಬಗ್ಗೆ ಅವರವರೇ ಚರ್ಚಿಸಿ ತೀರ್ಮಾನ ಕೈಗೊಂಡಿದ್ದಾರೆ. ಇದು ಎಷ್ಟರ ಮಟ್ಟಿಗೆ ಒಳ್ಳೇದು ಎನ್ನುವುದನ್ನು ಅವರೇ ಹೇಳಬೇಕಿದೆ. ಸೂಕ್ಷ್ಮವಾಗಿ ಗಮನಿಸಿದ್ರೆ ಇದು ಬಿಬಿಎಂಪಿ ಪಶುಪಾಲನೆ ಇಲಾಖೆಯ ಎಡವಟ್ಟಿನ ನಿರ್ಧಾರ ಎನ್ನಬಹುದು.ಬೀದಿನಾಯಿಗಳ ಜೀವಕ್ಕೇನೆ ತೊಂದರೆಯಾದರೂ ಅದಕ್ಕೆ ನಾವೇ ಹೊಣೆ ಎಂದು ಬರೆದುಕೊಟ್ಟು ಬಿಬಿಎಂಪಿ ಪಶುಪಾಲನೆ ಇಲಾಖೆ ಮೈಕ್ರೋಚಿಪ್ ಅಳವಡಿಸಬೇಕು.ಇಲ್ಲದಿದ್ದರೆ ಅದರ ಬಗ್ಗೆ ಉಗ್ರ ಹೋರಾಟ ಅನಿವಾರ್ಯ ಎಂದು ಪ್ರಾಣಿಪ್ರಿಯರು ಎಚ್ಚರಿಸಿದ್ದಾರೆ.
ಮೈಕ್ರೋಚಿಪ್ ಅಳವಡಿಕೆಗೆ ಒಟ್ಟು 3 ಕೋಟಿ 81 ಲಕ್ಷ ಖರ್ಚು:
ಒಂದು ಮೈಕ್ರೋಚಿಪ್ ಬೆಲೆ 195 ರೂಪಾಯಿ ಆಗಿದ್ದು ನಗರದಲ್ಲಿ ಒಟ್ಟು 1,84,671 ಬೀದಿನಾಯಿಗಳಿವೆ ಎನ್ನಲಾಗಿದ್ದು ಎಲ್ಲಾ ನಾಯಿಗಳಿಗೂ ಮೈಕ್ರೋಚಿಪ್ ಅಳವಡಿಸಿದ್ರೆ ಬಿಬಿಎಂಗೆ 3 ಕೋಟಿ 81 ಲಕ್ಷ ಖರ್ಚು ಆಗಲಿದೆ ಎಂದು ಹೇಳಲಾಗುತ್ತಿದೆ.ಬಿಬಿಎಂಪಿ ಪಶುಪಾಲನಾ ಇಲಾಖೆಗೆ ಇದು ಪ್ರಾಣಿವಿರೋಧಿ ಎನ್ನುವುದು ಗೊತ್ತಿದ್ದರೂ ಬಹುತೇಕರ ವಿರೋಧಗಳ ನಡುವೆಯೇ ಟೆಂಡರ್ ಕರೆದಿದೆ.ಇದೀಗ ಈ ವಿಚಾರದಲ್ಲಿ ಹಿರಿಯ ಅಧಿಕಾರಿಗಳು ಯಾವ ತೀರ್ಮಾನ ಕೈಗೊಳ್ಳುತ್ತಾರೆ ಎಂಬುದು ತೀವ್ರ ಕುತೂಹಲ ಕೆರಳಿಸಿದೆ.
